আজিৰে পৰা পৰ্যটকৰ বাবে মুকলি হ’ল কাজিৰঙা (Kaziranga) ৰাষ্ট্ৰীয় উদ্যান আৰু ব্যঘ্ৰ সংৰক্ষিত বনাঞ্চলৰ বুঢ়াপাহাৰ বনাঞ্চল। উল্লেখ্য যে পূৰ্বৰ তুলনাত শেহতীয়াকৈ ৰাষ্ট্ৰীয় অভয়াৰণ্যখনত বৃদ্ধি পাইছে পৰ্যটকৰ সংখ্যা।
বিশেষকৈ পূৰ্বৰ দৰেই শেহতীয়া দূৰ্গা পূজাৰ সময়তো কাজিৰঙাত ভালে সংখ্যক পৰ্যটকৰ উপস্থিতি দেখা গ’ল। সেয়েহে পৰ্যটকৰ সুবিধাৰ বাবে কাজিৰঙাৰ একেবাৰে পশ্চিমত থকা বুঢ়া পাহাৰ বনাঞ্চল ২০২৫-২৬ পর্যটন বর্ষৰ বাবে মুকলি কৰা হয়। ইতিমধ্যে যোৱা ২৬ ছেপ্টেম্বৰত ২০২৫-২৬ পৰ্যটন বৰ্ষৰ বাবে মুকলি কৰা হয় বাগৰি বনাঞ্চল।
আজি মুকলি হোৱা বুঢ়া পাহাৰ বনাঞ্চলৰ আন্ত:গাঁঠনি সম্পূৰ্ণ হৈ উঠা নাই যদিও এই সন্দৰ্ভত আনুষ্ঠানিকভাৱে বুঢ়া পাহাৰ বনাঞ্চলৰ দ্বাৰ মুকলি কৰি পূৱ অসম বন্যপ্ৰাণী সংমণ্ডলৰ ডি এফ অ’ অৰুণ বিঘ্নেশে সাংবাদিকৰ আগত কয় যে গুৱাহাটীৰ দিশৰ পৰা আহিলে সৰ্বপ্ৰথমে পোৱা এই বুঢ়া পাহাৰ বনাঞ্চল পৰ্যটকৰ সুবিধাৰ বাবে আজি আংশিকভাৱে মুকলি কৰা হৈছে। বুঢ়া পাহাৰ বনাঞ্চলৰ চাহিদা যথেষ্ট।
কিয়নো কাজিৰঙাত যিমান ধৰণৰ বন্যপ্ৰাণী আছে, বুঢ়া পাহাৰ বনাঞ্চলতে পোৱা যায়। কাজিৰঙাৰ আটাইতকৈ গুৰুত্বপূৰ্ণ উচ্চ তৃণভূমি আৰু হ্ৰস্ব তৃণভূমি ইয়াতে আছে। কাঠনি, জলাশয়ো আছে ইয়াতে। পাৰ্বত্য অঞ্চল আৰু ব্ৰহ্মপুত্ৰৰ চাপৰি এই আটাইকেইটা অঞ্চল বুঢ়া পাহাৰ বনাঞ্চলত পোৱা যায়। এই বনাঞ্চলেই কাজিৰঙাৰ সকলো জৈৱ বৈচিত্ৰ্যৰ সমাহাৰ। সেয়েহে এই বনাঞ্চললৈ পৰ্যটকৰ আকৰ্ষণ অধিক।
এইবাৰো বুঢ়া পাহাৰ বনাঞ্চলৰ বৰ্দ্ধিত চাহিদালৈ লক্ষ্য কৰি বাগৰিৰ পাছতে বুঢ়া পাহাৰ বনাঞ্চল মুকলি কৰি দিয়া হৈছে। আজিৰে পৰা জীপ চাফাৰি আৰম্ভ হ’ব বুলিও জানিবলৈ দি ডি এফ অ’ গৰাকীয়ে পৰৱৰ্তী সময়ত পৰ্যটকে বিচৰা মতে আন আন সুবিধা সমূহো আগবঢ়োৱা হ’ব বুলি সাংবাদিকৰ আগত প্ৰকাশ কৰে।
লগতে অহা ১ নৱেম্বৰৰ পৰা এই বনাঞ্চলত হাতী চাফাৰিও উপলব্ধ হ’ব বুলি তেওঁ কয়। তেওঁ আৰু কয় যে চৰকাৰে কাজিৰঙাৰ বাবে বিভিন্ন পদক্ষেপ গ্ৰহণ কৰি আহিছে আৰু কাজিৰঙাৰ বাণিজ্যিক প্ৰসাৰ আৰু প্ৰচাৰলৈ চাই এই বৰ্ষতো পৰ্যটকৰ সংখ্যা বৃদ্ধি পাব বুলি তেওঁ আশাবাদী।
