চৰকাৰে যিমানে দুৰ্নীতিৰ বিৰুদ্ধে শূন্য সহনশীলতাৰ কথা নকওক কিয় সেয়া যে এক বুমেৰাং তাৰ এক উদাহৰণ ডিফুৰ এটা চৰকাৰী কাৰ্যালয়। এফালে চৰকাৰী কাৰ্যালয়সমূহত কাম-কাজত স্বচ্ছতা অনাৰ বাবে চৰকাৰী বিষয়া-কৰ্মচাৰীসকলক দুৰ্নীতিৰ পৰা দূৰৈত থাকিবলৈ চৰকাৰে আহ্বান জনাই আহিলেও এই দৃশ্যই প্ৰমাণ কৰিব যে দুৰ্নীতি এতিয়াও শেষ হোৱা নাই।
এয়া হৈছে ডিফুৰ কোষাগাৰ বিষয়াৰ কাৰ্যালয় (Diphu treasury Office bribe)। কাৰ্যালয়টোৰ দুগৰাকীকৈ কৰ্মচাৰীয়ে কাম কৰি দিয়াৰ নামত টকা লোৱাৰ দৃশ্য এয়া। এই দৃশ্য বন্দী হৈছে গোপন কেমেৰাত।
উল্লেখযোগ্য যে এই কাৰ্যালয়টোৰ কৰ্মচাৰীৰ বিৰুদ্ধে বহু দিনৰ পৰা উত্থাপন হৈ আহিছে দুৰ্নীতিৰ অভিযোগ।এই অভিযোগৰ ভিত্তিতে কাৰ্বি ছাত্ৰ সন্থাই চলায় এক অভিযান। এই অভিযানতে কাৰ্বি ছাত্ৰ সন্থাই গোপন কেমেৰাত বন্দী কৰে চৰকাৰী কৰ্মচাৰীয়ে কামৰ বিনিময়ত টকা লোৱাৰ দৃশ্য।
এই প্ৰমাণৰ ভিত্তিতে বৃহস্পতিবাৰে ছাত্ৰ সংগঠনটোৱে জিলা আয়ুক্তক সাক্ষাৎ কৰি অভিযোগ দাখিল কৰে। লগতে দাখিল কৰে টকা লোৱাৰ দৃশ্য বন্দী হোৱা ভিডিঅ’। এজন ঠিকাদাৰৰ পৰা কামৰ বিনিময়ত উৎকোচ লৈ থকা অৱস্থাত কেমেৰাত বন্দী হোৱা কৰ্মচাৰী দুজন হৈছে মিত্যলাল দাস আৰু প্ৰদীপ কুমাৰ দে’। এই ভিডিঅ’সহিতে অভিযোগ দাখিল কৰি কাৰ্বি ছাত্ৰ সন্থাই দুৰ্নীতিগ্ৰস্ত কৰ্মচাৰীসকলৰ বিৰুদ্ধে আইনগত ব্যৱস্থা গ্ৰহণৰ আহ্বান জনায়।
লগতে এই সন্দৰ্ভত কাৰ্বি ছাত্ৰ সন্থাই গুৰুতৰ অভিযোগ কৰে যে ডিফুৰ কোষাগাৰ বিষয়া কাৰ্যালয়ত বছৰ বছৰ ধৰি চলি আহিছে এনে অনৈতিক কাৰ্য। সেয়ে জিলা আয়ুক্তই যদি যথোপযুক্ত ব্যৱস্থা গ্ৰহণ নকৰে তেন্তে ছাত্ৰ সংগঠনটোৱে আন্দোলন কৰাৰ হুংকাৰ প্ৰদান কৰে৷
এতিয়া ছাত্ৰ সংগঠনটোৰ প্ৰমাণ আৰু অভিযোগৰ ভিত্তিত জিলা আয়ুক্তই কি ব্যৱস্থা গ্ৰহণ কৰে সেয়া পৰৱৰ্তী সময়ত লক্ষণীয় হ’ব।
