ASSAM TIMES POST
বিশেষ প্ৰতিবেদন
যোৱা ১৫ ডিচেম্বৰত ভাৰত-জাপান দ্বিপাক্ষিক সন্মিলন অনুষ্ঠিত হোৱাৰ কথা আছিল গুৱাহাটীত৷ কিন্তু অসমৰ সাম্প্ৰতিক পৰিস্থিতিৰ বাবে জাপানৰ প্ৰধান মন্ত্ৰী ছিজো আবেৰ অসম ভ্ৰমণ কাৰ্যসূচী বাতিল কৰিছিল জাপান চৰকাৰে৷
কিন্তু সাম্প্ৰতিক পৰিস্থিতি সত্ত্বেও অসম ভ্ৰমণৰ কাৰ্যসূচী বাতিল কৰা নাছিল জাপানৰ এহাল দম্পতিয়ে৷ অৱশ্যে জাপানৰ প্ৰধান মন্ত্ৰীৰ ভ্ৰমণ কাৰ্যসূচীৰ লগতে এওঁলোকৰ ভ্ৰমণৰ কোনো সম্পৰ্ক নাই৷ এওঁলোক হ’ল পৰ্যটক৷ জাপানৰ য়ামাগুচিৰ বাসিন্দা হিৰোছি ফুজিটাই নিজৰ পত্নী আৰু দুই সন্তানক লৈ ২২ ডিচেম্বৰত কলকাতাৰ পৰা আহে অসমলৈ৷ উদ্দেশ্য অসমৰ পৰা চাহগছ সংগ্ৰহ কৰি নিজৰ চাহ বাগানত সংৰোপণ কৰা৷
কিন্তু অসমলৈ আহি যে ইমান সমস্যাত পৰিব তাক ভবা নাছিল তেওঁলোকে৷ কিয়নো সংশোধিত নাগৰিকত্ব আইন বাতিলৰ আন্দোলনৰ উত্তাপত উত্তাপিত হৈ আছে বৰ্তমান সমগ্ৰ ৰাজ্যখন৷ ইয়াৰ মাজতে অসমৰ মাটিত ভৰি থৈ প্ৰথম খোজতে পৰে বিপৰ্যয়ত৷ কিয়নো তেওঁলোকে অনলাইনত যি হোটেল বুকিং কৰিছিল, বহু বিচাৰিও তেনে কোনো হোটেলৰ সন্ধানেই নাপালে যোৰহাটৰ আটিলাগাঁৱত৷ তাৰ উপৰি লগত নাছিল পৰ্যাপ্ত ভাৰতীয় মুদ্ৰা৷ বিদেশী মুদ্ৰা ভঙাবৰ বাবেও উপায় পোৱা নাছিল আন্দোলনত উত্তপ্ত উজনি অসমত৷ আনহাতে, স্থানীয় দোকানসমূহতো তেওঁলোকৰ লগত থকা আন্তঃৰাষ্ট্ৰীয় ডেবিট বা ক্ৰেডিট কাৰ্ডৰ ব্যৱস্থা নাছিল৷ ফলত দুই সন্তানসহ সোমবাৰে দিনটো একো খাব পোৱা নাছিল ফুজিটা দম্পতিয়ে৷
উপায় নাপায় ৰাস্তাৰ কাষত বহি থকা বিদেশী পৰিয়ালটোক দেখি আগবাঢ়ি আহে স্থানীয় দুই যুৱক ব্ৰজকমল গৌতম আৰু দীপজ্যোতি দাস৷ প্ৰথমতে তেওঁলোকে চাৰিওজনকে এখন ৰেষ্টুৰেণ্টলৈ নি খোৱা-লোৱাৰ ব্যৱস্থা কৰি দিয়ে৷ কাম চলাবৰ বাবে হিৰোছিৰ হাতত তুলি দিয়ে কিছু নগদ ভাৰতীয় টকা৷ যোগাযোগ কৰে স্থানীয় আৰক্ষী-প্ৰশাসনৰ সৈতে৷ উপায়ুক্তৰ উদ্যোগত পৰিয়ালটোৰ থকা-খোৱাৰ ব্যৱস্থা কৰা হয়৷ লগতে বেংকৰ সৈতে যোগাযোগ কৰি মুদ্ৰা পৰিৱৰ্তনৰ ব্যৱস্থাও কৰি দিয়ে৷
আৰম্ভণিৰ বিপৰ্যয় ৰুধি অসমবাসীৰ মানৱীয়তাত মুগ্ধ হয় ফুজিটা পৰিয়াল৷ লগতে প্ৰশংসাৰে উপচায় পেলায় দুই যুৱকক৷
