সোমবাৰৰ পৰা পাঁচদিনীয়া কাৰ্যসূচীৰে আৰম্ভ হোৱা অসম বিধানসভাৰ শৰৎকালীন অধিবেশনৰ (Autumn Session of Assam Legislative Assembly) শুকুৰবাৰে অন্ত পৰে । অসম বিধানসভাৰ নৱনিৰ্মিত ভৱনত প্ৰথমবাৰ বাবে অনুষ্ঠিত এই অধিবেশনত তিনিদিন চৰকাৰী আৰু দুদিন বেচৰকাৰী কাৰ্যসূৰ্যচী ৰখা হয়। উল্লেখ্য যে এইবাৰৰ বিধানসভাৰ অধিবেশন মুখ্যমন্ত্ৰীৰ পত্নীৰ ভূমি কেলেংকাৰীক লৈ উত্তাল হৈ থাকে। তাৰ মাজতে বিধায়ক অখিল গগৈয়েও বিধানসভাত সৰৱ হোৱা দেখা যায় ।
আনহাতে, শুকুৰবাৰে প্ৰশ্নোত্তৰৰ শিতানেৰে আৰম্ভ হোৱা বিধানসভা অধিবেশনৰ অন্তিমদিনা স্বাস্থ্য আৰু পৰিয়াল কল্যাণ, বিজ্ঞান প্ৰযুক্তি আৰু জলবায়ু পৰিৱৰ্তন, ৰাজহ আৰু দুৰ্যোগ ব্যৱস্থাপনা, খনি আৰু খনিজাত, ভূমি সংৰক্ষণ, তথ্য-প্ৰযুক্তি, জলসিঞ্চন, পাহাৰীয়া এলেকা, হস্ততাঁত আৰু বস্ত্ৰশিল্প, গৃহ আৰু নগৰ উন্নয়ন পৰিক্ৰমা, চিকিৎসা শিক্ষা আৰু গৱেষণা আদি বিভাগৰ প্ৰশ্নোত্তৰ সদনত দাখিল কৰা হয় ।
উল্লেখ্য যে পাচঁদিনীয়া বিধানসভাৰ শৰৎকালীন অধিবেশনত ২৬ খন গুৰুত্বপূৰ্ণ বিধেয়ক গৃহীত হয় । ইয়াৰ উপৰি এখন বেচৰকাৰী বিধেয়কৰ ওপৰতো আলোচনা হয় ।
শৰৎকালীন অধিবেশনৰ অন্তিমদিনা মন্ত্ৰী পীযুষ হাজৰীকাই উত্থাপন কৰা The Assam Backward Classes Commission (Amendment) Bill 2023, ৰণোজ পেগুৱে The Assam Repealing Bill-2023, সঞ্জয় কিষাণে উত্থাপন কৰা The Assam Gratuity (Amendment) Bill-2023 আৰু The Assam Plantation Provident Fund and Pension Fund and Deposit Insurance Link Scheme (Amendment) Bill-2023 গৃহীত কৰা হয় ।
আনহাতে, বিধানসভাৰ অধ্যক্ষই পাঁচখন কমিটী গঠনত অনুমোদন জনায় । বিধায়ক নুৰুল হুদাৰ সভাপতিত্বত গঠন কৰা চৰকাৰী হিচাপ কমিটী, বিধায়ক প্ৰশান্ত ফুকনৰ সভাপতিত্বত প্ৰাক্কলন কমিটী, বিধায়ক ৰমেন্দ্ৰ নাৰায়ণ কলিতাৰ সভাপতিত্বত ৰাজহুৱা উদ্যোগসমূহৰ কমিটী, বিধায়ক ভুৱন পেগুৰ সভাপতিত্বত অনুসূচিত জাতি আৰু জনজাতি কল্যাণ কমিটী আৰু বিধায়ক ৰঞ্জিত দত্তৰ সভাপতিত্বত অ’বিচি আৰু অ’অ’বিচি কল্যাণ সমিতিক বিধানসভাৰ অধ্যক্ষই অনুমোদন জনায়।
