দিল্লীত পুনৰ বাছৰ ভিতৰত এগৰাকী মহিলাক দলবদ্ধ ধৰ্ষণৰ (Delhi Rape) অভিযোগ উত্থাপিত হৈছে। ১৪ বছৰ পূৰ্বে ২০১২ চনত দিল্লীত বাছৰ ভিতৰত এগৰাকী যুৱতীক দলবদ্ধ ধৰ্ষণ কৰা হৈছিল। পিছত চিকিৎসালয়ত চিকিৎসাধীন হৈ থকা অৱস্থাত তেওঁৰ মৃত্যু হয়।
ইয়াকে লৈ সংগ্ৰ দেশতেই চাঞ্চল্যৰ সৃষ্টি হয়। এইবাৰ সেই ঘটনাৰ স্মৃতি সোঁৱৰাই দিল্লীৰ বাছত এগৰাকী মহিলাক দলবদ্ধ ধৰ্ষণৰ অভিযোগ উত্থাপন হৈছে। মহিলাগৰাকীৰ অভিযোগৰ ভিত্তিত ইতিমধ্যে আৰক্ষীয়ে বাছচালক আৰু কণ্ডাক্টৰক গ্ৰেপ্তাৰ কৰিছে।
দিল্লী আৰক্ষীয়ে জনোৱা মতে, ব্যক্তিগত বাছত এগৰাকী মহিলাক দলবদ্ধ ধৰ্ষণ কৰাৰ অভিযোগ দাখিল কৰা হৈছে। ইতিমধ্যে মহিলাগৰাকীৰ অভিযোগৰ ভিত্তিত এফআইআৰ ৰুজু কৰা হৈছে। দুই অভিযুক্তকো গ্ৰেপ্তাৰ কৰা হৈছে। ঘটনাত ব্যৱহৃত বাছখনো জব্দ কৰা হৈছে বুলি আৰক্ষীয়ে জানিবলৈ দিয়ে।
সংবাদ সংস্থা এএনআইৰ মতে, দিল্লী আৰক্ষীয়ে জানিবলৈ দিয়া মতে, এই ঘটনাৰ সৈতে জড়িত সকলো সম্ভাৱ্য দিশৰ তদন্ত চলি আছে। ধৃত লোক দুজনৰ পৰিচয় এতিয়াও আৰক্ষীয়ে প্ৰকাশ কৰা নাই। অৱশ্যে ধৃত লোককেইজন বাছখনৰ চালক আৰু কণ্ডাক্টৰ বুলি বিভিন্ন সূত্ৰই দাবী কৰিছে। অভিযোগ উত্থাপন হৈছে যে তেওঁলোকে দুদিন পূৰ্বে মহিলাগৰাকীক দলবদ্ধ ধৰ্ষণ কৰিছিল।
সংবাদ সংস্থা পিটিআইৰ তথ্য অনুসৰি, যোৱা ১২ মে’ত এখন শ্লীপাৰ বাছত সংঘটিত হোৱা এই ঘটনাৰ অভিযোগ। ইতিমধ্যে এই ঘটনাত মহিলাগৰাকীৰ বক্তব্য লিপিবদ্ধ কৰিছে আৰক্ষীয়ে। দুজন লোকক আটক কৰাৰ লগতে বাছখনো জব্দ কৰা হৈছে। অৱশ্যে তদন্তকাৰীয়ে এই সন্দৰ্ভত সম্প্ৰতি বিতংভাৱে কোনো মন্তব্য কৰা নাই।
দিল্লীৰ এই ঘটনাই ২০১২ চনৰ ১৬ ডিচেম্বৰৰ ১৪ বছৰ আগৰ ঘটনাটোৰ কথা মনত পেলাই দিয়ে। ২৩ বছৰীয়া পেৰামেডিকেল ছাত্ৰী এগৰাকী বন্ধুৰ সৈতে চিনেমা চাই উভতি আহিছিল। দক্ষিণ দিল্লীৰ মুনিৰ্কাৰ পৰা বাছত উঠিছিল। সেই বাছখনত তেওঁক দলবদ্ধ ধৰ্ষণ কৰা হৈছিল। অভিযুক্তৰ ভিতৰত এজন নাবালক আছিল।
উক্ত ঘটনাত সমগ্ৰ দেশতে প্ৰতিবাদ আৰু বিক্ষোভ আৰম্ভ হৈছিল। ঘটনাটোৱে সেই সময়ৰ কেন্দ্ৰীয় চৰকাৰকো জোকাৰি গৈছিল। প্ৰতিবাদ আৰু বিক্ষোভৰ সন্মুখত কেন্দ্ৰই মহিলা সুৰক্ষা আৰু সবলীকৰণৰ বাবে এক বিশেষ পুঁজি সৃষ্টিৰ সিদ্ধান্ত গ্ৰহণ কৰে।
