পশ্চিম কাৰবি আংলঙ জিলাৰ ডংকা ৰাজহ চক্ৰৰ অধীনৰ খেৰণিত পিজিআৰ আৰু ভিজিআৰ ভূমিত (PGR-VGR Land) বসতি উচ্ছেদ (Eviction of settlements) কৰাকলৈ কাৰবি আংলং স্বায়ত্তশাসিত পৰিষদে গ্ৰহণ কৰা স্থিতিকলৈ অসম বিধানসভাত বিৰোধী দলপতি দেৱব্ৰত শইকীয়াই চৰকাৰৰ ওচৰত উত্থাপন কৰা দাবীক কেন্দ্ৰ কৰি কাৰবি আংলং জিলাত বিভিন্ন দল-সংগঠনে প্ৰতিবাদ সাব্যস্ত কৰিছিল৷ পিজিআৰ-ভিজিআৰ ভূমি আৰু দেৱব্ৰত শইকীয়াৰ সদনৰ বক্তব্য (Speech of The House of Debabrata Saikia) সন্দৰ্ভত আজি ডিফুত কাৰবি আংলং জিলা প্ৰেছ ক্লাৱত দুয়োখন জিলাৰ কংগ্ৰেছ নেতৃত্বই এখন যৌথ সংবাদমেল সম্বোধন কৰে৷
সংবাদমেল যোগে কাৰবি আংলং জিলা কংগ্ৰেছৰ (Karbi Anglong District Congress) কাৰ্যকৰী সভাপতি অশোক টেৰণে কয় যে, পিজিআৰ-ভিজিআৰ ভূমি সম্পৰ্কে কাৰবি আংলং স্বায়ত্তশাসিত পৰিষদে আহ্বান কৰা সৰ্বদলীয় সভাত আমিও উপস্থিত আছিলো আৰু সকলো দল-সংগঠনে গ্ৰহণ কৰা সিদ্ধান্তত ঐক্যমত পোষণ কৰিছিলো৷ আমি আমাৰ স্থিতিত অটল আছো আৰু পিজিআৰ-ভিজিআৰ ভূমিত উচ্ছেদৰ সপক্ষে আছো৷
আনহাতে প্ৰদেশ কংগ্ৰেছৰ মুখপাত্ৰ মোহন ৰংপিয়ে দেৱব্ৰত শইকীয়াৰ বক্তব্যৰ ভুল বাখ্যা আগবঢ়োৱা বুলি মন্তব্য কৰে ৷ ৰংপিয়ে কয় যে, বিৰোধী নেতাগৰাকীয়ে সদনত পৰিষদৰ মুখ্য বিৰোধী দলপতি দেৱব্ৰত শইকীয়াৰ ভিজিআৰ-পিজিআৰ বক্তব্য সন্দৰ্ভত স্পষ্টীকৰণ কাৰবি আংলং জিলা কংগ্ৰেছৰ কাৰ্যবাহী সদস্য তুলিৰাম ৰংহাঙে পিজিআৰ-ভিজিআৰ ভূমিত উন্নয়ণমূলক আঁচনি উদ্ধোধন কৰি এই ভূমিত কোনো উচ্ছেদ চলোৱা নহয় বুলি কৰা মন্তব্যৰ উদ্ধৃতি দি বিজেপি নেতৃত্বাধীন পৰিষদখনে হঠাত উচ্ছেদ চলোৱাৰ সিদ্ধান্তৰ বিষয়েহে প্ৰশ্ন উত্থাপন কৰিছিল৷
ইয়াৰ লগতে পিজিআৰ-ভিজিআৰ ভূমিৰ পৰা উচ্ছেদিত সকলক ক’ত পুনৰ সংস্থাপন কৰা হব সেই প্ৰশ্নহে উত্থাপন কৰিছিল কাৰণ উক্ত ভূমিত দীৰ্ঘকাল ধৰি বসবাস কৰি থকাসকল ভাৰতীয় নাগৰিক আৰু উচ্চতম ন্যায়ালয়ে পিজিআৰ-ভিজিআৰ ভূমিত উচ্ছেদিতসকলক পুণৰ সংস্থাপনৰ কথাও আদেশত উল্লেখ কৰিছিল৷ ৰাইজৰ প্ৰতিনিধি ৰাজনৈতিক দলৰ নেতা হিছাপে ভাৰতীয় নাগৰিকৰ পুণৰ সংস্থাপনৰ বিষয়ে প্ৰশ্ন কৰাৰ অধিকাৰ আছে বুলি ৰংপিয়ে উভতি ধৰে৷ এই সন্দৰ্ভত ৰাজনীতি নকৰি যুগ যুগ ধৰি উক্ত স্থানত বসবাস কৰি অহা ভাৰতীয়সকলৰ পুনৰ সংস্থাপনৰ বিষয়টো গুৰুত্ব সহকাৰে লবলৈ কাৰবি আংলং স্বায়ত্তশাসিত পৰিষদ আৰু অসম চৰকাৰক আহ্বান জনায়৷
