অসমৰ স্বাস্থ্য খণ্ডত এক নতুন সংযোজনৰ ঘোষণা মুখ্যমন্ত্ৰী ডঃ হিমন্ত বিশ্ব শৰ্মাৰ (CM Himanta Biswa Sarma)। গুৱাহাটী চিকিৎসা মহাবিদ্যালয় হাস্পতালৰ নৱনির্মিত ভৱনৰ নিৰ্মাণ কাৰ্যৰ বুজ লৈ এই ঘোষণা কৰে মুখ্যমন্ত্ৰীয়ে। বিশেষকৈ ৰাজ্যৰ কৰ্কট ৰোগ চিকিৎসা খণ্ডত নতুন প্ৰযুক্তিৰ সংযোজনৰ কথা উল্লেখ কৰে মুখ্যমন্ত্ৰীয়ে।
মুখ্যমন্ত্ৰীয়ে কয়, “আমি অসমলৈ প্ৰ’টন বীম থেৰাপী অনাৰ বাবে বিশেষভাৱে গুৰুত্ব প্ৰদান কৰি কাম কৰি আছোঁ৷ ই এক অত্যাধুনিক প্ৰযুক্তিগত চিকিৎসা, যি কৰ্কট ৰোগীয় মৃত্যুৰ হাৰ হ্ৰাস কৰাত যথেষ্ট পৰিমাণে প্ৰভাৱ পেলাব।”
আনহাতে, প্ৰাগজ্যোতিষপুৰ চিকিৎসা মহাবিদ্যালয়ৰ নিৰ্মাণ অগ্ৰগতিৰ বুজ লোৱাৰ উদ্দেশ্যৰে বৃহস্পতিবাৰে চৌহদটিত উপস্থিত হয় মুখ্যমন্ত্ৰী।
তাত উপস্থিত হৈ মুখ্যমন্ত্ৰীয়ে কয়, “গুৱাহাটীৰ দ্বিতীয়খন চিকিৎসা মহাবিদ্যালয় হিচাপে ইয়াত ইতিমধ্যে সীমিত অ’পিডি সেৱা আগবঢ়াই থকা হৈছে আৰু অহা ১৫ আগষ্টৰ ভিতৰত ই সম্পূৰ্ণৰূপে কাৰ্যক্ষম হ’ব বুলি আমি আশা প্ৰকাশ কৰিছোঁ।”
উল্লেখ্য যে প্ৰাগজ্যোতিষপুৰ চিকিৎসা মহাবিদ্যালয়খনৰ নিৰ্মাণ সম্পূৰ্ণ হ’লে ৬০০খন বিছনাযুক্তৰ হোৱাৰ লগতে ১০০জন শিক্ষাৰ্থীয়ে এম বি বি এছ শিক্ষা গ্ৰহণ কৰিব পাৰিব বুলিও মুখ্যমন্ত্ৰীয়ে জানিবলৈ দিয়ে। ইয়াৰ উপৰি গুৱাহাটী চিকিৎসা মহাবিদ্যালয় আৰু হাস্পতালৰ নিৰ্মীয়মান মাতৃ আৰু শিশু চিকিৎসালয়ৰ নিৰ্মাণ কাৰ্যৰ অগ্ৰগতিৰো বুজ লয় মুখ্যমন্ত্ৰীয়ে।
নিৰ্মাণ কাৰ্যৰ অগ্ৰগতিৰ বুজ লৈ মুখ্যমন্ত্ৰীয়ে কয়, “গুৱাহাটী চিকিৎসা মহাবিদ্যালয় আৰু হাস্পতালৰ আগন্তুক মাতৃ আৰু শিশু চিকিৎসালয়ে সমৰ্পিত আৰু বিশেষ শিশু চিকিৎসা সেৱা আগবঢ়াব। ৮০০খন বিছনাৰে সজ্জিত হ’বলগীয়া এই অত্যাধুনিক চিকিৎসা সেৱা প্ৰদান গুৱাহাটী চিকিৎসা মহাবিদ্যালয় আৰু হাস্পতালক সম্পূৰ্ণৰূপে পুনর্নির্মাণ কৰাৰ আমাৰ বৃহত্তৰ পৰিকল্পনাৰ এক অংশ।”
