কাৰবি আংলং (Karbi Anglong) জিলাৰ অসম-নাগালেণ্ড সীমান্তৰ ধনশিৰিত বুজন পৰিমাণৰ সন্দেহযুক্ত হেৰ’ইনসহ (Suspected heroin seized in Dhansiri) এগৰাকী মহিলা সৰবৰাহকাৰী আটক (Woman trafficker arrested) হোৱা ঘটনাত তীব্ৰ চাঞ্চল্যৰ সৃষ্টি হৈছে৷
আজি ডিফু আৰক্ষীৰ পৰা প্ৰাপ্ত খবৰ অনুসৰি শুকুৰবাৰে কাৰবি আংলং জিলা আৰক্ষীৰ অতিৰিক্ত জিলা আৰক্ষী অধীক্ষক (নিৰাপত্তা)ৰ পৰা লাভ কৰা এক গোপন খবৰৰ ভিত্তিত জিলা উপ-আৰক্ষী অধীক্ষকৰ নেতৃত্বত ডিফু থানাৰ অ’চি, ধনশিৰি আৰক্ষী চকীৰ ভাৰপ্ৰাপ্ত বিষয়া আৰু থানা ষ্টাফৰ সহযোগত ডিমাপুৰৰ মহিলাক ধনশুৰি ৰে’ল ষ্টেচনত তালাচী চলাই মহিলাগৰাকীয়ে পিন্ধি থকা অন্তৰ্ৱাসত লুকুৱাই ৰখা অৱস্থাত ১২ চাবোনৰ বাকচৰ পৰা ১৩৮.৫৫ গ্ৰাম সন্দেহযুক্ত হেৰ’ইন উদ্ধাৰ (138.55 gm suspected heroin recovered) কৰিবলৈ সক্ষম হয়৷
সন্দেহযুক্ত হেৰ’ইনখিনি নিৰপেক্ষ সাক্ষীৰ সাক্ষাতে জব্দ কৰা হয়৷ আৰক্ষীয়ে সন্দেহযুক্ত হেৰ’ইন সৰবৰাহৰ লগত জৰিত নগাওঁ জিলাৰ ৰহা থানা এলেকাৰ কচু ধৰা গাঁৱৰ লম্বিট নাথৰ জীয়েক জুনমনি দেৱী (২৫)ক আটক কৰে৷ এই সন্দৰ্ভত ধনশিৰি আৰক্ষী চকীত ২২ ছেপ্টেম্বৰ ২০২৩ত ৩৯৪ নম্বৰত দৈনিক পঞ্জী দৰজ দি ডিফু থানাত এক গোচৰ ৰুজো দিয়া হব বুলিও বুলি আৰক্ষীৰ সূত্ৰত প্ৰকাশ৷ অধিক তথ্য সংগ্ৰহ কৰাৰ বাবে ধৃত মহিলাগৰাকীক আৰক্ষীয়ে জেৰা অব্যাহত ৰাখিছে বুলি জানিব পৰা গৈছে৷
