সোমবাৰে কাহিলিপাৰাৰ বাসগৃহত অনুষ্ঠিত হৈছে জুবিন গাৰ্গৰ (Zubeen Garg) আদ্যশ্ৰাদ্ধ অনুষ্ঠান। এই অনুষ্ঠানত বিভিন্ন ব্যক্তিৰ সমাগম ঘটিছে। অনুষ্ঠানত উপস্থিত থাকে অসম আৰক্ষীৰ সঞ্চালক প্ৰধান হৰমীত সিং আৰু আৰক্ষী আয়ুক্ত পাৰ্থ সাৰথি মহন্তও।
আনহাতে, জুবিনৰ পৰিয়ালক সাক্ষাতৰ পিছত সংবাদ মাধ্যমৰ আগত কয় যে জুবিন গাৰ্গৰ মৃত্যুৰ তদন্তৰ বাবে ছিংগাপুৰলৈ যাব এছ আই টিৰ দুজনীয়া দল। আৰক্ষী অধীক্ষক সুধাকৰ সিং আৰু অতিৰিক্ত আৰক্ষী অধীক্ষক তৰুণ গোৱেল মঙলবাৰে ছিংগাপুৰলৈ ৰাওনা হ’ব। আনহাতে, এছ আই টিৰ এটা দল দিল্লীত থকা বুলিও উল্লেখ কৰে আৰক্ষী সঞ্চালক প্ৰধানগৰাকীয়ে।
তেওঁ লগতে কয় যে জুবিন গাৰ্গৰ মৃত্যুৰ গোচৰৰ তদন্তত যিবোৰ তথ্য লাভ কৰা হৈছে সেইবোৰ আদালতলৈ প্ৰেৰণ কৰা হ’ব। আনহাতে, ভাৰতীয় আইন মতে মুখ্যমন্ত্ৰীৰ নিৰ্দেশত সম্পূৰ্ণ নিকা আৰু বৈজ্ঞানিক তদন্ত হ’ব বুলিও তেওঁ উল্লেখ কৰে।
ইফালে এছ আই টিৰ দল ছিংগাপুৰলৈ যোৱা সন্দৰ্ভত তেওঁ কয় যে ছিংগাপুৰ চৰকাৰৰ লগত ভাৰতে যোগাযোগ কৰিছে আৰু আমি সহায় পাম। বেলেগ এখন দেশত অনুসন্ধান কৰাৰ ক্ষেত্ৰত কিছুমান নিয়ম আছে বুলি উল্লেখ কৰি লগতে তেওঁ ৰাইজক আহ্বান জনায় যে তদন্তত সকলোৱে সহযোগ কৰক। যোৱা এসপ্তাহজুৰি অসম আৰক্ষীৰ ওপৰত ৰখা আস্থাৰ দৰে আৰক্ষীক সহযোগ কৰাৰো আহ্বান।
আনহাতে, কাৰোবাৰ হাতত যদি কিবা তথ্য আছে তেন্তে এছ আই টিৰ লগত যোগাযোগ কৰি তথ্য প্ৰদান কৰাৰ লগতে উৰাবাতৰি নিবিয়পাবলৈ আহ্বান জনায় আৰক্ষী সঞ্চালক প্ৰধান হৰমীত সিঙে।
