অলিম্পিক মল্লযুঁজ (Olympic Wrestling)ত বিনেশ ফ’গাটৰ ১০০ গ্ৰাম ওজন বৃদ্ধি হোৱাৰ বাবে যি পৰিস্থিতি উদ্ভৱ হৈছিল, তাত অমন শ্বেৰাৱাতে (Aman Sherawat) ব্ৰঞ্জৰ পদক লাভ (Bronze medal) কৰি কিছু সকাহ দিয়ে। এয়া হৈছে তেওঁৰ প্ৰথম অলিম্পিক আৰু তেওঁ অভিষেক বৰ্ষতে সময়ত এক অভিলেখ গঢ়ে। অলিম্পিকত পদক লাভ কৰা ভাৰতৰ আটাইতকৈ কম বয়সীয়া প্ৰতিযোগী হিচাপেও তেওঁ পৰিগণিত হয়। ইয়াৰ পূৰ্বে এই কৃতিত্ব পিভি সিন্ধুৰ হাতত আছিল।
আনহাতে, ২১ বছৰীয়া অমনে মল্লযুঁজত ভাৰতৰ পদক বিজয়ৰ ধাৰা অব্যাহত ৰাখে। ২০০৮ চনত বেইজিঙত সুশীল কুমাৰে ব্ৰঞ্জৰ পদক লাভ কৰাৰ পিছত ভাৰতে প্ৰতিবাৰেই অলিম্পিক মল্লযুঁজত পদক লাভ কৰি আহিছে। অমনে কয়, “মই দেশবাসীক ক’ব বিচাৰো যে মই পেৰিছত ব্ৰঞ্জৰ পদক লাভ কৰিলোঁ, অহাবাৰ ২০২৮ চনত সোণৰ পদক আনিম।”
উল্লেখযোগ্য যে অতি কম বয়সতে অমনে পিতৃ-মাতৃক হেৰুৱাইছিল। খুৰাকে ডাঙৰ-দীঘল কৰে। আনহাতে, অলিম্পিকত ভাৰতৰ সফলতাৰ কাহিনীত তেওঁ আন এক প্ৰেৰণাদায়ক কাহিনী হৈ পৰিছে। মল্লযুঁজত সুশীল কুমাৰে দুটা পদক লাভ কৰিছে। অমনে সুশীল কুমাৰক স্পৰ্শ কৰাৰ প্ৰতিশ্ৰুতি দি কয়, “সুশীল পালৱানজীয়ে দুটা পদক লাভ কৰিছিল। মই তিনিটা জিকিব বিচাৰো। ২০২৪ চনত কৰিলো। ২০২৮ আৰু ২০৩২ চনতো মই জয়ী হ’ব বিচাৰো।”
পদক জয় কৰাৰ পাছত অমনে পুনৰ কয় যে বৃহস্পতিবাৰৰ যুঁজখনৰ পিছত তেওঁৰ শৰীৰৰ ওজনো ৪.৬ কিলোগ্ৰাম বৃদ্ধি পাইছিল। উক্ত ওজন কমাবলৈ ১০ ঘণ্টা সময় লাগিছিল। নিৰ্দিষ্ট সময়লৈকে তেওঁ ওজন ৫৭ কিলোগ্ৰামলৈ হ্ৰাস কৰি পুনৰবাৰ ব্ৰঞ্জৰ পদক লাভ কৰি দেশক সন্মানিত কৰে। কিন্তু ইয়াৰ পিছতে প্ৰশ্ন উত্থাপন হ’বলৈ ধৰিছে, যদি অমনে ইমানখিনি ওজন বৃদ্ধি কৰিব পাৰিলে, তেন্তে বিনেশে মাত্ৰ ১০০ গ্ৰাম ওজন কমাব নোৱাৰিলে কিয়? ইয়াৰ বাবে কোন দায়ী? বিনেশৰ ব্যক্তিগত দল নে ভাৰতীয় অলিম্পিক দলৰ লগত অহা চিকিৎসকৰ দলটো?
উল্লেখযোগ্য যে চলিত অলিম্পিকত ভাৰতৰ মুঠ পদকৰ সংখ্যা হৈছে ছয়টা। ২০১২ চনত লণ্ডনত লাভ কৰা পদকৰ সংখ্যাৰ সমান। যোৱাবাৰ টকিঅ’ত আহিছিল মুঠ সাতটা। আৰু কোনো পদক আহিবনে নাই তাত সন্দেহ আছে।
