শুভেন্দু অধিকাৰীৰ ঘনিষ্ঠ সহযোগী চন্দ্ৰনাথ ৰথৰ (Chandranath Murder Case) হত্যাকাণ্ডৰ গোচৰত তদন্তকাৰী দলে তিনিজন লোকক গ্ৰেপ্তাৰ কৰিছে। উত্তৰ প্ৰদেশৰ পৰা গ্ৰেপ্তাৰ কৰিছে তিনিওজন সন্দেহযুক্ত লোকক। চন্দ্ৰনাথৰ হত্যাকাণ্ডৰ তদন্তৰ বাবে গঠন কৰা হৈছে বিশেষ তদন্তকাৰী দল।
এছ আই টিৰ এটা দলে আক্ৰমণকাৰীক বিচাৰি উত্তৰ প্ৰদেশত অভিযান চলাইছিল। দেওবাৰে নিশা বিশেষ অভিযানত তাৰ পৰাই তিনিওজনক গ্ৰেপ্তাৰ কৰে। গ্ৰেপ্তাৰ হোৱা লোকসকলৰ নাম হ’ল মায়ংক শৰ্মা, বিকি মৌৰ্য আৰু ৰাজ সিং। জানিব পৰা মতে, গ্ৰেপ্তাৰ হোৱা অভিযুক্তৰ ভিতৰত এজন পেছাদাৰী ‘শ্বুটাৰ’ আছে।
সূত্ৰৰ পৰা জানিব পৰা মতে, ধৃত লোকসকলৰ বিহাৰ সংযোগো আছে। তেওঁলোকক ইতিমধ্যে কলকাতালৈ অনা হৈছে। সোমবাৰে আটকাধীন লোকসকলক আদালতত হাজিৰ কৰোৱা হ’ব। যোৱা ৬ মে’ৰ নিশা মধ্যমগ্ৰামত গুলীয়াই হত্যা কৰিছিল চন্দ্ৰনাথক।
চন্দ্ৰনাথৰ গাড়ীৰ সন্মুখত আন এখন চাৰিচকীয়া বাহন আহিছিল। ফলত চন্দ্ৰনাথৰ গাড়ীখন ৰৈ যাবসগা হয়। সেই সময়তে দুয়োফালৰ পৰা দুখন বাইকত উঠি অহা দুষ্কৃতিকাৰীয়ে একেৰাহে গুলীচালনা কৰে। থিতাতে মৃত্যু হয় চন্দ্ৰনাথৰ। তেওঁৰ চালকজন এতিয়াও চিকিৎসাধীন হৈ আছে।
চন্দ্ৰনাথৰ হত্যাকাণ্ডৰ তদন্তৰ বাবে গঠন কৰা দলটোত এছটিএফ আৰু ৰাজ্যিক আৰক্ষীৰ চিআইডিৰ বিষয়াও আছে। প্ৰথম অৱস্থাত তদন্তকাৰীৰ মতে হত্যাকাণ্ডত ব্যৱহৃত গাড়ীখন ঝাৰখণ্ডৰ পৰা অনা হৈছিল। গাড়ীখনৰ পৰাই বালি টোল প্লাজালৈ অনলাইনত পইচা পঠিওৱা হৈছিল। সূত্ৰসমূহে জনোৱা মতে, উক্ত তথ্যৰ ভিত্তিত অভিযুক্তৰ সন্ধান আৰম্ভ হৈছে।
আৰক্ষীৰ সূত্ৰ অনুসৰি, চন্দ্ৰনাথক হত্যাৰ পৰিকল্পনা কমেও ডেৰ মাহ পূৰ্বে ৰচনা কৰা হৈছিল। চন্দ্ৰনাথৰ সেই সময়ত কাৰোবাৰ লগত কাজিয়া হৈছিল নেকি, যাৰ বাবে হয়তো তেওঁক হত্যা কৰাৰ উদ্দেশ্য আছিল, তাৰো তদন্ত চলি আছে।
ঘটনাৰ দিনাই হত্যাকাণ্ডত ব্যৱহৃত গাড়ীখন আৰক্ষীয়ে জব্দ কৰে। গাড়ীখনৰ নম্বৰ প্লেটখন ভুৱা। ইয়াৰ পিছতে দুষ্কৃতিকাৰীৰ দুখন বাইকো উদ্ধাৰ কৰা হয়। অৱশ্যে আৰক্ষীয়ে প্ৰথমে দুয়োখন বাইকৰ নম্বৰ প্লেট ভুৱা বুলি অনুমান কৰিছে।
