আবুধাবি (Abu Dhabi) অভিমুখী ইতিহাদৰ বিমানত অগ্নিকাণ্ড (Fire on plane)। মঙলবাৰে পুৱা চেন্নাই আন্তঃৰাষ্ট্ৰীয় বিমানবন্দৰৰ পৰা উৰণৰ সময়তে বিমানখনৰ ডেউকাত জুই লাগে। ঘটনাৰ পিছতে আতংকিত হৈ পৰে যাত্ৰীসকল। এই ঘটনা লক্ষ্য কৰাৰ লগে লগে পাইলটে বিমান পৰিবহণ নিয়ন্ত্ৰণৰ সৈতে যোগাযোগ কৰে। লগে লগে বিমানখনৰ যাত্ৰা বাতিল কৰা হয়। বিমানবন্দৰ কৰ্তৃপক্ষই জনোৱা মতে, বিমানখনত ২৮০ জন যাত্ৰী আছিল।
পাইলটে প্ৰথমে এই বিষয়টো লক্ষ্য কৰিছিল। সতৰ্কতামূলক ব্যৱস্থা হিচাপে বাতিল কৰা হয় বিমানখন। ক্ষন্তেকতে যাত্ৰীসকলক বিমানৰ পৰা নমাই আন স্থানলৈ স্থানান্তৰিত কৰা হয়। বিমানখনত অগ্নিকাণ্ডৰ খবৰ পাই কেইবাখনো অগ্নিনিৰ্বাপক বাহিনীৰ গাড়ী ঘটনাস্থলীত উপস্থিত হয়। কেইবা মিনিটৰ চেষ্টাৰ অন্তত নিয়ন্ত্ৰণলৈ অনা হয় জুই। কিন্তু এই ঘটনাত কোনো বৃহৎ ক্ষতি বা প্ৰাণহানি হোৱা নাই।
তৎকালীন ব্যৱস্থা লোৱাৰ বাবে এটা ডাঙৰ বিপদ ৰোধ কৰা সম্ভৱ হয়। অৱশ্যে বিমানখনৰ ক্ষতিসাধন হয়। বিমানখনৰ উইঙত কেনেদৰে জুই লাগিল তাৰ তদন্ত অব্যাহত আছে। আতংকিত যাত্ৰীসকলে কয় যে যাত্ৰাত এক বৃহৎ দুৰ্যোগৰ পৰা ৰক্ষা পৰে, কাৰণ তেওঁলোকে টেক-অফৰ ঠিক সময়তে জুই লক্ষ্য কৰিছিল। লগতে কয় যে যদি এই ঘটনাটো আকাশৰ মাজত সংঘটিত হ’লহেঁতেন তেন্তে ই এক বৃহৎ দুৰ্যোগ হ’ব পাৰিলেহেঁতেন। কিন্তু পাইলটৰ ক্ষীপ্ৰ পদক্ষেপে দুৰ্যোগ ৰোধ কৰিলে। অৱশ্যে বিমান সংস্থাটোৰ কোনো প্ৰতিক্ৰিয়া পোৱা হোৱা নাই।
