ষ্টাফ ৰিপ’ৰ্টাৰ,ডিফু : অসম -নাগালেণ্ড সীমান্তৰ লাহৰিজানত আৰক্ষীৰ অভিযানত উদ্ধাৰ হৈছে বৃহৎ পৰিমানৰ নিচাযুক্ত হেৰ’ইন (Drugs seized in Karbi Anglong) ৷ অসম-নাগালেণ্ড সীমান্তৰ কাৰবি আংলং জিলাৰ ড্ৰাগছ সৰবৰাহকাৰী সকলৰ নিৰাপদ ক’ৰিডৰ হিছাপে খ্যাত খটখটী থানা এলেকাৰ লাহৰিজানত উদ্ধাৰ হৈছে নৱ প্ৰজন্মক তিল তিলকৈ মৃত্যুৰ মূখলৈ ঠেলি নিয়া বৰবিহ সদৃশ মাৰাত্মক ড্ৰাগছ ৷
বুধবাৰে নিশা প্ৰায় ১০ মান বজাত এক গোপন খবৰৰ ভিত্তিত বোকাজান মহকুমা আৰক্ষী বিষয়া জন দাসৰ নেতৃত্বত খটখটী থানাৰ অ’চি ৰমেন বৰদলৈ, থানা ষ্টাফ আৰু চিআৰপিএফৰ সহযোগত খটখটী থানা এলেকাৰ লাহৰিজানত এখন ঘৰত অভিযান চলাই ৯৪ টা চাবোনৰ বাকচত ১ কেজি ১৭৬ গ্ৰাম সন্দেহযুক্ত হেৰ’ইন উদ্ধাৰ কৰিবলৈ সক্ষম হয় ৷
উদ্ধাৰ হোৱা সন্দেহযুক্ত হেৰ’ইনখিনিৰ সৈতে আৰক্ষীয়ে লাহৰিজানৰ মৃত ৰহিম হুছেইনৰ পুত্ৰ ছাহীদ হুছেইন (৪৪) আৰু মজিবুৰ ৰহমানৰ পুত্ৰ আশ্বাদুল ৰহমান (২৭) আটক কৰিবলৈ সক্ষম হয় ৷ সাংবাদিকৰ সৈতে হোৱা বাৰ্তালাপত কাৰবি আংলং জিলা আৰক্ষী অধীক্ষক সঞ্জীৱ কুমাৰ শইকীয়াই কয়যে লাহৰিজানত এক গোপন খবৰৰ ভিত্তিত এখন ঘৰত তালাচী চলাওতে মাৰাত্মক ড্ৰাগছ খিনি উদ্ধাৰ হয় ৷
কিন্ত্ত কৰ্তব্যৰত আৰক্ষীক ইটাৰে আক্ৰমন কৰি আৰক্ষীৰ পৰা বন্দুক কাঢ়িবলে চেষ্টা কৰাৰ সময়তে আৰক্ষীয়ে বাধ্য হৈ মূল ড্ৰাগছ ব্যৱসায়ী শ্বাহীদ হুছেইনৰ ভৰিত গুলীয়াই জখম কৰে ৷ জখমী ছাহীদ হুছেইনক আৰক্ষীয়ে ততাতয়াকৈ ডিফ চিকিৎসা মহাবিদ্যালয়লৈ চিকিৎসাৰ বাবে প্ৰেৰণ কৰে বুলি জানিব পৰা গৈছে ৷ ইয়াৰোপৰি ঘৰখনৰ পৰা আৰক্ষীয়ে এটা ক’ফিনো উদ্ধাৰ কৰিছে বুলি জানিব পৰা গৈছে ৷ আৰক্ষীৰ সূত্ৰ অনুসৰি ছাহীদ হুছেইনে পূৰ্বে খটখটী থানাৰ এনডিপিএছ এক্টৰ ১০০/২০২১ নম্বৰত গোছৰত জেললৈ যাব লগীয়া হৈছিল বুলি জানিব পৰা গৈছে ৷
