শীতকাল ওচৰ চাপি অহাৰ লগে লগে দিল্লীবাসীৰ মূৰৰ কামোৰ হৈ পৰে বায়ু প্ৰদূষণ। বৃদ্ধি পোৱা প্ৰদূষণৰ মাত্ৰাই মানুহক অস্বস্তিত পেলাইছে। ইয়াক প্ৰতিৰোধৰ বাবে চৰকাৰে বিভিন্ন পদক্ষেপ ল’বলগা হৈছে। আগন্তুক শীতকালত দিল্লীৰ বায়ু প্ৰদূষণ নিয়ন্ত্ৰণৰ কিছু পৰিকল্পনা ঘোষণা কৰিছে কেন্দ্ৰ আৰু দিল্লী চৰকাৰে। বিষাক্ত বায়ুৰ পৰা হাত সাৰিবলৈ লোৱা পদক্ষেপৰ আভাস দিয়া হৈছে। সোমবাৰে কেন্দ্ৰ আৰু দিল্লী চৰকাৰৰ উচ্চ পৰ্যায়ৰ বৈঠক অনুষ্ঠিত হয়। এই বৈঠকত কেন্দ্ৰীয় পৰিৱেশ মন্ত্ৰী ভূপেন্দ্ৰ যাদৱ, দিল্লীৰ মুখ্যমন্ত্ৰী ৰেখা গুপ্তা, লোক নিৰ্মাণ মন্ত্ৰী পৰৱেশ বাৰ্মা আৰু দিল্লীৰ পৰিৱেশ মন্ত্ৰী মঞ্জিন্দৰ সিং ছিৰছা উপস্থিত থাকে। বৈঠকৰ অন্তত দিল্লীৰ পৰিৱেশ মন্ত্ৰীগৰাকীয়ে কেইবাটাও পৰিকল্পনা ঘোষণা কৰে। ইয়াৰে আটাইতকৈ উল্লেখযোগ্য হ’ল গাড়ী, বাইক বা অটোৰ বাবে প্ৰদূষণ নিয়ন্ত্ৰণৰ প্ৰমাণ-পত্ৰ বাধ্যতামূলক কৰা।
‘প্ৰদূষণৰ প্ৰমাণ-পত্ৰ যদি নাই, পেট্ৰ’ল পাম্পত ইন্ধন নাই’, দিল্লীত এই নীতি কঠোৰ কৰা হ’ব বুলি মঞ্জিন্দৰে কয়। তেওঁ কয়, “দিল্লীৰ সকলো পেট্ৰ’ল পাম্পতে ম্যাদ উকলি যোৱা প্ৰদূষণৰ প্ৰমাণ-পত্ৰ পৰীক্ষাৰ বাবে এক অভিযান আৰম্ভ কৰা হ’ব। অক্টোবৰ মাহত জনসজাগতা অভিযানো আৰম্ভ কৰা হ’ব।” পৰিৱেশ মন্ত্ৰীগৰাকীয়ে কয় যে তিনিটা স্বয়ংক্ৰিয় পৰীক্ষা কেন্দ্ৰৰ জৰিয়তে ২.৫ লাখ বাহনৰ স্বাস্থ্য পৰীক্ষা কৰা হ’ব।
দিল্লী চৰকাৰে ইলেক্ট্ৰিক বাছৰ ওপৰতো গুৰুত্ব আৰোপ কৰিছে। মঞ্জিন্দৰে কয়, “দিল্লী চৰকাৰে আৰু ১৫০ খন ইলেক্ট্ৰিক বাছ পথত চলাব। বৰ্তমান ৰাজধানীত ৫৮৮ খন ইলেক্ট্ৰিক বাছ চলি আছে।” লগতে তেওঁ কয় যে বায়ু প্ৰদূষণ আৰু যান-জঁটৰ সমস্যা সমাধানৰ বাবে চৰকাৰৰ এক বিস্তৃত পৰিকল্পনা আছে। প্ৰদূষণ প্ৰৱণ অঞ্চলত চোৰাংচোৱাগিৰি বৃদ্ধি কৰা হ’ব বুলিও মন্ত্ৰীগৰাকীয়ে কয়।
প্ৰদূষণ ৰোধৰ বাবে পাৰ্কিং মাচুল বৃদ্ধিৰ কথাও চিন্তা কৰিছে চৰকাৰে। তেওঁলোকৰ মতে মাচুল বৃদ্ধিয়ে ব্যক্তিগত বাহনৰ ব্যৱহাৰ হ্ৰাস পাব। মঞ্জিন্দৰে কয় যে ১ নৱেম্বৰৰ পৰা দিল্লীত পাৰ্কিং মাচুল বৃদ্ধি কৰা হ’ব। পাৰ্কিং মাচুল দুগুণ হ’ব পাৰে। ইয়াৰ উপৰি চৰকাৰে কাৰ্যালয়ৰ সময়সূচী সলনি কৰাৰ কথাও চিন্তা কৰিছে। চৰকাৰী আৰু ব্যক্তিগত কাৰ্যালয়ৰ ৫০ শতাংশ কৰ্মচাৰীক ‘ৱৰ্ক ফ্ৰম হোম’ কৰিবলৈও নিৰ্দেশ দিয়া হ’ব পাৰে।
দিল্লীত শীতকালত প্ৰদূষণ এটা ডাঙৰ সমস্যা হৈ পৰে। যোৱাবাৰ প্ৰদূষণৰ মাত্ৰা ইমানেই বৃদ্ধি পাইছিল যে অৱশেষত উচ্চতম ন্যায়ালয়ে বিষয়টোত হস্তক্ষেপ কৰিবলগীয়া হৈছিল। পৰিস্থিতি এনে এটা স্তৰত উপনীত হয় যে আদালতে স্পষ্টভাৱে উল্লেখ কৰে যে দিল্লী আৰু ৰাষ্ট্ৰীয় ৰাজধানী অঞ্চলৰ বায়ু প্ৰদূষণ নিয়ন্ত্ৰণৰ বাবে চৰকাৰে লোৱা পদক্ষেপ ‘সম্পূৰ্ণৰূপে বিফল’ হৈছে। এইবাৰ শীতকাল অহাৰ আগতেই চৰকাৰৰ ভিতৰতে প্ৰদূষণক লৈ উদ্বেগ আৰম্ভ হৈছে।
