বিগত কেইদিনমানৰ পৰা হিংসাত্মক প্ৰতিবাদে কঁপোৱা বাংলাদেশৰ (Bangladesh) পৰা অসমৰ প্ৰায় ১২০ গৰাকী ছাত্ৰ-ছাত্ৰী অসমলৈ উভতি আহিছে। দেওবাৰে অসম চৰকাৰৰ এগৰাকী জ্যেষ্ঠ বিষয়াই এই তথ্য প্ৰকাশ কৰে৷ অতিৰিক্ত মুখ্য সচিব (গৃহ) অজয় তিৱাৰীয়ে পিটিআইক জনোৱা মতে, কৰিমগঞ্জ জিলাৰ সুতাৰকান্দি আৰু মেঘালয়ৰ ডাউকিস্থিত ইণ্টিগ্ৰেটেড চেক পোষ্টৰ জৰিয়তে অসমৰ ছাত্ৰ-ছাত্ৰীসকলে এতিয়ালৈকে ভাৰতত প্ৰৱেশ কৰিছে।
তেওঁ কয়, “উত্তৰ-পূৰ্বাঞ্চলত অসম, মেঘালয় আৰু ত্ৰিপুৰাত আইচিপিৰ জৰিয়তে ছাত্ৰ-ছাত্ৰী আৰু অন্যান্য লোকে প্ৰৱেশ কৰি আছে। শনিবাৰে নিশালৈকে ডাউকিৰ পৰা অসমলৈ অহা ৭৬ গৰাকী ছাত্ৰ-ছাত্ৰীয়ে প্ৰৱেশ কৰাৰ বিপৰীতে সুতাৰকান্দিৰ পৰা আন ৪১ গৰাকী ছাত্ৰ-ছাত্ৰীয়ে প্ৰৱেশ কৰে।“
তেওঁ লগতে কয় যে বৰাক উপত্যকাৰ বেছিভাগ ছাত্ৰ-ছাত্ৰীয়েই সুতাৰকান্দিৰ মাজেৰে আহিছে৷ আনহাতে, ব্ৰহ্মপুত্ৰ উপত্যকাৰ অন্তৰ্গত ছাত্ৰ-ছাত্ৰীসকলে ডাউকিৰ জৰিয়তে প্ৰৱেশ কৰিছে।
আগন্তুক কেইদিনমানৰ ভিতৰত আৰু অধিক ছাত্ৰ-ছাত্ৰী অহাৰ সম্ভাৱনা আছে আৰু ভাৰতত প্ৰৱেশৰ সুবিধাৰ বাবে অসম চৰকাৰে সুতাৰকান্দিত এজন দণ্ডাধীশ আৰু জ্যেষ্ঠ আৰক্ষী বিষয়াক নিযুক্তি দিছে বুলিও তিৱাৰীয়ে কয়।
ইফালে বাংলাদেশত কিমানজন অসমীয়া ছাত্ৰ-ছাত্ৰী আছিল বুলি সোধাত তিৱাৰীয়ে কয় যে এই সংখ্যা ৰাজ্য চৰকাৰৰ হাতত নাই৷ কিন্তু বৈদেশিক পৰিক্ৰমা মন্ত্ৰালয়ৰ হাতত ইয়াৰ তথ্য আছে বুলি তেওঁ কয়।
