অৱশেষত আত্মসমৰ্পণ বিকাশ অসমৰ (Bikas Axom)। শেহতীয়াভাৱে অপহৰণ আৰু ধনদাবীৰ ঘটনাত নাম জড়িত হৈ পৰিছিল বীৰ লাচিত সেনাৰ নেতাজনৰ। তাৰ পিছৰে পৰা তেওঁ আত্মসমৰ্পণ কৰে।
আনহাতে, ইয়াৰ মাজতে বীৰ লাচিত সেনাৰ কামৰূপ মহানগৰ জিলাৰ মুখ্য সচিব পদৰ তেওঁক বহিষ্কাৰ কৰা হয়। শনিবাৰে দিছপুৰ থানত আত্মসমৰ্পণ কৰাৰ পিছত দিছপুৰ আৰক্ষীয়ে তেওঁক গ্ৰেপ্তাৰ কৰে।
ইফালে দিছপুৰ থানাত আত্মসমৰ্পণ কৰাৰ পূৰ্বে তেওঁ গুৱাহাটীৰ ছুপাৰমাৰ্কেটৰ এটা ছবিগৃহত ‘ৰৈ ৰৈ বিনালে’ ছবিখন উপভোগ কৰে। ছবিখন উপভোগ কৰাৰ ফটোৰ সৈতে এটা বিশেষ পোষ্ট ফেচবুকতো শ্বেয়াৰ কৰে।
নিজৰ ফেচবুক পোষ্টটোত বিকাশ অসমে লিখিছে, “জুবিন দা পৃথিৱীৰ প্ৰতিজন ব্যক্তিৰ বুকুত আজিৰ দৰেই মৰমৰ আৰু প্ৰাণৰ হৈ থাকক। বৰ সুন্দৰ এখন চিনেমা। “ৰৈ ৰৈ বিনালে” সকলোৱে চাব। মানুহে ভুলৰ পৰাই শিক্ষণৰ নতুন দস্তাবেজ মেলে।
আই মাতৃ সকলে মোক ভুল বুজি নাথাকিব কাৰণ কোনো কালে মোৰ জীৱনত অসমীয়াক অপমান কৰাৰ আজিলৈ উদাহৰণ নাই। এটা কথা সত্য যে কোনো ব্যক্তিক মই জ্ঞাতে বা অজ্ঞাতে মনোকষ্ট দি কোনো দিনে সুখী হ’ব নোৱাৰিম।
বিগত দিনত অসমীয়া জাতিটোৰ বাবেই বহুবাৰ গ্ৰেপ্তাৰ বা কাৰাবাসত গৈছোঁ। গতিকে মই সৰু হিচাবে ক্ষমা বিচাৰিম জ্ঞাতে বা অজ্ঞাতে মনোকষ্ট দিয়া প্ৰতিজন ব্যক্তিৰ ওচৰত। ধৰি নাথাকিব। জাতিটোৰ বাবে আমি সকলোৱে যিকোনো দৃষ্টিকোণৰ পৰা কৰিব লগীয়া বহু কাম আছে। জুবিন দাৰ চিনেমাখন চোৱাৰ বৰ হেঁপাহ আছিল।
জেলৰ ভাত খামেই যেতিয়া চিনেমাখন চাই এতিয়া সুস্থ শৰীৰে উপস্থিত হ’মগৈ আৰক্ষীৰ সহযোগিতাৰ বাবে। মহামান্য আদালতে দিয়া ৰায়দান বা শাস্তিক সন্মানেৰে আদৰি ল’ম। এই জাতীয়তাবোধ মোৰ সংগ্ৰামী জীৱনত সদায়েই থাকিব তেজত যিকোনো অসমীয়া ব্যক্তিৰ বাবে। জয় জুবিন দা।
জয় আই অসম॥
#JusticeForZubeenGarg”
উল্লেখ্য যে আত্মসমৰ্পণৰ পূৰ্বে বিকাশ অসমৰ চহী সম্বলিত ধনদাবী পত্ৰ আৰক্ষীয়ে লাভ কৰা সন্দৰ্ভত সংবাদ মাধ্যমৰ আগত সেয়া ধনদাবী পত্ৰ নহয় বুলি উল্লেখ কৰে। এম্বুলেন্স এখন দিয়াৰ কথা ভাবি সহায় বিচাৰি লিখা পত্ৰহে আছিল বুলি উল্লেখ কৰি তেওঁক আইনে যি শাস্তি দিয়ে মূৰ পাতি ল’ব বুলি উল্লেখ কৰে।
