ASSAM TIMES POST
বিশেষ প্ৰতিনিধি
কাৰ্যত যেন দুটা শিবিৰত বিভক্ত হৈ অগপৰ ভাঙোন নিশ্চিত হ’বলৈ আগবাঢ়ি আছে৷ ইয়াৰ উমান কিছুদিন পূৰ্বেই পোৱা গৈছিল যদিও আজি যেন ছবিখন অধিক স্পষ্ট হৈ পৰে৷ কিয়নো প্ৰাক্তন মুখ্য মন্ত্ৰী তথা অগপৰ মুখ্য প্ৰতিষ্ঠাপক প্ৰফুল্ল কুমাৰ মহন্তৰ যেন এতিয়া নাই অগপৰ মুখ্য কাৰ্যালয়ত প্ৰৱেশৰ অধিকাৰ৷ এক প্ৰকাৰ দলৰ পৰা এলাগী কৰি অতুল বৰা বাহিনীয়ে চূড়ান্ত একনায়কত্ববাদেৰে চলাই নিছে দলৰ কাম-কাজ৷ আনহাতে, এতিয়া মুখ্য কাৰ্যালয়ৰ সকলো দায়িত্বও অৰ্পণ কৰা হৈছে নিৰাপত্তাৰক্ষীৰ হাতত৷
উল্লেখ্য যে আজি প্ৰফুল্ল কুমাৰ মহন্তৰ সমৰ্থকেৰে দলৰ বৰ্তমানৰ নেতৃত্বৰ বিৰুদ্ধে বৈঠক হোৱা কথা আছিল আমবাৰীৰ কাৰ্যালয়ত। কিন্তু আৰক্ষীয়ে প্ৰফুল্ল কুমাৰ মহন্তক দলৰ কাৰ্যালয়ত বৈঠক অনুষ্ঠিত কৰিবলৈ নিদিয়ে।
ফলত বৈঠকখন অনুষ্ঠিত কৰা হয় অসম সাহিত্য সভাৰ ভাগৱতী প্ৰসাদ বৰুৱা ভৱনত। প্ৰফুল্ল কুমাৰ মহন্ত ফৈদৰ অভিযোগ, অতুল বৰাৰ নেতৃত্বতে চক্ৰান্ত কৰি বৈঠকখন দলৰ কাৰ্যালয়ত অনুষ্ঠিত কৰিবলৈ দিয়া নহল। কাৰ্যালয়ৰ তিনিওখন প্ৰৱেশদ্বাৰত লগাই দিয়া হয় তলা, যাতে কোনো প্ৰকাৰে প্ৰফুল্ল কুমাৰ মহন্তৰ ফৈদে মুখ্য কাৰ্যালয়ৰ ভিতৰত নেতৃত্বৰ বিৰুদ্ধে বৈঠক অনুষ্ঠিত কৰিব নোৱাৰে।
আনহাতে, আজিৰ বৈঠকত উপস্থিত থাকে প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, বিধায়ক পবিন্দ্ৰ ডেকাৰ লগতে অগপৰ মহানগৰ জিলা সমিতি। বৈঠকত নাগৰিকত্ব সংশোধনী আইনৰ বিৰুদ্ধেও আলোচনা হোৱা বুলি জানিব পৰা গৈছে৷
