ASSAM TIMES POST
বিশ্ব ঐতিহ্য কাজিৰঙা সমন্বয় ক্ষেত্ৰৰ পৰা অজন্তা তালুকদাৰঃ
শ্ৰীমন্ত শংকৰদেৱ সংঘৰ ৮৯ সংখ্যক বোকাখাত অধিবেশনৰ আজি তৃতীয় দিনাৰ আকৰ্ষণীয় সাংস্কৃতিক শোভাযাত্ৰাই মুহিলে লক্ষ লক্ষ ভক্তপ্ৰাণ ৰাইজৰ লগতে স্থানীয় ৰাইজক।
প্ৰথম গৰাকী অসমীয়া চলচিত্ৰ অভিনেত্ৰী আইদেউ সন্দিকৈৰ জন্ম ঐতিহ্যৰ সংস্পৰ্শ সমৃদ্ধ এই মহুৰা দিহিঙ্গীয়া পথাৰৰ অধিবেশনথলীৰ পৰা আৰম্ভ হোৱা প্ৰায় ১৫ কিলোমিটাৰ জোৰা আজিৰ অধিবেশনৰ তৃতীয় দিনাৰ এই জাতি ধৰ্ম বৰ্ণ নিৰ্বিশেষে হোৱা বাৰে ৰহণীয়া সাংস্কৃতিক শোভাযাত্ৰাই সামৰি ল’লে ৰাভা, মিচিং, চাহ জনগোষ্ঠীকে আদি কৰি অসমৰ ভিন্ন জনগোষ্ঠীয় সংস্কৃতিক।
লগতে আছে বিশ্ব বিখ্যাত এশিঙীয়া গঁড়। ভিন্ন থলুৱা সংস্কৃতি আৰু জনগোষ্ঠীয় স্বকীয়তাৰ সম্ভাৰেৰে দিহিঙ্গীয়া মহুৰা পথাৰৰ বিশ্ব ঐতিহ্য কাজিৰঙা সমন্বয় ক্ষেত্ৰৰ পৰা আৰম্ভ হোৱা এই সাংস্কৃতিক শোভাযাত্ৰাই মহুৰাত প্ৰৱেশ কৰি কমাৰগাঁও হৈ পুনৰ দিহিঙ্গীয়া মহুৰা পথাৰৰ অধিবেশনথলীত প্ৰৱেশ কৰেহি।
পুৱাৰ ভাগত আৰম্ভণি হোৱা এই বৃহৎ সাংস্কৃতিক শোভাযাত্ৰাৰ আবেলি প্ৰায় চাৰিবজাত সমাপ্তি হয়। আজিৰ এই নয়নাভিৰাম সাংস্কৃতিক শোভাযাত্ৰাই শ্ৰীমন্ত শংকৰদেৱ সংঘৰ ৮৯ সংখ্যক বোকাখাত অধিবেশনক জাতি জনগোষ্ঠীৰ সম্প্ৰীতিৰ মিলন ভূমিলৈ পৰ্যবসিত কৰিলে।
