মণিপুৰত (Manipur) দুগৰাকী মহিলাক উলংগ কৰি ৰাজপথত ঘূৰোৱাৰ ভিডিঅ’ আৰু দলবদ্ধ ধৰ্ষণৰ অভিযোগত সমগ্ৰ দেশজুৰি তীব্ৰ বিতৰ্ক আৰু প্ৰতিক্ৰিয়াৰ সৃষ্টি কৰিছে। তেনে সময়তে মুখ্যমন্ত্ৰী এন বীৰেন সিঙৰ পদত্যাগৰক লৈও পুনৰ চৰ্চা হৈছে। অৱশ্যে বিজেপিৰ এক সূত্ৰ মতে, বীৰেন সিঙক আঁতৰোৱাৰ কোনো চিন্তা বৰ্তমান নাই।
তাৰ পৰিৱৰ্তে কেন্দ্ৰীয় গৃহ মন্ত্ৰালয়ে বীৰেন সিঙক মুখ্যমন্ত্ৰী পদত ৰাখি কুকিকে ধৰি পাহাৰীয়া জনজাতিসকলৰ আস্থা গঢ়ি তোলাৰ চেষ্টা আৰম্ভ কৰাৰ সিদ্ধান্ত লয়। দলটোৰ এক সূত্ৰ মতে, নাৰী নিৰ্যাতনৰ সেই ঘটনা সংঘটিত হোৱা ৭৭ দিনৰ পাছতো আৰক্ষীয়ে কিয় কোনো ব্যৱস্থা গ্ৰহণ নকৰিলে সেই সন্দৰ্ভত বীৰেনক কৈফিয়ত তলব কৰা হ’ব পাৰে।
উল্লেখযোগ্য যে মণিপুৰত প্ৰায় তিনিমাহ ধৰি চলি থকা হিংসাত্মক পৰিস্থিতিত মুখ্যমন্ত্ৰী বীৰেনৰ ভূমিকা সন্দৰ্ভত প্ৰশ্ন উত্থাপিত হৈছে। কেৱল কুকি, জোৰ দৰে খ্ৰীষ্টান জনজাতীয় সংগঠনেই নহয়, তেওঁৰ স্বজাতি হিন্দু মেইটেইসকলেও এই ক্ষেত্ৰত মুখ খুলিছে। বিগত সময়ছোৱাৰ সাম্প্ৰদায়িক হিংসাক বীৰেন সিং চৰকাৰে চম্ভালি লোৱাৰ ক্ষেত্ৰত সম্পূৰ্ণ পক্ষপাতদুষ্ট বুলি অভিযোগ উত্থাপন কৰিছে কুকিকে ধৰি জনজাতীয় সংগঠনে।
মণিপুৰ চৰকাৰে জনজাতীয় বসতিপ্ৰধান পাহাৰীয়া অঞ্চলৰ নিৰাপত্তাৰ বিষয়টোক অৱহেলা কৰাৰ অভিযোগ উত্থাপন কৰি তেওঁলোকে অঞ্চলটোত ‘পৃথক প্ৰশাসন’ৰ দাবী জনাইছে। আনহাতে, ৰাজধানী ইম্ফলকে ধৰি ভৈয়ামৰ গৰিষ্ঠসংখ্যক মেইটেইসকলে অভিযোগ কৰে যে ম্যানমাৰৰ সীমান্তৰ সিপাৰে আক্ৰমণ কৰা কুকি উগ্ৰপন্থীৰ বিৰুদ্ধে বীৰেনৰ আৰক্ষীয়ে সময়মতে ব্যৱস্থা গ্ৰহণ কৰা নাই ।
এনে পৰিস্থিতিত কিছুদিন ধৰি জল্পনা-কল্পনা চলি আছিল যে বীৰেনক মুখ্যমন্ত্ৰীৰ পদৰ পৰা অপসাৰণ কৰা হʼব পাৰে। বিজেপিৰ এক সূত্ৰৰ মতে, কেন্দ্ৰীয় গৃহমন্ত্ৰী অমিত শ্বাহৰ মণিপুৰ ভ্ৰমণৰ সময়তো এই বিষয়ত আলোচনা হৈছিল।
বিজেপিৰ প্ৰভাৱশালী বিধায়ক থংগাম বিশ্বজিৎ সিং, ৰঘুমণি সিং আৰু সংসদীয় দলৰ বহু সদস্যই দলৰ ভিতৰত বীৰেনৰ নেতৃত্বৰ প্ৰতি অনাস্থা প্ৰকাশ কৰে। এই পৰিস্থিতিত তেওঁৰ পদত্যাগৰ সম্ভাৱনাক কেন্দ্ৰ কৰি ইম্ফলত এখন নতুন ‘নাটক’ দেখা গৈছিল। বীৰেনে পদত্যাগ পত্ৰ লৈ ৰাজভৱনলৈ ৰাওনা হয়।
কিন্তু বাটত তেওঁ কয় যে সমৰ্থক আৰু অনুগামীৰ হেঁচাত সিদ্ধান্ত পুনৰ বিবেচনা কৰিব। আনকি তেওঁ ৰাজ্যপালৰ ওচৰত জমা দিবলৈ লোৱা পদত্যাগ পত্ৰখনো ফালি পেলোৱা হয়।
