বৰ্তমান ভাৰতৰ লগতে সমগ্ৰ বিশ্বৰ ক্ৰিকেট অনুৰাগী ক্ৰিকেট জ্বৰত আক্ৰান্ত হৈছে। কিয়নো ৫ অক্টোবৰৰ পৰা ভাৰতত অনুষ্ঠিত হ’ব এদিনীয়া বিশ্বকাপ ক্ৰিকেট (ODI World Cup Cricket) । কিন্তু বিশ্বকাপ আৰম্ভ হোৱাৰ দুদিন পূৰ্বে উদ্বোধনী অনুষ্ঠান (Opening ceremony) বাতিল কৰাৰ খবৰ ওলাইছে। উল্লেখযোগ্য যে অহা ৪ অক্টোবৰ, অৰ্থাৎ বুধবাৰে আহমেদাবাদৰ নৰেন্দ্ৰ মোডী ষ্টেডিয়ামত (Narendra Modi Stadium in Ahmedabad) এক বৃহৎ উদ্বোধনী অনুষ্ঠান অনুষ্ঠিত হোৱাৰ কথা আছিল।
তাত আশা ভোছলে, ৰণবীৰ সিং, অৰিজিত সিং, শ্ৰেয়া ঘোষাল, শংকৰ মহাদেৱন, বৰুণ ধাৱন, তমন্না ভাটিয়াকে ধৰি বিভিন্ন তাৰকাই অনুষ্ঠান পৰিবেশন কৰাৰ কথা আছিল। বিশ্বকাপ আৰম্ভ হোৱাৰ আগদিনা এই অনুষ্ঠানটো বৃহৎ পৰিসৰত অনুষ্ঠিত কৰিবলৈ বাছি লোৱা হৈছিল। সাধাৰণতে বিশ্বকাপৰ প্ৰথমখন খেল আৰম্ভ হোৱাৰ পূৰ্বে উদ্বোধনী অনুষ্ঠান অনুষ্ঠিত হয়। কিন্তু দুপৰীয়া ২ বজাৰ পৰা খেল আৰম্ভ হোৱাৰ বাবে বিচিচিআয়ে এদিন পূৰ্বে উদ্বোধনী অনুষ্ঠান অনুষ্ঠিত কৰাৰ সিদ্ধান্ত লয়। বিশ্বকাপৰ প্ৰথমখন মেচৰ আগদিনা অধিনায়কসকলৰ বৈঠক অনুষ্ঠিত হোৱাৰ কথা।
তাৰপিছত অনুষ্ঠিত হʼবলগীয়া আছিল মহা মুকলি অনুষ্ঠান। কিন্তু হঠাৎ শুনা গৈছে যে অনুষ্ঠান বাতিল কৰা হৈছে। তাৰ পৰিৱৰ্তে সামৰণি অনুষ্ঠানৰ আয়োজন কৰা হʼব। তাৰকাৰে ভৰা এই গ্ৰেণ্ড ইভেণ্টৰ পৰিৱৰ্তে লেজাৰ শ্ব’ৰ জৰিয়তে বিশ্বকাপৰ উদ্বোধন কৰা হʼব। বুধবাৰে এই শ্ব’ৰ জৰিয়তে উদ্বোধন কৰা হʼব বিশ্বকাপ ২০২৩।
আনহাতে, ১৯ নৱেম্বৰত অনুষ্ঠিত হʼবলগীয়া বিশ্বকাপৰ ফাইনেলৰ পূৰ্বে সামৰণি অনুষ্ঠান অনুষ্ঠিত হোৱাৰ সম্ভাৱনা আছে। ভাৰত-পাকিস্তানৰ মেচৰ পূৰ্বেও ইভেণ্টৰ সম্ভাৱনা আছে। কিন্তু সেই বিষয়ে এতিয়াও একো নিশ্চিত হোৱা নাই। আনুষ্ঠানিকভাৱে কোনো কথা ঘোষণা কৰা নাই বিচিচিআই বা আইচিচিয়ে।
