দিল্লীত (Delhi) এখন শ্লীপাৰ বাছত এগৰাকী কিশোৰীক দলবদ্ধ ধৰ্ষণৰ (Gang rape of a teenage girl) অভিযোগ। উত্তৰ প্ৰদেশৰ মইনপুৰীৰ বাসিন্দা কিশোৰীগৰাকীয়ে নয়দাৰ ছেক্টৰ (Noida sector) ৬৩ অভিমুখে গৈ আছিল। সেই সময়ত বাছখনৰ চালক আৰু কণ্ডাক্টৰে তেওঁক ধৰ্ষণ কৰি দিল্লীৰ কাশ্মীৰী গে’ট অঞ্চলৰ পথত পেলাই থৈ যোৱাৰ অভিযোগ। ইতিমধ্যে এই গোচৰৰ দুজন অভিযুক্তক আৰক্ষীয়ে গ্ৰেপ্তাৰ কৰিছে।
দিল্লী আৰক্ষীৰ সূত্ৰ অনুসৰি, যোৱা ৪ আগষ্টত এই ঘটনা সংঘটিত হয়। সেইদিনা মাতৃয়ে একাদশ শ্ৰেণীৰ ছাত্ৰীগৰাকীক পঢ়া-শুনাক লৈ গালি পাৰিছিল। ইয়াৰ পিছতে তেওঁ কাকো খবৰ নিদিয়াকৈ ঘৰৰ পৰা ওলাই যায়। তেওঁৰ মাতৃৰ ফালৰ ককাক নয়ডাৰ ছেক্টৰ ৬৩ত থাকে। বাছত উঠি তেওঁ মইনপুৰীৰ পৰা তালৈ গৈ আছিল। তেতিয়ালৈ ৰাতি হৈ যায়। বৰষুণো দি আছিল। আন্ধাৰত ঠাইখন বুজি নাপাই তেওঁ ভুলতে গ্ৰেটাৰ নয়দাৰ পাৰি চক অঞ্চলত নামি যায়। বাছৰ পৰা নামি ছোৱালীজনীয়ে নিজৰ ভুলটো বুজি পায়। কিন্তু তেতিয়ালৈকে বাছখন গুচি গৈছিল। অপেক্ষা কৰি থাকোঁতে তেওঁ এখন শ্লীপাৰ বাছ পায়।
বাছখনত আন কোনো যাত্ৰী নাছিল। বাছখন নয়ডাৰ ছেক্টৰ ৬৩ অভিমুখে গৈ থকা বুলি জানি তেওঁ বাছখনত উঠে। আৰক্ষীৰ সূত্ৰৰ পৰা জানিব পৰা মতে, বাছত উঠাৰ কিছু সময়ৰ পাছতেই কণ্ডাক্টৰগৰাকীয়ে তেওঁৰ প্ৰতি অশ্লীল ইংগিত দিবলৈ আৰম্ভ কৰে বুলি ভুক্তভোগীয়ে নিজৰ ভাষ্যত প্ৰকাশ কৰে। ইয়াৰ পিছত চালক আৰু কণ্ডাক্টৰজনে ধৰ্ষণ কৰাৰ অভিযোগ। তেওঁ বাধা দিবলৈ চেষ্টা কৰাত তেওঁক মৃত্যুৰ ভাবুকি দিয়া হৈছিল। অৱশেষত পৰি চকৰ পৰা প্ৰায় ৪৭ কিলোমিটাৰ দূৰত্বত থকা পুৰণি দিল্লীৰ কাশ্মীৰী গে’ট বাছ টাৰ্মিনেলৰ সমীপৰ ৰিং ৰোডত চালক আৰু কণ্ডাক্টৰে তেওঁক পেলাই থৈ পলায়ন কৰে।
দিল্লীৰ উপ-আয়ুক্ত (উত্তৰ দিল্লী) নিহাৰিকা ভাটে জনোৱা মতে, এই ঘটনাৰ অভিযুক্ত চালক কুলদীপ আৰু কণ্ডাক্টৰ সন্দীপক তিমাৰপুৰ অঞ্চলৰ পাৰ্কিং লটৰ পৰা গ্ৰেপ্তাৰ কৰা হয়। আনহাতে, কিশোৰীগৰাকীক যিখন বাছত নিৰ্যাতন চলোৱাৰ অভিযোগ উত্থাপন হৈছে সেই বাছখনো আৰক্ষীয়ে জব্দ কৰিছে। গ্ৰেপ্তাৰ কৰা দলটোৰ বিৰুদ্ধে দলবদ্ধ ধৰ্ষণ, অপহৰণ আৰু আক্ৰমণৰ গোচৰ ৰুজু কৰা হৈছে।
আৰক্ষীৰ সূত্ৰৰ পৰা জানিব পৰা মতে, শ্লীপাৰ বাছখনৰ খিৰিকীবোৰ পৰ্দাৰে আবৃত। ফৰেনছিক বিশেষজ্ঞসকলে বাছখনৰ পৰা দীঘল চুলি উদ্ধাৰ কৰে। সেয়া ছোৱালীজনীৰ মূৰৰ চুলি বুলি অনুমান কৰা হয়। এই ঘটনাই ১৪ বছৰ পূৰ্বে অৰ্থাৎ ২০১২ চনত দিল্লীৰ বাছত এগৰাকী ছাত্ৰীক দলবদ্ধ ধৰ্ষণ আৰু হত্যাৰ কথা মনত পেলাই দিয়ে। উক্ত ঘটনাটোৱে সমগ্ৰ দেশক স্তম্ভিত কৰি তুলিছিল।
