সোমবাৰৰ দিনটো অসমৰ ক্ৰীড়া জগতৰ বাবে এক উল্লেখনীয় দিন হিচাপে পৰিগণিত হৈ থাকিব । কিয়নো ভাৰতীয় পুৰুষ ক্ৰিকেট দলৰ বাবে নিৰ্বাচিত হৈছে প্ৰতিশ্ৰুতিৱান ক্ৰিকেটাৰ ৰিয়ান পৰাগ (Cricketer Riyan Parag)। জিণ্টিমণি কলিতাৰ পিছত (ভাৰতীয় মহিলা দলত) ৰাষ্ট্ৰীয় দলৰ বাবে নিৰ্বাচিত (Selected for national team) ৰিয়ান পৰাগ হৈছে অসমৰ দ্বিতীয়গৰাকী ক্ৰিকেটাৰ।
উল্লেখ্য, সোমবাৰে জিম্বাব’ৱে ভ্ৰমণৰ বাবে (For a trip to Zimbabwe) ভাৰতীয় দলটো ঘোষণা কৰা হয়। দলটোৰ অধিনায়ক হৈছে শুভমন গিল। টি-২০ বিশ্বকাপৰ অন্ত পৰাৰ পিছত ভাৰতীয় দলটোৰ এইটো হ’ব প্ৰথম শৃংখলা। দলটোত পাঁচখন নতুন মুখ দেখা যাব। আনহাতে, ৰোহিত শৰ্মা, বিৰাট কোহলী, যশপ্ৰীত বুমৰাহক জিৰণি দিয়া হৈছে।
ভাৰতে ১৫ জনীয়া এটা দল বাছনি কৰিছে। টি-২০ বিশ্বকাপৰ মূল দলত সুযোগ নোপোৱা শুভমনক অধিনায়ক হিচাপে নিযুক্তি দিয়া হৈছে। আনহাতে, অভিষেক শৰ্মা, ৰিয়ান পৰাগ, নীতিশ ৰেড্ডী, ধ্ৰুৱ জুৰেল আৰু তুষাৰ দেশপাণ্ডেক প্ৰথমবাৰৰ বাবে দলত অন্তৰ্ভুক্ত কৰা হৈছে। ইয়াৰ ভিতৰত ধ্ৰুৱ জুৰেলে টেষ্ট ক্ৰিকেট খেলিছে যদিও প্ৰথমবাৰৰ বাবে টি-২০ দলত সুযোগ লাভ কৰিছে।
উল্লেখ্য, জিম্বাব’ৱে ভ্ৰমণত ভাৰতে কেৱল টি-২০ মেচহে খেলিব। ৬ জুলাইৰ পৰা আৰম্ভ হ’ব পাঁচখন মেচৰ শৃংখলা। সকলো মেচ হাৰাৰেত অনুষ্ঠিত হ’ব। ৬ জুলাইত প্ৰথমখন মেচৰ পিছদিনা দ্বিতীয়খন মেচ খেলিব ভাৰতে। বাকী তিনিখন মেচ ১০, ১৩ আৰু ১৪ জুলাইত অনুষ্ঠিত হ’ব। ১০ জুলাইৰ মেচখনৰ বাহিৰে বাকী সকলো মেচ ভাৰতীয় সময়মতে দুপৰীয়া ১ বজাৰ পৰা আৰম্ভ হ’ব। সন্ধিয়া ৬ বজাৰ পৰা আৰম্ভ হ’ব ১০ তাৰিখৰ মেচখন।
১৫ জনীয়া দলটোত চাৰিগৰাকী অ’পেনাৰ আছে। শুভমনৰ বাহিৰেও আছে টি-২০ বিশ্বকাপৰ দলত থকা যশস্বী জয়ছোৱাল, ৰুতুৰাজ গাইকোৱাড় আৰু অভিষেক শৰ্মা। আই পি এল বিজয়ী কলকাতা নাইট ৰাইডাৰ্ছৰ একমাত্ৰ ৰিংকু সিঙে ভাৰতীয় দলত স্থান লাভ কৰিছে।
উল্লেখ্য যে আই পি এলত ভাল খেলা ৰিয়ান, তুষাৰে প্ৰথমবাৰৰ বাবে ভাৰতীয় দলত স্থান লাভ কৰে। দলটোৰ উইকেটকীপাৰ দুগৰাকী হৈছে সঞ্জু চেমছন আৰু ধ্ৰুৱ জুৰেল। ৱাশ্বিংটন সুন্দৰ আৰু ৰবি বিষ্ণয়ে স্পিন বিভাগ চম্ভালিব। পেচ বিভাগৰ দায়িত্ব আবেশ খান, খলিল আহমেদ, মুকেশ কুমাৰ আৰু তুষাৰৰ দায়িত্বত থকিব।
ভাৰতীয় দল : শুভমন গিল (অধিনায়ক), যশস্বী জয়ছোৱাল, ৰুতুৰাজ গাইকোৱাড়, অভিষেক শৰ্মা, ৰিংকু সিং, সঞ্জু শৰ্মা (উইকেটকীপাৰ), ধ্ৰুৱ জুৰেল (উইকেটকীপাৰ), নীতিশ ৰেড্ডী, ৰিয়ান পৰাগ, ৱাশ্বিংটন সুন্দৰ, ৰবি বিষ্ণয়, আবেশ খান, খলিল আহমেদ , মুকেশ কুমাৰ আৰু তুষাৰ দেশপাণ্ডে।
