ৰাষ্ট্ৰপতিৰ শাসনৰ পিছত নতুন চৰকাৰ গঠন হ’লেও কিন্তু মণিপুৰক (Manipur Violence) লগ এৰা নাই অশান্তিয়ে। মণিপুৰৰ উখৰুল জিলাত দেওবাৰৰ পৰা পুনৰ উত্তপ্ত হৈ পৰিছে দুটা জনজাতীয় সংগঠনৰ মাজত সংঘৰ্ষ। বিভিন্ন ঘৰত অগ্নিসংযোগৰ অভিযোগ উত্থাপন হৈছে।
সোমবাৰে পুৱা অঞ্চলটোৰ পৰিস্থিতি অৱশ্যে শান্ত হয়। দেওবাৰে সন্ধিয়াৰে পৰা নগা আৰু কুকি জনগোষ্ঠীৰ মাজত সংঘৰ্ষৰ সৃষ্টি হয়। জানিব পৰা মতে, দেওবাৰে এজন নগা যুৱকক আক্ৰমণ কৰা বুলি অভিযোগ উঠিছে। এই ঘটনাক কেন্দ্ৰ কৰি উত্তেজনা বিয়পি পৰে। অভিযোগ অনুসৰি, কুকি সম্প্ৰদায়ৰ সশস্ত্ৰ বিদ্ৰোহীয়ে সংঘটিত কৰে এই আক্ৰমণ।
এই উত্তেজনাই ক্ৰমান্বয়ে দুয়োপক্ষৰ মাজত সংঘৰ্ষৰ ৰূপ লয়। পৰিস্থিতি নিয়ন্ত্ৰণৰ বাবে দেওবাৰে উখৰুল জিলাৰ লিটন গাঁৱত নিৰাপত্তা বাহিনী মোতায়েন কৰা হয়। উত্তেজিত ৰাইজক ছত্ৰভংগ দিয়াবলৈ নিৰাপত্তাৰক্ষীয়ে কন্দুৱা গেছৰ গুলী নিক্ষেপ কৰে। পি টি আয়ে প্ৰকাশ কৰা অনুসৰি, উত্তেজনাৰ মাজতে কেইবাজাঁই গুলীৰ শব্দও শুনা যায়।
পৰিস্থিতি এনে এটা স্তৰত উপনীত হয় যে সন্ধিয়া পথত পথচাৰীৰ চলাচল নিয়ন্ত্ৰণ কৰিবলগা হয়। উখৰুল জিলা প্ৰশাসনে এক নিৰ্দেশ জাৰি কৰি কয় যে অশান্তিজৰ্জৰ অঞ্চলত কোনেও নিজ নিজ অঞ্চলৰ পৰা বাহিৰলৈ ওলাই যাব নোৱাৰিব। দেওবাৰে সন্ধিয়া ৭ বজাৰ পৰা এই আদেশ জাৰি কৰা হৈছে। জিলা প্ৰশাসনে কয় যে পৰৱৰ্তী নিৰ্দেশ জাৰি নোহোৱালৈকে এই নিষেধাজ্ঞা কাৰ্যকৰী হ’ব।
অৱশ্যে দেওবাৰে মাজনিশা পৰিস্থিতি পুনৰ উত্তপ্ত হৈ পৰে। কুকি বিদ্ৰোহীয়ে কেইবাটাও নগা পৰিয়ালৰ ঘৰত অগ্নিসংযোগ কৰাৰ অভিযোগ উত্থাপন হয়।
আনহাতে, কেইবাটাও কুকি পৰিয়ালৰ ঘৰত অগ্নিসংযোগৰ অভিযোগো উত্থাপন হয়। সোমবাৰে পুৱা অৱশ্যে অঞ্চলটোৰ পৰিস্থিতি শান্ত। জিলা প্ৰশাসনৰ এগৰাকী বিষয়াই পি টি আইক জনোৱা মতে, অঞ্চলটোত এতিয়াও চেপা উত্তেজনা অব্যাহত আছে। ক্ষয়-ক্ষতিৰ পৰিমাণ এতিয়াও স্পষ্ট হোৱা নাই। ক্ষয়-ক্ষতিৰ মূল্যায়ন কৰা হৈছে বুলিও তেওঁ কয়।
দেওবাৰে মাজনিশা সংঘটিত হিংসাৰ কিছু ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে । ভিডিঅ’ত দেখা গৈছে যে কেইবাজনো অস্ত্ৰধাৰীয়ে ঘৰ আৰু বাহনত অগ্নিসংযোগ কৰিছে। গুলীচালনা কৰাও দেখা গৈছে। সোমবাৰে পুৱাৰে পৰা অঞ্চলটোত অতিৰিক্ত বাহিনী মোতায়েন কৰা হৈছে।
