অৱশেষত অপেক্ষাৰ অন্ত পেলাই শুকুৰবাৰে আদালতত দাখিল কৰা হয় জুবিন গাৰ্গ (Zubeen Garg) মৃত্যু গোচৰৰ অভিযোগনামা। গুৱাহাটীৰ চি জে এম আদালতত ২৫০০ পৃষ্ঠাৰ (অৱশ্যে বিভিন্ন নথি সন্নিৱিষ্ট কৰি ইয়াৰ পৰিসৰ ১০০০০ পৃষ্ঠাৰো অধিক হ’ব) এছ আই টিয়ে দাখিল কৰে অভিযোগনামা।
এই অভিযোগনামাত জুবিন গাৰ্গক ছিংগাপুৰত হত্যা কৰা বুলি উল্লেখ কৰা হৈছে। আনহাতে, সিদ্ধাৰ্থ শৰ্মা, শ্যামকানু মহন্ত, শেখৰজ্যোতি গোস্বামী আৰু অমৃতপ্ৰভা মহন্তক জুবিন গাৰ্গৰ মূল হত্যাকাৰী হিচাপে অভিযুক্ত কৰা হৈছে।
জুবিন গাৰ্গৰ ৰহস্যজনক মৃত্যুৰ ৮৪ দিনৰ পিছত শুকুৰবাৰে পুৱা ১১.১০ বজাত কটকটীয়া নিৰাপত্তা বেষ্টনীৰ মাজত আদালতত অভিযোগনামা দাখিল কৰা হয়। জুবিন গাৰ্গৰ মৃত্যুৰ ১৮/২০২৫ নম্বৰৰ চি আই ডিৰ গোচৰৰ তদন্তৰ এই অভিযোগনামাত ৭ অভিযুক্তৰ বিৰুদ্ধে অভিযোগ আছে যদিও ইয়াৰে চাৰিজনৰ বিৰুদ্ধে হত্যাৰ অভিযোগ আৰোপ কৰা হৈছে৷
ইয়াৰে ভিতৰত অভিযোগনামাত সিদ্ধাৰ্থ শৰ্মাৰ বিৰুদ্ধে বি এন এছৰ ধাৰা ৩ আৰু উপধাৰ ৬, ৭ আৰু ৮ত অপৰাধত জ্ঞাতসাৰে সহযোগিতা, বি এন এছ ধাৰা ৬১ উপধাৰা ২ত অপৰাধৰ ষড়যন্ত্ৰ, বি এন এছ ধাৰা ১০৩, উপধাৰা ১ত হত্যা, বি এন এছ ধাৰা ৩১৬, উপধাৰা ৫ত বিত্তীয় লেনদেনৰ বিশ্বাসঘাতকতাৰ অভিযোগ আৰোপ কৰা হৈছে।
আনহাতে, শ্যামকানু মহন্তৰ বিৰুদ্ধে বি এন এছ ধাৰা ৩ উপধাৰা ৬, ৭, ৮ত অপৰাধত জ্ঞাতসাৰে সহযোগিতা আগবঢ়োৱা, বি এন এছ ধাৰ ৬১, উপধাৰা ২ত অপৰাধৰ ষড়যন্ত্ৰ, বি এন এছ ধাৰা ১০৩, উপধাৰা ১ত হত্যা, বি এন এছ ধাৰা ৩০৮ উপধাৰ ২ত ধন আত্মসাত, বি এন এছ ধাৰা ৩১৮ উপধাৰা ৪ত প্ৰৱঞ্চনা আৰু বি এন এছ ধাৰা ২৩৮ত তথ্য-প্ৰমাণ নষ্ট কৰাৰ ধাৰা আৰোপ কৰা হৈছে৷
ইফালে শেখৰজ্যোতি গোস্বামীৰ বিৰুদ্ধে বি এন এছ ধাৰা ৩, উপধাৰ ৬, ৭ আৰু ৮ত অপৰাধত জ্ঞাতসাৰে সহযোগিতা আগবঢ়োৱা, বি এন এছ ধাৰা ৬১, উপধাৰা ২ত অপৰাধৰ ষড়যন্ত্ৰ কৰা, বি এন এছ ধাৰা ১০৩, উপধাৰা ১ত হত্যা, বি এন এছ ধাৰা ৩১৬, উপধাৰা ৫ত বিত্তীয় লেনদেনৰ খেলিমেলি আৰু বিশ্বাসঘাতকতাৰ ধাৰা আৰোপ কৰা হৈছে।
ইয়াৰ উপৰি অমৃতপ্ৰভা মহন্তৰ বিৰুদ্ধে বি এন এছ ধাৰা ৩, উপধাৰা ৬, ৭ আৰু ৮ত অপৰাধত জ্ঞাতসাৰে সহযোগিতা আগবঢ়োৱা, বি এন এছ ধাৰা ৬১, উপধাৰা ২ত অপৰাধৰ ষড়যন্ত্ৰ কৰা, বি এন এছ ধাৰা ১০৩, উপধাৰা ১ত হত্যা, বি এন এছ ধাৰা ২৩৮ত তথ্য-প্ৰমাণ নষ্ট কৰাৰ ধাৰা আৰোপ কৰা হৈছে৷
আনহাতে, জুবিন গাৰ্গৰ সম্পৰ্কীয় ভাতৃ সন্দীপন গাৰ্গৰ বিৰুদ্ধে বি এন এছ ধাৰা ১০৫ আৰোপ কৰা হৈছে৷
ইয়াৰ উপৰি কাৰাগাৰত বন্দী হৈ থকা আন দুগৰাকী অভিযুক্ত তথা জুবিন গাৰ্গৰ দেহৰক্ষী নন্দেশ্বৰ বৰা আৰু পৰেশ বৈশ্যৰ বিৰুদ্ধে বি এন এছ ধাৰা ৬১, উপধাৰা ২ৰ অধীনত অপৰাধৰ ষড়যন্ত্ৰ কৰা আৰু বি এন এছ ধাৰা ৩১৬, উপধাৰা ৫ৰ অধীনত বিত্তীয় লেনদেনৰ খেলিমেলি, বিশ্বাসঘাতকতাৰ অপৰাধৰ ধাৰা আৰোপ কৰা হৈছে।
অভিযোগনামা দাখিলৰ পিছত এছ আই টিৰ মুৰব্বী মুন্না প্ৰসাদ গুপ্তাই সংবাদমেলযোগে এই তথ্য সদৰী কৰে।
