বুধবাৰে নিশা প্ৰায় ১ বজাত এক সন্দেহযুক্ত বিস্ফোৰণত কঁপি উঠে কোকৰাঝাৰ (Blast in Kokrajhar)। কোকৰাঝাৰ আৰু চালাকাটি ৰে’ল ষ্টেচনৰ মাজৰ শিঙিমাৰী গাঁৱত ৰে’লৱে ট্ৰেকত এই সন্দেহজনক বিস্ফোৰণৰ ঘটনা সংঘটিত হয়।
বিস্ফোৰণৰ ৰে’লৱে ট্ৰেক আৰু বৈদ্যুতিক সংযোগৰ তাঁৰ ক্ষতিগ্ৰস্ত হয় ৷ উজনিমুৱা আজাৰা ছুগাৰ মালবাহী ৰে’লখন পাৰ হৈ যোৱাৰ সময়তেই এই বিস্ফোৰণৰ ঘটা সংঘটিত হয়।
ঘটনাৰ পিছত বিস্ফোৰণস্থলীত উপস্থিত হয় আই জি পি বিবেক ৰাজ সিং, কোকৰাঝাৰ জিলাৰ আৰক্ষী অধীক্ষক পুষ্পৰাজ সিং, ৰে’ল আৰক্ষী আৰু চোৰাংচোৱাৰ দল। তেওঁলোকে বিস্ফোৰণস্থলী পৰ্যবেক্ষণ কৰাৰ লগতে অঞ্চলটোত পেট্ৰোলিং নিৰাপত্তা ব্যৱস্থা বৃদ্ধি কৰিছে। আনহাতে, স্নিফাৰ ডগেৰে বিস্ফোৰণ ঘটোৱা স্থানৰ পৰ্যবেক্ষণ কৰাৰ লগতে ঘটনাটোৰ তদন্ত আৰম্ভ হৈছে।
উল্লেখ্য যে মালবাহী ৰে’লখন পাৰ হোৱাৰ সময়ত চালকে এক তীব্ৰ জোকাৰণি অনভৱ কৰাত ৰে’লখন ৰখাই দিয়া হয়। তাৰ পিছত ৰে’লৱে কৰ্মীসকলে পথছোৱা পৰীক্ষা কৰাত ট্ৰেক আৰু শ্লীপাৰৰ ক্ষতিসাধন হোৱা প্ৰত্যক্ষ কৰে।
এই বিস্ফোৰণৰ ফলত কোকৰঝাৰ আৰু চালাকাটি ৰে’ল ষ্টেচনৰ মাজৰ ৰে’লৱে ট্ৰেকৰ এটা অংশ ক্ষতিগ্ৰস্ত হোৱাত ৰে’ল সেৱা ব্যাহত হৈ পৰে। অৱশ্যে যুদ্ধগতিৰে মেৰামতিৰ কাম কৰাত পুৱা ৫.২৫ বজাত ৰে’ল পথছোৱাৰে পুনৰ ৰে’ল চলাচল আৰম্ভ হয়। এই সময়ছোৱাত পথছোৱাৰে ৮ খন ৰে’লৰ চলাচল ব্যাহত হোৱা বুলি এন এফ ৰে’লৱেৰ তৰফৰ পৰা জনোৱা হৈছে।
