কাৰাগাৰত বন্দী (Imprisoned in jail) প্ৰাক্তন প্ৰধানমন্ত্ৰী ইমৰাণ খান (Former Prime Minister Imran Khan)ৰ সৈতে ‘আপোচ’ (Compromise) কৰিব বিচাৰে পাকিস্তান চৰকাৰে। দুবাৰকৈ এই প্ৰস্তাৱো দিয়া হৈছিল ইমৰাণ খানক। এই কথা কৈছে পাকিস্তানৰ প্ৰধানমন্ত্ৰী শ্বাহবাজ শ্বৰীফৰ ঘনিষ্ঠ ৰাজনৈতিক উপদেষ্টা ৰাণা ছানাউল্লাই (Rana Sanaulla)। তেওঁ দাবী কৰে যে ইমৰাণ খানে এই প্ৰস্তাৱত সন্মতি প্ৰকাশ কৰা নাই। তেওঁ দুয়োবাৰেই ‘দূত’ক ঘূৰাই পঠিয়াইছে।
বুধবাৰে এক অনুষ্ঠানত ইমৰাণ সন্দৰ্ভত মন্তব্য কৰে ছানাউল্লাই। তেওঁৰ এই বক্তব্যই পাকিস্তানৰ বৰ্তমানৰ চৰকাৰখনক অস্বস্তিত পেলাইছে। খৰখেদাকৈ দিয়া এক বিবৃতিত শ্বৰীফ চৰকাৰৰ মন্ত্ৰী আতাউল্লাহ তাৰাৰে কয় যে ইমৰাণৰ সৈতে কোনো চুক্তি হোৱা নাই। চৰকাৰো তেওঁৰ পক্ষত নহয়। ছ’চিয়েল মিডিয়াত তেওঁ লিখিছে, “ইমৰাণ খানক কোনো চুক্তি বা আপোচৰ প্ৰস্তাৱ দিয়া হোৱা নাই। চৰকাৰে তেওঁক বিৰতি দিছে, এনে কোনো খবৰ সম্পূৰ্ণ মিছা। তেওঁ অপৰাধী। তেওঁক দোষী সাব্যস্ত কৰা হৈছে।”
কিন্তু প্ৰকৃততে কি কৈছিল ছানাউল্লাই? বুধবাৰে তেওঁ কয়, “আমি ইমৰাণৰ সমস্যাৰ ৰাজনৈতিক সমাধান বিচাৰোঁ। কিন্তু তেওঁ সেইটো নিবিচাৰে। তেওঁৰ সৈতে দুবাৰ আপোচ কৰাৰ চেষ্টা কৰা হৈছিল। সেয়া বিফল হ’ল।” পাকিস্তান চৰকাৰৰ ‘প্ৰস্তাৱ’ লৈ কোনে ইমৰাণৰ কাষ চাপিছিল সেই কথাও প্ৰকাশ কৰে ছানাউল্লাই। তেওঁ কয়, “মন্ত্ৰী মহছিন নাকভী আৰু খাইবাৰ পাখতুনখোৱাৰ তদানীন্তন মুখ্যমন্ত্ৰী আলী আমিন গণ্ডাপুৰে ২০২৪ চনৰ ২৬ নৱেম্বৰত প্ৰথম প্ৰচেষ্টা চলাইছিল। দ্বিতীয় প্ৰয়াস কিছুদিন পূৰ্বে একাংশ বিদেশীয়ে কৰিছিল। প্ৰথমে ইমৰাণে এই প্ৰস্তাৱত সন্মতি দিছিল যদিও পিছত চুক্তিৰ পৰা পিছুৱাই যায়।” ছানাউল্লাই লগতে দাবী কৰে যে ইমৰাণ খানে পাকিস্তানৰ বৰ্তমানৰ চৰকাৰখন ওফৰাই পুনৰ প্ৰধানমন্ত্ৰী হ’ব বিচাৰে। সেইবাবেই তেওঁ চুক্তিৰ প্ৰস্তাৱ নাকচ কৰিছে।
উল্লেখ্য যে ২০২৩ চনৰ আগষ্ট মাহত লাহোৰৰ পৰা গ্ৰেপ্তাৰ হোৱা ইমৰাণ খান তেতিয়াৰে পৰাই জে’লত আছে। কাৰাগাৰত এইগৰাকী জ্যেষ্ঠ ৰাজনীতিবিদৰ শাৰীৰিক অৱস্থাৰ অৱনতি ঘটা বুলি পৰিয়ালৰ দাবী। ইমৰাণ খানে সোঁ চকুৰ ৮৫ শতাংশ দৃষ্টিশক্তি হেৰুৱাইছে। ইছলামাবাদৰ এখন চিকিৎসালয়ত ইমৰাণৰ চকুৰ সমস্যাৰ চিকিৎসাৰ দাবী জনাইছে পৰিয়ালৰ লোকে। জে’লত নিৰ্যাতনৰ অভিযোগো উত্থাপন হৈছে।
