পেট্ৰ’ল-ডিজেল (Petrol-diesel)ৰ দৰে ইন্ধন তেলৰ আবকাৰী শুল্ক কিয় হ্ৰাস কৰা সন্দৰ্ভত কেন্দ্ৰীয় পেট্ৰ’লিয়াম মন্ত্ৰী হৰদীপ সিং পুৰী (Petroleum Minister Hardeep Singh Puri)য়ে ব্যাখ্যা কৰে। লগতে কয় যে লকডাউন সম্পৰ্কীয় সকলো খবৰ ভুৱা, তেনে কোনো সম্ভাৱনা নাই। সম্প্ৰতি লকডাউনক লৈ বিভিন্ন জল্পনা-কল্পনা বিয়পি পৰিছে। মানুহ বিমোৰত পৰিছে। এইবাৰ কেন্দ্ৰীয় মন্ত্ৰীয়ে সেই জল্পনা-কল্পনাক নস্যাৎ কৰিছে।
শুকুৰবাৰে হৰদীপ সিঙে কয় যে বৰ্তমানৰ পৰিস্থিতিত চৰকাৰৰ বাবে মাত্ৰ দুটা বিকল্পহে মুকলি। সকলো দিশ বিবেচনা কৰি পেট্ৰ’ল-ডিজেলৰ মূল্যবৃদ্ধিৰ পৰা দেশবাসীক ৰক্ষা কৰিবলৈ চৰকাৰে আবকাৰী শুল্ক হ্ৰাস কৰাৰ সিদ্ধান্ত গ্ৰহণ কৰিছে। অৱশ্যে ইয়াৰ ফলত চৰকাৰৰ আৰ্থিক ক্ষতি হ’ব বুলিও তেওঁ বুজাই দিয়ে।
কেন্দ্ৰীয় পেট্ৰ’লিয়াম মন্ত্ৰালয়ে পেট্ৰ’ল-ডিজেলৰ আবকাৰী শুল্ক হ্ৰাস (Reduce excise duty) কৰাৰ বাবে এক অধিসূচনা জাৰি কৰিছে। ইয়াৰ পিছতে হৰদীপ সিঙে চৰকাৰৰ এই পদক্ষেপৰ বিষয়ে এক্স পোষ্টত লিখিছে, “বিগত এমাহত আন্তঃৰাষ্ট্ৰীয় বজাৰত খাৰুৱা তেলৰ মূল্য আকাশলংঘী হৈছে। পেট্ৰ’ল আৰু ডিজেলৰ মূল্য প্ৰতি বেৰেলত ৭০ ডলাৰৰ পৰা প্ৰায় ১২২ ডলাৰলৈ বৃদ্ধি পাইছে। ফলস্বৰূপে সমগ্ৰ বিশ্বৰ গ্ৰাহকে পেট্ৰ’ল আৰু ডিজেলৰ বাবে অধিক ধন দিবলগীয়া হৈছে। দক্ষিণ-পূব এছিয়াৰ দেশসমূহত ৩০-৫০ শতাংশ, উত্তৰ আমেৰিকাৰ দেশসমূহত ৩০ শতাংশ, ইউৰোপত ২০ শতাংশ মূল্য বৃদ্ধি পাইছে। আফ্ৰিকাৰ দেশসমূহত ৫০ শতাংশ বৃদ্ধি পাইছে।’’
ইয়াৰ পিছত কেন্দ্ৰীয় মন্ত্ৰীগৰাকীয়ে কয় যে এই পৰিস্থিতিত মোদী চৰকাৰৰ বাবে দুটা বিকল্প মুকলি। প্ৰথমতে, আন দেশৰ দৰে পেট্ৰ’ল-ডিজেলৰ দাম বৃদ্ধি নকৰি ভাৰতীয় তেল কোম্পানীক ক্ষতিপূৰণ দিয়া। দ্বিতীয়তে, চৰকাৰৰ আৰ্থিক হেঁচা মানি লৈ দেশবাসীক সুৰক্ষা দিয়া। ওপৰৰ কথাখিনি বিবেচনা কৰি দ্বিতীয়টো বিকল্প বাছি লোৱা হৈছে বুলি হৰদীপে কয়। কেন্দ্ৰীয় মন্ত্ৰীগৰাকীয়ে আৰু কয় যে আন্তঃৰাষ্ট্ৰীয় বজাৰত আকাশলংঘী মূল্যবৃদ্ধিৰ বাবে ভাৰতীয় কোম্পানীসমূহৰ বৃহৎ লোকচান লাঘৱ কৰাৰ বাবে চৰকাৰৰ এই পদক্ষেপ।
পুৰীয়ে কয় যে ভাৰতত লকডাউনৰ উৰাবাতৰি ভিত্তিহীন আৰু মিছা। মন্ত্ৰীগৰাকীয়ে কয়, “মই স্পষ্টকৈ ক’ব বিচাৰো যে ভাৰত চৰকাৰে এনেকুৱা একো চিন্তা কৰা নাই। বৰ্তমানৰ পৰিস্থিতিত আমি শান্ত আৰু ঐক্যবদ্ধ হৈ থাকিব লাগিব। আমি অধিক দায়বদ্ধ হ’ব লাগিব। সকলোৱে আতংক বা উৰাবাতৰি বিয়পোৱাৰ পৰা বিৰত থাকক।”
