জনপ্ৰিয় কণ্ঠশিল্পী জুবিন গাৰ্গৰ (Zubeen Garg) মৃত্যুত এক নতুন চাঞ্চল্যৰ সৃষ্টি হৈছে। জুবিনৰ মৃত্যু সন্দৰ্ভত শুকুৰবাৰে ছিংগাপুৰ আৰক্ষীয়ে এক বিবৃতি প্ৰকাশ কৰে।
ছিংগাপুৰ আৰক্ষীয়ে জনোৱা মতে, জুবিন গাৰ্গৰ মৃত্যুক লৈ অনলাইনত বিয়পি পৰা জল্পনা-কল্পনা আৰু ভুৱা তথ্যৰ বিষয়ে তেওঁলোক যথেষ্ট সচেতন।
ছিংগাপুৰ আৰক্ষী বাহিনীয়ে প্ৰকাশ কৰা বিবৃতিটোত জুবিন গাৰ্গৰ মৃত্যুৰ তদন্ত ২০২১০ চনৰ কৰ’নাৰ্চ এক্ট অনুসৰি চলি আছে বুলি জানিব পৰা গৈছে।
কিন্তু প্ৰাৰম্ভিক তদন্তত অপৰাধমূলক কাৰ্যকলাপ বা ‘ফাউল প্লে’ৰ কোনো ইংগিত পোৱা নগ’ল। আৰক্ষীয়ে জনোৱা মতে, সমগ্ৰ তদন্ত প্ৰক্ৰিয়া সম্পূৰ্ণ হ’বলৈ আৰু প্ৰায় তিনিমাহ সময় লাগিব পাৰে।
তদন্ত সম্পূৰ্ণ হোৱাৰ পিছত ষ্টেট ক’ৰনাৰ্ছৰ ওচৰত প্ৰতিবেদন দাখিল কৰা হ’ব ।
তাৰ পিছত তাত ক’ৰনাৰ্ছ ইনকুৱাৰি (coroner’s inquiry) অনুষ্ঠিত কৰিবনে নকৰে সেই সিদ্ধান্ত ল’ব। এই তদন্ত মূলতঃ তথ্যভিত্তিক ন্যায়িক তদন্ত প্ৰক্ৰিয়া, যাৰ জৰিয়তে মৃত্যুৰ কাৰণ আৰু পৰিস্থিতি নিৰ্ণয় কৰা হয়। আনহাতে, জুবিনৰ মৃত্যুৰ তদন্ত অব্যাহত ৰখাৰ কথাও ছিংগাপুৰ আৰক্ষীয়ে জনাইছে।
ভাৰতৰ অনুৰোধত জুবিন গাৰ্গৰ মৰণোত্তৰ পৰীক্ষাৰ প্ৰতিবেদন আৰু প্ৰাথমিক তদন্তৰ ফলাফল ভাৰতীয় উচ্চায়ুক্তৰ হাতত অৰ্পণ কৰা হৈছে। অৱশ্যে তদন্ত এতিয়াও চলি থকাৰ বাবে সমগ্ৰ প্ৰক্ৰিয়াটোত আৰু কিছু সময় লাগিব। ইফালে অসত্য তথ্য প্ৰচাৰ নকৰিবলৈ সাধাৰণ ৰাইজক অনুৰোধ জনাইছে আৰক্ষীয়ে।
