ৰক্ষকেই ভক্ষক। ইণ্ডিয়ান বেংক (Indian Bank)ৰ এটা শাখাৰ কেচিয়াৰ (Branch cashier)ক গ্ৰাহকৰ ধন ট্ৰেন্সফাৰ কৰাৰ দোষত দোষী সাব্যস্ত (Found guilty) কৰা হৈছে। উত্তৰ প্ৰদেশ (Uttar Pradesh)ৰ আদালতে তেওঁক যাৱজ্জীৱন কাৰাদণ্ডৰ শাস্তি প্ৰদান কৰিছে। কেচিয়াৰৰ সৈতে এই অপৰাধত জড়িত থকা পাঁচজন লোকক ১০ বছৰৰ কাৰাদণ্ডৰ শাস্তি প্ৰদান কৰা হৈছে। ইয়াৰ ভিতৰত আছে বেংকটোৰ প্ৰাক্তন মেনেজাৰজনো।
আদালতৰ সূত্ৰ অনুসৰি, অভিযুক্তৰ নাম জয়প্ৰকাশ সিং। তেওঁ উত্তৰ প্ৰদেশৰ ইণ্ডিয়ান বেংকৰ এটা শাখাৰ কেচিয়াৰ আছিল। মাৰ্চ মাহত ইজনৰ পিছত সিজনকৈ গ্ৰাহকে বেংকৰ সংশ্লিষ্ট শাখাটোলৈ গৈ অভিযোগ দাখিল কৰিছিল। সকলোৱে দাবী কৰিছিল যে তেওঁলোকে একাউণ্টত জমা কৰা ধনতকৈ বহু কম টকা দেখুওৱা হৈছে। মোবাইল এপতো দেখা গৈছে একেই পৰিস্থিতি। বিভিন্ন গ্ৰাহকৰ পৰা একেধৰণৰ অভিযোগ পোৱাৰ পিছত বেংকৰ আঞ্চলিক মুৰব্বীগৰাকীয়ে থানাত এফ আই আৰ দাখিল কৰে। আৰক্ষীয়ে ইয়াৰ তদন্ত আৰম্ভ কৰাৰ পিছতে ধন আত্মসাতৰ খবৰটো পোহৰলৈ আহে।
আৰক্ষীৰ দাবী যে সমগ্ৰ দুৰ্নীতিৰ সৈতে বেংকৰ কেইবাজনো লোক জড়িত আছিল। কেচিয়াৰজনেই আছিল তেওঁলোকৰ মাষ্টাৰমাইণ্ড। জানিব পৰা মতে, প্ৰায় ১০০টা একাউণ্টৰ পৰা মুঠ ১ কোটি ৮৫ লাখ ৯৭ হাজাৰ টকা ট্ৰেন্সফাৰ হৈছিল। সেই সন্দৰ্ভত আৰক্ষীয়ে আদালতত চাৰ্জশ্বীট দাখিল কৰে। মূল অভিযুক্ত হিচাপে কেচিয়াৰ জয়প্ৰকাশৰ নাম উল্লেখ কৰা হৈছে। ইয়াৰ উপৰি প্ৰাক্তন বেংক মেনেজাৰ ৰাঘবেন্দ্ৰ সিং, প্ৰবীণ কুমাৰ, আকাশ মিশ্ৰ, বীৰ বাহাদুৰ আৰু সুখদেৱ সিঙকো আদালতত অভিযুক্ত হিচাপে দেখুওৱা হৈছে।
শুকুৰবাৰে আদালতে এই গোচৰৰ ৰায় ঘোষণা কৰে। ইয়াত বেংকৰ কেচিয়াৰজনক যাৱজ্জীৱন কাৰাদণ্ডৰ শাস্তি প্ৰদান কৰা হৈছে। লগতে ৫ লাখ টকা জৰিমনা বিহা হয়। ইয়াৰ উপৰি ন্যায়াধীশগৰাকীয়ে প্ৰাক্তন বেংক মেনেজাৰকে ধৰি পাঁচজন লোকক ১০ বছৰৰ সশ্ৰম কাৰাদণ্ডৰ নিৰ্দেশ দিয়ে। আদালতৰ পৰ্যবেক্ষণ, “এয়া এক সংগঠিত অপৰাধ। যি হৈছে সেয়া ভয়ংকৰ। সকলো প্ৰমাণৰ ভিত্তিত দোষীক শাস্তি দিয়া হয়।”
১৭২ দিনৰ ভিতৰত এই গোচৰৰ ৰায় ঘোষণা কৰা হয়। আৰ্থিক জালিয়াতিৰ গোচৰৰ ক্ষিপ্ৰ নিষ্পত্তিৰ বাবে আৰক্ষীৰ ভূমিকাক চৰকাৰী অধিবক্তাগৰাকীয়ে অতিশয় প্ৰশংসা কৰে।
