জুবিন গাৰ্গৰ (Zubeen Garg) মৃত্যুৰ তদন্তৰ বাবে ন্যায়িক আয়োগ গঠন। মুখ্যমন্ত্ৰী ডঃ হিমন্ত বিশ্ব শৰ্মাই এই কথা প্ৰকাশ কৰিছে। শুকুৰবাৰে নিশা এক ফেচবুক লাইভযোগে এই কথা ঘোষণা কৰে মুখ্যমন্ত্ৰীয়ে।
তেওঁ কয় যে জুবিন গাৰ্গক ন্যায় দিয়াৰ বাবে আমি আৰু এটা ডাঙৰ কাম কৰিবলৈ সক্ষম হৈছোঁ, সেয়া হৈছে ন্যায়িক তদন্ত৷ গুৱাহাটী উচ্চ ন্যায়ালয়ৰ ন্যায়াধীশক জুবিন গাৰ্গৰ মৃত্যুৰ তদন্তৰ বাবে এখন ন্যায়িক আয়োগ গঠন কৰিব লাগে বুলি আহ্বান জনোৱা হৈছিল।
লগতে এই ন্যায়িক আয়োগত অৱসৰপ্ৰাপ্ত ন্যায়াধীশৰ পৰিৱৰ্তে হাইকোৰ্টৰ বৰ্তমানৰ এজন ন্যায়াধীশক নিযুক্তি দিব লাগে জনোৱা অনুৰোধত উচ্চ ন্যায়ালয়ৰ মুখ্য ন্যায়াধীশে ন্যায়াধীশ সৌমিত্ৰ শইকীয়াক এই আয়োগখনৰ অধ্যক্ষতা কৰিবলৈ অনুমোদন জনাইছে৷ লগতে মুখ্যমন্ত্ৰীয়ে কয় যে শনিবাৰে ন্যায়াধীশ সৌমিত্ৰ শইকীয়া আয়োগ গঠন কৰা হ’ব৷ আনহাতে, ইয়াত সন্মতি জনোৱাৰ বাবে মুখ্যমন্ত্ৰীয়ে গুৱাহাটী উচ্চ ন্যায়ালয়ৰ মুখ্য ন্যায়াধীশক ধন্যবাদ জনায়৷
লগতে যিসকলে ইউ টিউব, ফেচবুক, টুইটাৰত জুবিনৰ হত্যাৰ বিষয়ে বিভিন্ন তথ্য দাঙি ধৰিছে তেওঁলোকক আয়োগৰ ওচৰত শপতনামা দাখিল কৰিবলৈও মুখ্যমন্ত্ৰীয়ে আহ্বান জনায়৷ ইয়াৰ উপৰি তেওঁ ছিংগাপুৰৰ প্ৰবাসী অসমীয়াসকলক আহি এই তদন্ত প্ৰক্ৰিয়াত সহযোগ কৰাৰ আহ্বান জনায়৷ যদি তেওঁলোকে সহযোগ নকৰে তেন্তে তেওঁলোকৰ বিৰুদ্ধেও কঠোৰ হোৱাৰ ইংগিত প্ৰদান কৰে মুখ্যমন্ত্ৰীয়ে৷
