প্ৰধানমন্ত্ৰী নৰেন্দ্ৰ মোদীৰ (PM Modi) চৰকাৰে স্বচ্ছ শক্তি উৎপাদন বৃদ্ধি আৰু বৈদেশিক মুদ্ৰা ৰাহিৰ বাবে কয়লা ভিত্তিক গেছ উৎপাদনত দৃষ্টি নিক্ষেপ কৰিছে। এই সন্দৰ্ভত প্ৰকল্পসমূহক উৎসাহিত কৰাৰ উদ্দেশ্যে বুধবাৰে কেন্দ্ৰীয় কেবিনেটত ৩৭,৫০০ কোটি টকাৰ এক প্ৰৰোচনামূলক আঁচনিত অনুমোদন জনায়।
প্ৰধানমন্ত্ৰীৰ অধ্যক্ষতাত অর্থনৈতিক পৰিক্ৰমা কেবিনেট কমিটীৰ বৈঠকৰ অন্তত তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱে কয় যে এই প্ৰকল্পৰ বাবে ৩৭,৫০০ কোটি টকাৰ বাজেট ধাৰ্য কৰা হৈছে আৰু ইয়াৰ লগত প্ৰায় ৩,০০০ লাখ কোটি টকাৰ বিনিয়োগ জড়িত হ’ব। ৭.৫ কোটি টন কয়লাৰ পৰা গেছ উৎপাদনৰ বাবে এই প্ৰকল্পসমূহ স্থাপন কৰা হ’ব।
উল্লেখ্য যে ঔদ্যোগিক প্ৰযুক্তিৰ পৰিভাষাত কয়লা ভিত্তিক গেছ উৎপাদনক ‘কয়লা গেছিফিকেচন’ বুলি কোৱা হয়। এইটো এনে এক প্ৰক্ৰিয়া য’ত কয়লা প্ৰত্যক্ষভাৱে জ্বলোৱাৰ পৰিৱৰ্তে ভাপ আৰু সীমিত অক্সিজেনৰ উপস্থিতিত উচ্চ উষ্ণতা আৰু চাপত প্ৰক্ৰিয়াকৰণ কৰি ‘চিংগেছ’ বা ‘সংশ্লেষণ গেছ’ উৎপন্ন কৰা হয়।
এই প্ৰক্ৰিয়াই মিথানল, সাৰ, হাইড্ৰজেন আৰু ৰাসায়নিক পদাৰ্থ উৎপাদনত সহায় কৰে, যাৰ ফলত আমদানিকৃত তেল (৮৩ শতাংশ), মিথানল (৯০ শতাংশতকৈ অধিক) আৰু এমোনিয়াৰ (১৩-১৫ শতাংশ) ওপৰত নিৰ্ভৰশীলতা হ্ৰাস পায়।
কয়লাক গেছীয় ইন্ধনলৈ ৰূপান্তৰিত কৰাৰ এই আধুনিক পদ্ধতি প্ৰৱৰ্তন কৰিলে দেশৰ শক্তি খণ্ডত আমদানি নিৰ্ভৰশীলতা নিয়ন্ত্ৰণ কৰাটো সম্ভৱ হ’ব বুলি কেন্দ্ৰই বিশ্বাস কৰে। ইৰাণ যুদ্ধৰ পৰিপ্ৰেক্ষিতত তেল আৰু গেছৰ আমদানি বৃদ্ধি পোৱাৰ লগে লগে প্ৰধানমন্ত্ৰী মোদীয়ে ইতিমধ্যে দেশবাসীক শক্তি ৰাহি কৰিবলৈ আহ্বান জনাইছে।
সেই বিষয়ক স্পৰ্শ কৰি বৈষ্ণৱে বুধবাৰে কয়, “দেশত ৪০ কোটি ১০ লাখ টন জনাজাত কয়লা মজুত আছে, যিটো অহা ২০০ বছৰৰ বাবে যথেষ্ট। বৰ্তমানৰ ভূ-ৰাজনৈতিক পৰিস্থিতিৰ বিষয়ে আমি সকলোৱে জানো। গতিকে আমি আত্মনিৰ্ভৰশীল হ’বলৈ প্ৰয়োজনীয় সিদ্ধান্ত ল’ব লাগিব।
এই প্ৰেক্ষাপটত কয়লা গেছীকৰণৰ ক্ষেত্ৰত আজি এক ডাঙৰ সিদ্ধান্ত লোৱা হৈছে।” বৈষ্ণৱে কয় যে ‘কয়লা গেছিফিকেশন’ প্ৰকল্প আৰম্ভ কৰাৰ লক্ষ্য ২০৩০ চনৰ ভিতৰত ১০ কোটি টন কয়লা গেছিফিকেচন ক্ষমতা লাভ কৰা। ভাৰতত ঘৰুৱা শক্তিৰ প্ৰয়োজনীয়তা পূৰণৰ বাবে এতিয়াও কয়লা মূল ভেটি। দেশৰ মুঠ শক্তিৰ প্ৰয়োজনীয়তাৰ ৫৫ শতাংশতকৈ অধিক কয়লাই যোগান ধৰে।
যিহেতু ভাৰত বিশ্বৰ দ্বিতীয় বৃহত্তম কয়লা উৎপাদনকাৰী আৰু গ্ৰাহক, ভাৰতৰ শক্তিৰ চাহিদা বৃদ্ধিৰ লগে লগে কয়লাৰ ব্যৱহাৰো যথেষ্ট বৃদ্ধি পাব বুলি কেন্দ্ৰই বিশ্বাস কৰে। লগতে বিশাল কয়লাৰ মজুতৰ সদ্ব্যৱহাৰ কৰাৰ লক্ষ্যৰে ‘কয়লা গেছিফিকেচন’ প্ৰকল্পটোক লক্ষ্য কৰি লোৱা হৈছে।
