বিশেষ প্ৰতিবেদন
আমি বহুতেই মধুৰিআম ফলবিধ আৰু ইয়াৰ স্বাস্থ্যৰ উপকাৰিতাৰ বিষয়ে জানো৷ কিন্তু আমি বেছিভাগেই মধুৰিআমৰ স্বাস্থ্যকৰ গুণ সম্পৰ্কত সজাগ নহয়৷ মধুৰিআমৰ পাত ঔষধি গুণ বিশিষ্ট আৰু ইয়াৰ পৰা আমাৰ শৰীৰৰ যথেষ্ট উপকাৰ পাব পাৰো৷
মধুৰিআমৰ পাতত প্ৰচুৰ পৰিমাণৰ এণ্টিঅক্সিডেণ্টছ আৰু এষ্ট্ৰিনজেণ্ট মৌল আছে৷ তলত মধুৰিআমৰ পাতৰ ৮টা স্বাস্থ্যৰ বাবে উপকাৰি বিশেষ গুণৰ কথা উল্লেখ কৰা হ’ল৷
(১) ডায়েৰিয়া বা পেটচলা ৰোগৰ চিকিৎসা : যদি এগৰাকী লোক ডায়েৰিয়াত আক্ৰান্ত হয়, তেতিয়াহ’লে একাপ মধুৰিআমৰ পাতৰ ৰস, মধুৰিআমৰ পাত থেতেলিয়াই বা একাপ গৰম পানীত পাত সিজাই সেৱন কৰিলে ডায়েৰিয়া বা পেটচলা ৰোগৰ পৰা উপশম পাব পাৰি৷ এক অধ্যয়নৰ পৰা পোৱা তথ্য মতে, মধুৰিআমৰ পাতত ডায়েৰিয়া প্ৰতিৰোধী গুণ আছে৷
(২) মেদবহুলতা নিয়ন্ত্ৰণ : মধুৰিআমৰ পাতৰ নিৰ্যাসেই ওজন কমোৱাত সহায় কৰে৷ লগতে ষ্টাৰ্চ (Starch) ক শৰ্কৰা (Sugar)লৈ পৰিৱৰ্তনত বাধা দিয়ে৷
(৩) কলেষ্টেৰল কমায় : Nutrition and Metabolism নামৰ স্বাস্থ্য বিষয়ক আলোচনীখনত প্ৰকাশ পোৱা এক অধ্যয়ন মতে মধুৰিআমৰ পাতৰ নিৰ্যাস মাহ ধৰি ব্যৱহাৰ কৰিলে কলেষ্টেৰল কমে আৰু কোনো ধৰণৰ পাৰ্শ্বক্ৰিয়া নোহোৱাকৈ ট্ৰাইগ্লিচাৰাইড হয়৷
(৪) কেন্সাৰ প্ৰতিৰোধ : মধুৰিআমৰ পাতত প্ৰচুৰ পৰিমাণৰ লাইকোপিন (Lycopene) থাকে, যাৰ কেন্সাৰৰ বিপক্ষে যুঁজিব পৰা গুণ আছে আৰু স্তন কেন্সাৰ, প্ৰোষ্টেট কেন্সাৰ আৰু মুখমণ্ডলৰ কেন্সাৰৰ বিপক্ষে যুঁজিব পাৰে৷ এক গৱেষণা মতে মধুৰিআমৰ পাতৰ এণ্ড্ৰ’জেন উৎপাদনকাৰী প্ৰক্ৰিয়াক বাধা দিব পৰা ক্ষমতা আছে৷ উল্লেখ্য যে এণ্ড্ৰ’জেন হৈছে এক পুৰুষ হৰমন যিটো হৰমন প্ৰোষ্টেট কেন্সাৰৰ কিছু প্ৰকাৰৰ কেন্সাৰ কোষ বিকাশত সহায় কৰে৷
মধুৰিআমৰ পাতৰ আন এক সক্ষমতা হ’ল ইয়াৰ নিৰ্যাসেৰে গেষ্ট্ৰিক কেন্সাৰৰ ৰোগীক চিকিৎসা কৰিব পাৰি৷ মধুৰিআমৰ পাতত কোৱাৰচেটিন, লাইকোপিন আৰু ভিটামিন-চি থাকে, যিবোৰৰ কেন্সাৰ প্ৰতিৰোধী আৰু টিউমাৰ প্ৰতিৰোধী গুণ আছে৷
(৫) ডায়েবেটিছ নিয়ন্ত্ৰণ : মধুৰিআম পাতৰ চাহ ডায়েবেটিছ ৰোগীৰ বাবে উপকাৰী হিচাপে বিবেচনা কৰা হয়৷ Nutrition and Metabolism আলোচনীত প্ৰকাশ পোৱা এক অধ্যয়নৰ তথ্য মতে, মধুৰিআম পাতৰ নিৰ্যাসে টাইপ-২ প্ৰকাৰৰ ডায়েবেটিছ ৰোগ সৃষ্টিক প্ৰতিৰোধ কৰিব পাৰে৷
৬) মুখৰ ৰোগৰ চিকিৎসা : এণ্টি-ইনফ্লেমেট’ৰী আৰু এণ্টি-বেক্টেৰিয়েল গুণৰ বাবে মধুৰিআমৰ পাতে দাঁত আৰু মুখৰ সমস্যাৰ পৰা সুৰক্ষা প্ৰদান কৰিব পাৰে৷
(৭) ডেংগুৰ পৰা সকাহ : ডেংগু জ্বৰত আক্ৰান্ত এগৰাকী ব্যক্তিৰ শৰীৰত তেজৰ পৰিমাণ কমি যায়৷ সেয়েহে এইক্ষেত্ৰত প্লেটিলেট বৃদ্ধিৰ বাবে মধুৰিআমৰ পাতক এক উত্তম পন্থা হিচাপে বিবেচিত কৰিব পাৰি৷ লগতে মধুৰিআমৰ পাতে ৰক্তক্ষৰণ বন্ধ কৰাত সহায় কৰে বুলিও ‘নেচাৰেল মেডিচিনছ’ নামৰ এখন স্বাস্থ্য আলোচনীত প্ৰকাশিত এক গৱেষণাত প্ৰকাশ৷
(৮) ছাল আৰু চুলিৰ সুস্বাস্থ্যৰ বাবে মধুৰিআমৰ পাত : মধুৰিআমৰ পাতে মুখমণ্ডলত পৰা ক’লা দাগ কম কৰে আৰু শালমইনা নোহোৱা কৰে৷ মধুৰিআমৰ পাত চুলিৰ বৃদ্ধিৰ বাবেও অতি উপকাৰী৷
