উত্তৰাখণ্ডৰ ৰুদ্ৰপ্ৰয়াগৰ অলকানন্দা নদীত বাছ এখন বাগৰি (Rudraprayag Bus Accident) পৰে। বৃহস্পতিবাৰে পুৱা সংঘটিত হোৱা এই দুৰ্ঘটনাত কমেও এজন লোকৰ মৃত্যু হৈছে। দুৰ্ঘটনা সংঘটিত হোৱাৰ পিছত এতিয়ালৈকে ১০ জন যাত্ৰীৰ সন্ধান পোৱা হোৱা নাই।
উত্তৰাখণ্ড আৰক্ষী মুখ্য কাৰ্যালয়ৰ পৰা আই জি নীলেশ আনন্দ ভৰাণে জনোৱা মতে, ৰুদ্ৰপ্ৰয়াগৰ ঘোলটি অঞ্চলত সংঘটিত হৈছে এই দুৰ্ঘটনা। প্ৰথমে জানিব পৰা মতে বাছখনত ১৮ জন যাত্ৰী আছিল। আৰক্ষীৰ অনুমান অনুসৰি বাছখনে নিয়ন্ত্ৰণ হেৰুওৱাৰ বাবেই এই দুৰ্ঘটনা সংঘটিত হৈছে।
ইতিমধ্যে দুৰ্ঘটনাস্থলীত উপস্থিত হৈছে উত্তৰাখণ্ডৰ দুৰ্যোগ সঁহাৰি দল। স্থানীয় থানাৰ আৰক্ষী জোৱানেও দুৰ্ঘটনাস্থলীত উপস্থিত হৈছে। নদীখনৰ পৰা উদ্ধাৰৰ কামো আৰম্ভ হৈছে। এই পৰ্যন্ত ৭ জন যাত্ৰীক উদ্ধাৰ কৰা হৈছে। অৱশ্যে বাকীসকলৰ কোনো তথ্য এতিয়াও পোৱা নাই।
গড়ৱালৰ সংমণ্ডল আয়ুক্ত বিজয় শংকৰ পাণ্ডেয়ে এই দুৰ্ঘটনাত এজন লোকৰ মৃত্যু হোৱা বুলি নিশ্চিত কৰে। তেওঁ কয় যে বাছখনত ১৮জন লোকৰ বাবে বহিব পৰা ব্যৱস্থা আছিল।
প্ৰাৰম্ভিক খবৰ মতে, বদ্ৰীনাথলৈ যোৱা পথত সংঘটিত হৈছে এই দুৰ্ঘটনা।
পাহাৰীয়া পথ এটাৰে বাছখন ওপৰলৈ গৈ থকাৰ সময়তে সংঘটিত হয় এই দুৰ্ঘটনা। পাহাৰৰ ঢালত মানৱ শৃংখল গঠন কৰি আহতসকলক উদ্ধাৰ কৰিবলৈ সক্ষম হৈছে। কিন্তু অলকানন্দা নদীৰ সোঁতৰ বাবে ৰাজ্যৰ দুৰ্যোগ ব্যৱস্থাপনা দল, আৰক্ষী আৰু স্থানীয় প্ৰশাসনে উদ্ধাৰ কামত কিছু সমস্যাৰ সন্মুখীন হৈছে।
