উচ্চতম ন্যায়ালয়ে (Suprem Court) বায়ু প্ৰদূষণ ৰোধ (Air pollution prevention)ৰ বাবে দিল্লী (Delhi)ৰ পৰা ৩০০ কিলোমিটাৰৰ ভিতৰত কোনো নতুন কয়লা চালিত তাপবিদ্যুৎ কেন্দ্ৰ স্থাপনৰ ওপৰত নিষেধাজ্ঞা আৰোপ কৰাৰ প্ৰস্তাৱত কেন্দ্ৰৰ পৰা সঁহাৰি বিচাৰিছে। মুখ্য ন্যায়াধীশ সূৰ্য কান্ত, ন্যায়াধীশ জয়মeল্য বাগচি আৰু ন্যায়াধীশ বিপুল পাঞ্চোলিৰ বিচাৰপীঠে প্ৰধানমন্ত্ৰী নৰেন্দ্ৰ মোদী চৰকাৰক কয়লা চালিত সকলো উদ্যোগ ৰাষ্ট্ৰীয় ৰাজধানী অঞ্চলৰ পৰা স্থানান্তৰিত কৰাৰ দাবী সন্দৰ্ভতো নিজৰ স্থিতি ব্যাখ্যা কৰিবলৈ কয়।
সোমবাৰে উচ্চতম ন্যায়ালয়ে কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়, পেট্ৰ’লিয়াম আৰু প্ৰাকৃতিক গেছ মন্ত্ৰালয় আৰু শক্তি মন্ত্ৰালয়ৰ পৰা সঁহাৰি বিচাৰি দিল্লী, উত্তৰ প্ৰদেশ, হাৰিয়ানা আৰু ৰাজস্থান চৰকাৰক কয়লা চালিত উদ্যোগৰ সৈতে জড়িত সকলো অংশীদাৰৰ পৰামৰ্শ আৰু আপত্তি লিপিবদ্ধ কৰিবলৈ জাননী জাৰি কৰিবলৈ নিৰ্দেশ দিয়ে।
দিল্লীৰ বায়ু প্ৰদূষণৰ ওপৰত যান-বাহনৰ প্ৰভাৱ নিয়ন্ত্ৰণৰ ক্ষেত্ৰতো সক্ৰিয় হৈ পৰিছে তিনিজনীয়া বিচাৰপীঠ। ‘কমিছন ফৰ এয়াৰ কোৱালিটী মেনেজমেণ্ট’ৰ (চি এ কিউ এম) পৰামৰ্শৰ ভিত্তিত অহা ১২ মাৰ্চত যান-বাহনৰ জৰিয়তে বায়ু প্ৰদূষণৰ বিষয়টো পুনৰীক্ষণ কৰিব বুলি জানিবলৈ দিয়ে।
সমগ্ৰ দিল্লীত বিভিন্ন গৃহ নিৰ্মাণ আৰু পুনৰ নিৰ্মাণ কাৰ্যকলাপৰ ফলত হোৱা ধূলিৰ সৈতে মোকাবিলা কৰিবলৈ চি এ কিউ এমে প্ৰস্তাৱ কৰা ব্যৱস্থাসমূহৰ সন্দৰ্ভতো শীৰ্ষ ন্যায়ালয়ে সকলো অংশীদাৰৰ পৰা মতামত বিচাৰিছে। ইয়াৰ উপৰি দিল্লী আৰু ইয়াৰ চুবুৰীয়া ৰাজ্যসমূহক বায়ু প্ৰদূষণ নিয়ন্ত্ৰণৰ বাবে ‘শক্তিৰ বিকল্প উৎস’ বিচাৰি উলিওৱাৰ পৰিকল্পনা দাখিল কৰিবলৈ কোৱা হৈছে। এই সন্দৰ্ভত প্ৰস্তাৱটো অহা ১২ মাৰ্চত গোচৰৰ শুনানিৰ সময়ত দাখিল কৰিব লাগিব। উল্লেখ্য যে ২০২৫ চনৰ ডিচেম্বৰ মাহত উচ্চতম ন্যায়ালয়ে নিজৰ পৰ্যবেক্ষণত কৈছিল যে দিল্লী আৰু ৰাষ্ট্ৰীয় ৰাজধানী অঞ্চলত (এন চি আৰ) বায়ু প্ৰদূষণ নিয়ন্ত্ৰণৰ বাবে চৰকাৰে লোৱা পদক্ষেপ সম্পূৰ্ণৰূপে ব্যৰ্থ হৈছে। একে সময়তে উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ বিচাৰপীঠে কৈছিল যে তাৎক্ষণিক ব্যৱস্থাৰ পৰিৱৰ্তে ৰাষ্ট্ৰীয় ৰাজধানীত প্ৰদূষণ নিয়ন্ত্ৰণৰ বাবে দীৰ্ঘম্যাদী পৰিকল্পনাৰ প্ৰয়োজন।
