উত্তৰাখণ্ডত পুনৰ দলবদ্ধ ধৰ্ষণৰ (Uttarakhand Gang Rape) অভিযোগ উত্থাপন হৈছে। ঘটনাটো সংঘটিত হৈছে ডেৰাডুনত। বাছৰ ভিতৰত এগৰাকী মহিলাক দলবদ্ধ ধৰ্ষণ কৰি প্ৰহাৰ কৰাৰ অভিযোগ। আৰক্ষী সূত্ৰৰ পৰা জানিব পৰা মতে, যোৱা মঙলবাৰেই ঘটনাটো সংঘটিত হৈছিল যদিও শনিবাৰে বিষয়টো পোহৰলৈ আহে। ঘটনাৰ তদন্ত আৰম্ভ কৰিছে আৰক্ষীয়ে।
সংবাদ মাধ্যমৰ খবৰ অনুসৰি, পঞ্জাৱৰ বাসিন্দা যুৱতীগৰাকী। মঙলবাৰে তেওঁ মোৰাদাবাদৰ পৰা ডেৰাডুনলৈ গৈছিল। প্ৰাথমিক তদন্ত মতে, ডেৰাডুনৰ আই এছ বি টিত (আন্তঃৰাজ্যিক বাছ ষ্টেণ্ড) সংঘটিত হৈছে এই ঘটনা। মঙলবাৰে নিশা তাত এখন বাছত কেইজনমান লোকে মহিলা গৰাকীক আক্ৰমণ কৰে। মহিলাগৰাকীক দলবদ্ধ ধৰ্ষণ আৰু প্ৰহাৰ কৰাৰ অভিযোগ। এই সন্দৰ্ভত শনিবাৰে নিশা থানাত এজাহাৰ দাখিল কৰা হয়।
অভিযোগ দাখিল কৰাৰ লগে লগে আৰক্ষীয়ে তদন্ত আৰম্ভ কৰে। ইতিমধ্যে এই ঘটনাৰ ছয় অভিযুক্তক গ্ৰেপ্তাৰ কৰিছে আৰক্ষীয়ে। অৱশ্যে এই ঘটনাৰ আঁৰত আৰু কোনো লোক জড়িত আছে নেকি সেই বিষয়ে আৰক্ষীয়ে তদন্ত অব্যাহত ৰাখিছে। তদন্তকাৰীয়েও ভুক্তভোগীৰ সৈতে কথা পতাৰ চেষ্টা চলাইছে। ইফালে দলবদ্ধ ধৰ্ষণৰ ঘটনা পোহৰলৈ অহাৰ লগে লগে হুলস্থুলৰ সৃষ্টি হয়।
উল্লেখযোগ্য যে কিছুদিন পূৰ্বে নাইনিতালৰ এখন ব্যক্তিগত চিকিৎসালয়ত কৰ্মৰত এগৰাকী ৩৩ বছৰীয়া নাৰ্ছক ৰাজপথতে ধৰ্ষণ কৰি হত্যা কৰাৰ অভিযোগ উত্থাপন হৈছিল। আনহাতে, যোৱা ৯ আগষ্টত আৰ জি কৰৰ এগৰাকী মহিলা চিকিৎসকক ধৰ্ষণ আৰু হত্যাকাণ্ড সংঘটিত হোৱাৰ পিছত সমগ্ৰ দেশত আলোড়নৰ সৃষ্টি হৈছে। সমগ্ৰ দেশতে প্ৰতিবাদ অব্যাহত আছে।
ইতিমধ্যে কলিকতা উচ্চ ন্যায়ালয়ৰ নিৰ্দেশত কেন্দ্ৰীয় তদন্তকাৰী সংস্থাই এই ঘটনাৰ তদন্ত আৰম্ভ কৰিছে। এই ঘটনাত গ্ৰেপ্তাৰ হৈছে এজন লোক। তদন্তকাৰীয়ে এই কাণ্ডৰ লগত আৰু কোনো লোক জড়িত আছিল নেকি চাবলৈ তদন্ত অব্যাহত ৰাখিছে। দোষীক শাস্তি দিয়াৰ দাবীত দেশৰ বিভিন্ন প্ৰান্তত প্ৰতিবাদ অব্যাহত আছে।
