বোকাজান মহকুমাৰ অন্তর্গত বৰপথাৰ আৰক্ষী থানাৰ অধীনৰ নামবৰ নদী চাহবাগিচা অঞ্চলত যোৱা নিশা এক চাঞ্চল্যকৰ হত্যাকাণ্ডৰ ঘটনা সংঘটিত হৈছে। অচিনাক্ত দুর্বৃত্তৰ আক্রমণত তিনিটিকে শিশু গুৰুতৰভাৱে আহত হৈছে। জানিব পৰা মতে যোৱা নিশা নামবৰ নদী চাহ বাগিচাৰ মুণ্ডা বস্তিৰ জুলো মুণ্ডাৰ ঘৰত দুর্বৃত্তই আক্রমণ কৰি জুলো মুণ্ডাৰ দুই কন্যা ক্রমে সীতা মুণ্ডা (১৩), মীৰা মুণ্ডা (১১) আৰু পুত্র সন্তান শংকৰ মুণ্ডা (৯)ক গুকতবভাবে আহত কৰাৰ লগতে দুর্বৃত্তৰ দলটোৱে জুল্লো মুণ্ডা আৰু তেওঁৰ পত্নী পঞ্চমী মুণ্ডাক বেয়াকৈ মাৰপিট কৰাৰ উপৰি নিশাই অপহৰণ কৰি লৈ যায় বুলি তেওঁলোকৰ পুত্র শংকৰ মুণ্ডাই জানিবলৈ দিয়ে।
যোৱা নিশা দুর্বৃত্তৰ আক্রমণত গুৰুতৰভাৱে আঘাতপ্রাপ্ত হোৱা শিশুকেইটাক গোলাঘাট জিলাৰ সৰুপথাৰ চিকিৎসালয়ত প্রাথমিক চিকিৎসাৰ অন্তত উন্নত চিকিৎসাৰ বাবে গোলাঘাট কুশল কোঁৱৰ অসামৰিক চিকিৎসালয়লৈ প্রেৰণ কৰিছে বুলি জানিব পৰা গৈছে। আনহাতে কালি নিশাৰে পৰা ৰহস্যজনকভাবে নিৰুদ্দেশ হৈ থকা জুলো মুণ্ডা আৰু পঞ্চমী মুণ্ডাৰ উদ্ধাৰ অভিযানৰ লগতে দুর্বৃত্তৰ দলটোৰ অনুসন্ধনাও ইতিমধ্যে বোকাজান মহকুমাৰ মহকুমা আৰক্ষী বিষয়া ৰুস্তমৰাজ ব্ৰহ্মৰ লগতে বৰপথাৰ আৰক্ষী থানাৰ ভাৰপ্রাপ্ত আৰক্ষী বিষয়াসহ এটা আৰক্ষী জোৱানৰ দলে নামবৰ নদী চাহ বাগিচাত অভিযান অব্যাহত ৰাখি আজি বিয়লিৰ ভাগত দুয়োগৰাকীকে মৃত অৱস্থাত উদ্ধাৰ কৰিবলৈ সক্ষম হয়।
আৰক্ষীৰ এই অভিযানৰ অন্তত জুল্লো মুণ্ডা আৰু পঞ্চমী মুণ্ডাক তেওঁলোকৰ ঘৰৰ পৰা কিছু নিলগত থকা কয়লা খনন কৰা এটা দ’ পুখুৰীৰ পৰা মৃত অৱস্থাত উদ্ধাৰ কৰে। দুর্বৃত্তৰ দলটোৱে জুল্লো মুণ্ডা আৰু পঞ্চমী মুণ্ডাক হাত-ভৰি বান্ধি বস্তাত শিলভৰাই তেওঁলোকৰ ডিঙিত ওলোমাই কয়লা খনন কৰা এটা দ’ গাঁতত পেলাই দি হত্যা কৰা বুলি সন্দেহ প্রকাশ কৰিছে। আজি বিয়লিৰ ভাগত বোকাজান আৰক্ষীৰ দলটোৱে বোকাজান মহকুমাৰ মহকুমা দণ্ডাধীশৰ উপস্থিতিত মৃতদেহ দুটা উদ্ধাৰ কৰি বৰপথাৰ আৰক্ষী থানালৈ লৈ আনে আৰু কাইলৈ মৰণোত্তৰ পৰক্ষীৰ বাবে ডিফু মেডিকেল কলেজ হস্পিতাললৈ প্রেৰণ কৰিব।
উল্লেখ্য যে অচিনাক্ত দুর্বৃত্তব দলটোৱে কি কাৰণত পৰিয়ালটোৰ ওপৰত আক্রমণ চলাই তিনিটি শিশুক গুৰুতৰ ভাবে আহত কৰাৰ লগতে পিতৃ-মাতৃক অতি নৃশংসভাবে হত্যা কৰিলে তাৰ কাৰণ এতিয়াও জানিব পৰা হোৱা নাই। আৰক্ষীয়ে ইতিমধ্যে দুর্বৃত্তৰ দলটোৰ বিৰুদ্ধে অনুসন্ধান অব্যাহত ৰাখিছে আৰু আৰক্ষীৰ তদন্তৰ পাছতহে এই নৃশংস হত্যাকাণ্ডৰ প্রকৃত কাৰণ জানিব পৰা যাব।
