ড° জয়ন্তী চুতীয়াৰ কাহিনী আৰু প্ৰযোজনাৰে হেম চন্দ্ৰ বৰা পৰিচালিত অসমীয়া কাহিনী চিত্ৰ “ঝংকাৰ -the melody of resonance ” এ সম্প্ৰতি দেশে বিদেশে অনুষ্ঠিত বিভিন্ন প্ৰতিযোগিতাত শ্ৰেষ্ঠত্ব প্ৰমান কৰি সন্মান বুটলিবলৈ সক্ষম হৈছে।
আমালৈ অহা শেহতীয়া খবৰ মতে “ঝংকাৰ”-এ মুম্বাই আন্তৰ্জাতিক চলচ্চিত্ৰ পুৰস্কাৰ ২০২৫ ত হেম চন্দ্ৰ বৰালৈ বৰ্ষটোৰ শ্ৰেষ্ঠ পৰিচালকৰ বঁটা, ড° জয়ন্তী চুতীয়ালৈ আগবঢ়াইছে বৰ্ষটোৰ শ্ৰেষ্ঠ কাহিনীকাৰ বঁটা।
আনহাতে ভাৰত উত্তৰ-পূৰ্বাঞ্চল আন্তৰ্জাতিক চলচ্চিত্ৰ মহোৎসৱত হেম চন্দ্ৰ বৰাক ২য় শ্ৰেষ্ঠ পৰিচালক, অনিন্দিতা ৰূদ্ৰজক শ্ৰেষ্ঠা অভিনেত্ৰী বঁটাৰে সন্মানিত কৰিছে। ইয়াৰ পূৰ্বেও “ঝংকাৰ”-এ বাৰ্লিন কিটজ্ মহোৎসৱত ক্ৰমে শ্ৰেষ্ঠ চলচ্চিত্ৰ, শ্ৰেষ্ঠ পৰিচালক, শ্ৰেষ্ঠ সঙ্গীত আৰু পৰিয়াল আৰু শিশুৰ বন্ধুত্তপূৰ্ণ চলচ্চিত্ৰ শিতানত শ্ৰেষ্ঠ চলচ্চিত্ৰৰ চাৰিটাকৈ বঁটা লাভ কৰিছিল।
কলকতাৰ নন্দনত অনুষ্ঠিত “দশম দূৰ্গাপুৰ আন্তৰ্জাতিক চলচ্চিত্ৰ মহোৎসৱ”ত সদানন্দ গগৈলৈ শ্ৰেষ্ঠ সঙ্গীত পৰিচালকৰ বটা আৰু ঝংকাৰলৈ Remarkeble Artistic Achievement শিতানত জুৰিৰ বিশেষ বঁটাৰে সন্মানিত কৰিছিল। ১৬ সংখ্যক জয়পুৰ আন্তৰ্জাতিক চলচ্চিত্ৰ মহোৎসৱত শ্ৰেষ্ঠ কাহিনী শিতানত জুৰিৰ বিশেষ বঁটাৰে কাহিনীকাৰ ড° জয়ন্তী চুতীয়াক সন্মানিত কৰিছিল ।
