শনিবাৰে পুৱা পঞ্জাবৰ মন্ত্ৰী (Minister of Punjab) সঞ্জীৱ অৰোৰা (Sanjiv Arora)ৰ বাসগৃহত ইডিয়ে অভিযান (Raid at home) চলায়। তদন্তকাৰী সংস্থাটোৰ সূত্ৰ অনুসৰি, এই তালাচী অভিযান মন্ত্ৰীগৰাকী আৰু তেওঁৰ একাংশ সহযোগীৰ বিৰুদ্ধে আৰ্থিক জালিয়াতিৰ গোচৰৰ সৈতে জড়িত। এবছৰৰ ভিতৰত তিনিবাৰকৈ মন্ত্ৰীগৰাকীৰ বাসগৃহ আৰু কেইবাটাও ঠিকনাত অভিযান চলাইছে ইডিয়ে।
উল্লেখ্য যে এমাহত দুবাৰকৈ ইডিয়ে অনুসন্ধান অভিযান চলাইছে। শনিবাৰেও তদন্তকাৰী সংস্থাটোৱে মন্ত্ৰীগৰাকীৰ বাসগৃহকে ধৰি চাৰিটা ঠিকনাত তালাচী অভিযান চলায়। যোৱা এপ্ৰিল মাহতো মন্ত্ৰী অৰোৰাৰ কেইবাটাও ঠিকনাত অনুসন্ধান অভিযান চলোৱা হয়। সূত্ৰ অনুসৰি, সেই সময়ত চণ্ডীগড় আৰু দিল্লী-এনচিআৰত মন্ত্ৰীগৰাকীৰ কেইবাটাও ঠিকনাত তালাচী চলোৱা হৈছিল। শনিবাৰে ইডিৰ তালাচী অভিযান সন্দৰ্ভত পঞ্জাবৰ মুখ্যমন্ত্ৰী ভগৱন্ত মানে কয়, “বিজেপিয়ে কেন্দ্ৰীয় সংস্থাটোক অপব্যৱহাৰ কৰিছে।
আজিও বিজেপিৰ ইডিয়ে সঞ্জীৱ অৰোৰাৰ ঘৰত অভিযান চলাইছে। এবছৰৰ ভিতৰত তৃতীয়বাৰৰ বাবে ইডি অৰোৰাৰ ঘৰলৈ গৈছে। কিন্তু কেন্দ্ৰীয় তদন্তকাৰী সংস্থাটোৱে অনুসন্ধান অভিযানত একো নাপালে।” কেন্দ্ৰীয় চৰকাৰৰ বিৰুদ্ধে ক্ষোভ প্ৰকাশ কৰিছে মুখ্যমন্ত্ৰী মানে। তেওঁ কয় যে ইডি আৰু বিজেপিয়ে মিলি ইয়াৰ ষড়যন্ত্ৰ কৰিছে। ২০২৪ চনত লুধিয়ানা (পশ্চিম)ৰ বিধায়কগৰাকীৰ বিৰুদ্ধে আৰ্থিক অপব্যৱহাৰৰ অভিযোগ উত্থাপন হৈছিল। জানিব পৰা মতে, শনিবাৰে ইডিৰ দলটোৱে দিল্লী, গুৰুগ্ৰাম আৰু চণ্ডীগড়ত তালাচী অভিযান চলায়।
