One dead in police firing as mob tries to loot armoury I মণিপুৰত পুনৰ অস্ত্ৰ লুটৰ চেষ্টা : নিহত ১

মণিপুৰৰ (Manipur) ৰিজাৰ্ভ বেটেলিয়ন কেম্পত দুবাৰকৈ আক্ৰমণ চলাইছিল জনতাই। যাৰ ফলত গুলী আৰু শিলৰ আঘাতত ২ জন লোকৰ মৃত্যু হয়। আহত হয় ২৩ জন লোক। আৰক্ষীৰ সূত্ৰৰ পৰা জানিব পৰা মতে, মঙলবাৰে থৌবালৰ ৩ নং ৰিজাৰ্ভ বেটেলিয়নৰ শিবিৰত আক্ৰমণ চলাই গোলাবাৰুদ আৰু অস্ত্ৰ-শস্ত্ৰ লুট কৰাৰ চেষ্টা চলায়।

এই বিবাদৰ সময়তে ৰিজাৰ্ভ বেটেলিয়নৰ এজন জোৱানে গুলীয়াই হত্যা কৰে এগৰাকী কংগ্ৰেছ কৰ্মীক। ইয়াৰ পিছতে ৰাইজে পলায়ন কৰে যদিও পিছত জোৱানজনৰ ঘৰত জুই লগাই দিয়া হয়। দুপৰীয়া পুনৰ ৰাইজে সংৰক্ষিত বেটেলিয়নৰ শিবিৰত আক্ৰমণ চলায় আৰু সংঘৰ্ষৰ সৃষ্টি হয়। আহত হয় দুজন জোৱান আৰু ২১জন আক্ৰমণকাৰী। পৰিস্থিতি উত্তপ্ত হৈ পৰে।

ইফালে জনজাতি যুটীয়া মঞ্চৰ সন্মতি অবিহনে কুকি উগ্ৰপন্থীৰ কেএনঅ’ যুটীয়া মঞ্চই দেওবাৰে মণিপুৰৰ ২ নং ৰাষ্ট্ৰীয় ঘাইপথত অৱৰোধ উঠাই লোৱাৰ সিদ্ধান্ত লয়। শুনা গৈছে যে উত্তৰ-পূর্বাঞ্চলৰ এজন বিশিষ্ট বিজেপি নেতাৰ হেঁচাত তেওঁলোকে এই সিদ্ধান্ত লৈছে৷ এই ঘটনাৰ পিছত কুকিসকলৰ মাজত ক্ষোভ আৰু বিবাদ বৃদ্ধি পায়।

সোমবাৰে নিশা কেএনঅ’ৰ মুখপাত্ৰ ছেইলেন হাওকিপৰ লামকা ঘৰ জ্বলাই দিয়া হয়। তেওঁৰ গাড়ীও জ্বলি যায়। কিন্তু কোনো লোক আহত হোৱা নাই। কুকি উগ্ৰপন্থীৰ দুটা ফ্ৰণ্ট KNO আৰু UPF-এ প্ৰথমে তেওঁলোকৰ গোপন আলোচনাৰ বিষয়ে বিবৃতি প্ৰকাশ কৰি বিজেপি নেতাজনৰ নাম উল্লেখ কৰে। পিছত কোৱা হৈছে যে নেতাজনৰ নিজৰ নাম প্ৰচাৰ কৰাত নিষেধাজ্ঞা আৰোপ কৰিছে। তেতিয়ালৈকে অৱশ্যে এই কথা বিয়পি পৰিছিল। ইয়াৰ পিছত স্পষ্ট কৰি দি ছেইলেনে সোমবাৰে কয় যে এই সিদ্ধান্ত সকলোৰে সৈতে আলোচনা কৰি লোৱা হৈছে।

আনহাতে, ইউনিফাইড কমাণ্ডৰ বৈঠকৰ পাছত মুখ্যমন্ত্রী এন বীৰেণ সিঙে (N Biren Singh) ৰাজ্যখনৰ সকলো অবৈধ বাংকাৰ ভাঙি পেলোৱাৰ ঘোষণাৰ বিৰোধিতা কৰি আইটিএলএফে কয়, “কুকিসকলে মেইটেইক আক্রমণ কৰা নাই যদিও মেইটেইসকলে বাৰে বাৰে তেওঁলোকক আক্রমণ কৰি আছে, গতিকে কুকি গাঁওসমূহক সুৰক্ষা দিবলৈ বাংকাৰসমূহ প্রয়োজনীয়৷ বীৰেণ সিঙে মেইটেইসকলৰ আক্ৰমণৰ সুবিধাৰ বাবে বাংকাৰ ভঙাৰ পৰিকল্পনা কৰিছে। ইয়াক গ্ৰহণ কৰা নহʼব। অন্যথা কুকিসকলৰঅধিক দুৰ্বল হৈ পৰিব।”