সোণালী জয়ন্তী বৰ্ষত ভৰি দিলে উত্তৰ-পূৰ্বাঞ্চলৰ সৰ্ববৃহৎ যুৱ মহোৎসৱ কাৰ্বি যুৱ মহোৎসৱ (Karbi Youth Festival)। এইবাৰ কাৰ্বি যুৱ মহোৎসৱলৈ আমন্ত্ৰণ জনোৱা হৈছে দেশৰ ৰাষ্ট্ৰপতি দ্ৰৌপদী মুৰ্মুক। আজি তাৰালাংছ’ৰ যুৱ মহোৎসৱস্থলী কাৰ্বি পিপুলছ হলত সোণালী জয়ন্তী উদযাপনৰ (Celebration of Golden Jubilee) বাবে অভ্যৰ্থনা সমিতি গঠন কৰা হয়।
কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, সাংসদ হৰেণ ছিং বে,’ কাৰ্বি কালাচাৰেল চছাইটিৰ সভাপতি চন্দ্ৰছিং ক্ৰ, ‘বিধায়ক বিদ্যাছিং ইংলেং, দৰছিং ৰংহাং, প্ৰাক্তন মন্ত্ৰী হলিৰাম তেৰাং, বিশিষ্ট কাৰ্বি লেখক-গৱেষক লুঞ্চে তিমুং, কাৰ্বি লাম্মেত আমেই (সাহিত্য সভা), বিভিন্ন সামাজিক সংগঠনৰ প্ৰতিনিধি উপস্থিত থকা এখন গাম্ভীৰ্য্যেপূৰ্ণ সভাৰ জৰিয়তে সোণালী জয়ন্তী উদযাপন বাবে এখন শক্তিশালী অভ্যৰ্থনা সমিতি গঠন কৰা হয়। ডিফুৰ বিধায়ক বিদ্যাছিং ইংলেং আৰু কাৰ্বি আংলং স্বায়ত্বশাসিত পৰিষদৰ শিক্ষা বিভাগৰ কাৰ্যবাহী সদস্য ৰিচাৰ্ড টকবীৰ ক্ৰমে অভ্যৰ্থনা সমিতিৰ সভাপতি আৰু সম্পাদকৰূপে নিৰ্বাচিত কৰা হয়।
উল্লেখযোগ্য যে প্ৰতি বছৰৰ ১৪ ফেব্ৰুৱাৰীৰ পৰা অনুষ্ঠিত হোৱা কাৰ্বি যুৱ মহোৎসৱ এইবাৰ ১২ জানুৱাৰীৰ পৰা ১৯ জানুৱাৰীলৈ সপ্তাহজুৰি অনুষ্ঠিত হ’ব। সমাগত লোকসভা নিৰ্বাচনৰ প্ৰতি লক্ষ্য ৰাখি এইবাৰ যুৱ মহোৎসৱ আগুৱাই অনা হৈছে। মুখ্য কাৰ্যবাহী সদস্য তুলিৰাম ৰংহাঙে সংবাদমাধ্যমৰ আগত প্ৰকাশ কৰা অনুসৰি এইবাৰ মহোৎসৱত দেশৰ ৰাষ্ট্ৰপতি মুখ্য অতিথি ৰূপে উপস্থিত থাকিব। সোণালী জয়ন্তী বৰ্ষ উদযাপনৰ বাবে ৩ৰ পৰা ৪ কোটি টকা বাজেট ধাৰ্য কৰা হ’ব বুলিও তেওঁ প্ৰকাশ কৰে। সকলো জাতি-জনগোষ্ঠীক একত্ৰিত হৈ এই যুৱ মহোৎসৱ সাফল্যমণ্ডিত কৰি তুলিবলৈ ৰংহাঙে সকলোকে আহ্বান জনায়৷
