হাৰিয়ানা (Haryana)ৰ সাম্প্ৰদায়িক সংঘাতৰ পৰা দৃষ্টি আকৰ্ষণ কৰিবলৈ কংগ্ৰেছ (Congress) হাইকমাণ্ডে বিধানসভা নিৰ্বাচন (Assembly elections)ত মল্লযুঁজাৰু বিনেশ ফ’গাটক (Wrestler Vinesh Phogat) প্ৰাৰ্থিত্ব প্ৰদানৰ কথা চিন্তা (Thinking about giving candidature) কৰিছে। অৱশ্যে যোৱা সপ্তাহত পেৰিছৰ পৰা উভতি অহা বিনেশৰ মতামতৰ ওপৰত সকলো নিৰ্ভৰ কৰিছে। কংগ্ৰেছৰ সূত্ৰ অনুসৰি, বিনেশে নিজে এতিয়ালৈকে কোনো সিদ্ধান্ত লোৱা নাই।
উল্লেখ্য যে হাৰিয়ানাৰ বিধানসভা নিৰ্বাচন সমাগত। ৰাজ্যখনত ১ অক্টোবৰত ভোটদান। যাৰ বাবে আজিৰে পৰা আৰম্ভ হৈছে কংগ্ৰেছৰ প্ৰাৰ্থী বাছনি সমিতিৰ বৈঠক। কংগ্ৰেছে এইবাৰ বিজেপিক উৎখাত কৰি পুনৰ ক্ষমতালৈ আহিব বুলি আশাবাদী। কিন্তু একমাত্ৰ বাধা হৈছে দলীয় সংঘাত। কিয়নো ৰাজ্যিক কংগ্ৰেছৰ তিনি মূলস্তম্ভ ভূপিন্দৰ সিং হুদা, কুমাৰী শৈলজা আৰু ৰণদীপ সিং সুৰজেৱালাই পৃথকে পৃথকে ৰাজহুৱা সভা অনুষ্ঠিত কৰি আছে। প্ৰাক্তন মুখ্যমন্ত্ৰী হুদাই হয় নিজেই মুখ্যমন্ত্ৰী হ’ব, নহ’লে নিজৰ পুত্ৰ দিপেন্দৰক মুখ্যমন্ত্ৰী পাতিব বিচাৰে। আনহাতে, দলিত নেত্ৰী শৈলাজাই ৰাজ্যৰ ৰাজনীতিলৈ ঘূৰি আহিবলৈ আগ্ৰহী বুলি মন্তব্য কৰিছে। ইফালে সুৰজেৱালা ৰাহুল গান্ধীৰ আস্থাভাজন হিচাপে পৰিচিত। তেনে ক্ষেত্ৰত কংগ্ৰেছ নেতৃত্বৰ চিন্তা হৈছে যে অন্তিম মুহূৰ্তত দলীয় সংঘাতৰ বাবে মধ্যপ্ৰদেশৰ দৰে হাৰিয়ানাতো বিজয়ৰ সম্ভাৱনা হেৰাই যাব নেকি।
এনে পৰিস্থিতিত কংগ্ৰেছৰ এটা অংশই বিনেশ ফ’গাটক মনোনীত হোৱাটো বিচাৰে। কিয়নো অলিম্পিকত পদক হেৰুৱালেও কিন্তু হাৰিয়ানাত তেওঁৰ জনপ্ৰিয়তা আকাশলংঘী। ইয়াৰ উপৰি মল্লযুঁজ ফেডাৰেচনৰ প্ৰাক্তন সভাপতি ব্ৰীজভূষণ চৰণ সিঙৰ বিৰুদ্ধে যৌন নিৰ্যাতনৰ প্ৰতিবাদৰ অন্যতম মুখ আছিল তেওঁ। ইফালে ইতিমধ্যে বিজেপিত যোগদান কৰিছে বিনেশৰ বৰদেউতাকৰ জীয়ৰী ববিতা কুমাৰীয়ে।
হাৰিয়ানাৰ কংগ্ৰেছৰ পৰ্যবেক্ষক দীপক বাব্ৰিয়াই অৱশ্যে কয় যে যদি বিনেশে ৰাজনীতিত প্ৰৱেশ কৰিব বিচাৰে তেন্তে কংগ্ৰেছে তেওঁক নিশ্চিতভাৱে প্ৰাৰ্থিত্ব প্ৰদান কৰিব। কংগ্ৰেছৰ সূত্ৰ অনুসৰি, বিনেশে নিৰ্বাচনত প্ৰতিদ্বন্দ্বিতা নকৰিলেও কংগ্ৰেছ ক্ষমতালৈ আহিলে ক্ৰীড়া সম্পৰ্কীয় এটা গুৰুত্বপূৰ্ণ চৰকাৰী পদত তেওঁক দেখা পোৱা যাব।
