প্ৰায় ১৪ বছৰৰ এটা সপোন পূৰণ হোৱাৰ দিশে। কিন্তু দুৰ্ভাগ্যৰ কথা যে সেই সপোন পূৰণ হোৱাটো চাবলৈ নিজে নাই ইয়াৰ সৃষ্টাৰ। কিন্তু সপোনৰ কলিটো অংকুৰণ হোৱাৰ লগে লগেই ৰাইজৰ পৰা যেনেদৰে সমাদৰ লাভ কৰিছে তাৰ পৰা এটা কথা অনুমান কৰিব পাৰি যে ই অসমত সৃষ্টি কৰিব এক নতুন ইতিহাস।
হয়, জুবিন গাৰ্গৰ (Zubeen Garg) সপোনৰ প্ৰকল্প ‘ৰৈ ৰৈ বিনালে’ ছবিখনৰ কথাকে কোৱা হৈছে। এই ছবিখনক লৈ তেওঁৰ আছিল যথেষ্ট সপোন। অৱশেষত সেই সপোন পূৰণৰ প্ৰথমটো পৰ্যায় অতিক্ৰম কৰে বৃহস্পতিবাৰে।
বৃহস্পতিবাৰে মুকলি কৰা হয় ৰৈ ৰৈ বিনালেৰ ট্ৰেইলাৰ। ট্ৰেইলাৰ মুকলিৰ পিছতে ছবিখনে দৰ্শকৰ মাজত লাভ কৰিছে অভাৱনীয় সফলতা। এক প্ৰকাৰ সৃষ্টি কৰিছে ধুমুহাৰ। ট্ৰেইলাৰ মুকলিৰ ১২ ঘণ্টা নৌহওঁতেই ইয়াৰ দৰ্শকৰ সংখ্যাই ১ মিলিয়ন অতিক্ৰম কৰিলে। যাৰ ফলত ছবিখনক লৈ এতিয়া সকলোৰে মাজত সৃষ্টি হৈছে ব্যাপক উৎসাহ।
জুবিন গাৰ্গৰ কাহিনী আৰু অভিনয়েৰে নিৰ্মাণ কৰা এই ছবিখনৰ পৰিচালক হৈছে ৰাজেশ ভূঞা। অহা ৩১ অক্টোবৰত ছবিগৃহত মুক্তিলাভ কৰিব প্ৰথমখন অসমীয়া সাংগীতিক ছবি (মিউজিকেল ড্ৰামা) ‘ৰৈ ৰৈ বিনালে’। মুক্তিৰ পূৰ্বে সামাজিক মাধ্যমতো ছবিখনক লৈ সৃষ্টি হৈছে ব্যাপক চৰ্চা।
ছবিখনৰ অন্তিম পৰ্যায়ৰ কাম বৰ্তমান মুম্বাইত পূৰ্ণগতিত চলি আছে। প্ৰথমবাৰৰ বাবে অসমীয়া ছবিত অত্যাধুনিক কাৰিকৰী কৌশল প্ৰয়োগ কৰা এই ছবিখনত জুবিন গাৰ্গে এক ব্যতিক্ৰমী চৰিত্ৰত অভিনয় কৰিছে। বহুতৰ মতে এই ছবিখনত জুবিন গাৰ্গৰ জীৱন আৰু কৰ্মৰ প্ৰতিফলন ঘটিব। এগৰাকী অন্ধ কণ্ঠশিল্পীৰ চৰিত্ৰ অভিনয় কৰিছে জুবিন গাৰ্গে। এই চৰিত্ৰটোত অভিনয়ৰ বাবে তেওঁ প্ৰায় দুমাহ ধৰি চকুত লেন্স লগাই শ্বুটিং কৰিছিল।
আনহাতে, ছবিখনৰ ট্ৰেইলাৰ মুক্তি পোৱাৰ পিছত পত্নী গৰিমা গাৰ্গে ছচিয়েল মিডিয়াত দিছে এটা আবেগিক পোষ্ট। ফেচবুকত দিয়া পোষ্টটোত গৰিমা গাৰ্গে লিখিছে, “চোৱা গ’ল্ডী.. তোমাৰ বহুত হেঁপাহৰ, বহুত মৰমৰ ‘ৰৈ ৰৈ বিনালে’ সাজু হৈ উঠিছে লাহে লাহে! তোমাৰ ইচ্ছা, তোমাৰ সপোন সাকাৰ কৰিবলৈ তোমাৰ কথামতেই সকলোৱে চেষ্টা কৰিছে কামবোৰ ভালকৈ কৰিবলৈ। তুমি আশীৰ্বাদ কৰি থাকিবা … বাট দেখুৱাই থাকিবা।”
ছবিখনত আছে মুঠ ১১ টাকৈ গীত। ইয়াৰে ভিতৰত ইতিমধ্যে ‘মোৰ মন’ আৰু ‘সপোন সপোন’ শীৰ্ষক গীত দুটি মুক্তিলাভ কৰিছে। ছবিখনত অভিনয় কৰা আন আন শিল্পীসকল হৈছে ভিক্টৰ বেনাৰ্জী, জয় কাশ্যপ, আচুৰ্য বৰপাত্ৰ, মৌচুমী আলিফা, উজ্জ্বল ৰাজখোৱা, মিতালী ৰয়, আঙুৰলতা ডেকা আদি।
