Manipur | দুমাহৰ অন্তত মণিপুৰৰ ৰাষ্ট্ৰীয় ঘাইপথত অৱৰোধ উঠালে কুকি প্ৰতিবাদকাৰীয়ে

মণিপুৰৰ (Manipur) ৰাষ্ট্ৰীয় ঘাইপথত  দুমাহৰ অন্তত অৱৰোধ উঠাই লোৱা হয় গৃহমন্ত্ৰী অমিত শ্বাহৰ (Amit Shah) আবেদনৰ পিছত। যোৱা মে’ মাহত মণিপুৰত অশান্তিৰ সৃষ্টি হোৱাৰ পিছৰে পৰা ২ নং ৰাষ্ট্ৰীয় ঘাইপথ বা ইম্ফল-ডিমাপুৰ ৰাষ্ট্ৰীয় ঘাইপথ অৱৰোধ কৰি ৰখা হৈছিল। শেহতীয়াকৈ কুকিসকলে শ্বাহৰ কথা শুনি অৱৰোধ উঠাই লোৱাৰ সিদ্ধান্ত লয়।

ৰাষ্ট্ৰীয় ঘাইপথ অৱৰোধত কুকিৰ দুটা সংগঠন ইউনাইটেড পিপলছ ফ্ৰণ্ট (ইউপিএফ) আৰু কুকি নেচনেল অৰ্গেনাইজেচনে (Kuki Organization) গুৰুত্বপূৰ্ণ ভূমিকা পালন কৰিছিল। শেহতীয়াকৈ এই দুয়োটা সংগঠনে এক যৌথ বিবৃতি প্ৰকাশ কৰিছে। তাত তেওঁলোকে কয় যে ৰাষ্ট্ৰীয় ঘাইপথৰ অৱৰোধ শীঘ্ৰে উঠাই লোৱা হৈছে। ৰাজ্যৰ শান্তিৰ বাবে গভীৰ উদ্বেগ প্ৰকাশ কৰে গৃহমন্ত্ৰীগৰাকীয়ে।

মণিপুৰ ৰাজ্যৰ মুঠ দুটা ৰাষ্ট্ৰীয় ঘাইপথ। এটা হৈছে ইম্ফল-ডিমাপুৰ আৰু আনটো হৈছে ইম্ফল-জিৰিবুম (ৰাষ্ট্ৰীয় ঘাইপথ ৩৭)। কাংপকপি জিলাৰ সমীপৰ ২ নং ৰাষ্ট্ৰীয় ঘাইপথ মে’ মাহৰ পৰা অৱৰোধ কৰি ৰখা হৈছিল। অৱশেষত অৱৰোধ উঠাই লোৱা হয়। যাৰ ফলত মণিপুৰৰ পৰিস্থিতি কিছু পৰিমাণে স্বাভাৱিক হʼব বুলি ধাৰণা কৰা হৈছে।