উত্তৰ প্ৰদেশত ভয়ংকৰ বতৰৰ (Up Hits Storm) পৰিস্থিতিৰ বাবে কেইবাজনো লোকৰ মৃত্যু। প্ৰবল বৰষুণ, ধুমুহা, বজ্ৰপাতৰ ফলত ইখন জিলাৰ পিছত সিখন জিলাত ইটোৰ পিছত সিটোকৈ মৃত্যুৰ ঘটনা ঘটো। মাত্ৰ এদিনতে ৰাজ্যখনত ৩৩ জন লোকে প্ৰাণ হেৰুৱায়। সংবাদ মাধ্যমৰ সূত্ৰ অনুসৰি, বুধবাৰে উত্তৰ প্ৰদেশৰ পাঁচখন জিলাত মুষলধাৰ বৰষুণ হয়।
এই জিলাকেইখনত বজ্ৰপাতো হয়। পাঁচখন জিলাত মুঠ ৩৩ জন লোকে প্ৰাণ হেৰুৱায় আৰু বহু লোক আহত হয়। উত্তৰ প্ৰদেশত প্ৰতিকূল বতৰৰ বাবে ইটোৰ পিছত সিটোকৈ প্ৰাণ হেৰুওৱাৰ ঘটনা সংঘটিত হৈছে ভাদোহী, ফতেহপুৰ, বুদাউন, চান্দাউলি, সোণভদ্ৰা আদি ঠাইত।
ইয়াৰে ভাদোহী জিলাত ১৬ জন, ফাতেহপুৰত ৯ জন, বুদৌনত ৫ জন, চান্দাউলিত ২ জন আৰু সোণভদ্ৰাত এজন লোকে বজ্ৰপাতৰ ফলত প্ৰাণ হেৰুৱাইছে। ইতিমধ্যে মুখ্যমন্ত্রী যোগী আদিত্যনাথে নিহতসকলৰ পৰিয়ালৰ কাষত থকাৰ আশ্বাস দিছে৷
দুৰ্যোগত নিহতসকলৰ পৰিয়ালক ক্ষতিপূৰণ দিয়াৰ কথাও ঘোষণা কৰিছে। ২৪ ঘণ্টাৰ ভিতৰত ক্ষতিগ্ৰস্ত পৰিয়ালসমূহৰ ওচৰলৈ সাহায্য সামগ্ৰী প্ৰেৰণৰ নিৰ্দেশ দিছে। ভাদোহী প্ৰশাসনৰ এগৰাকী বিষয়াই জনোৱা মতে, বজ্ৰপাত আৰু ধাৰাসাৰ বৰষুণৰ বাবে বহু ঠাইত গছ-গছনি আৰু বিদ্যুতৰ খুঁটা উভালি পৰিছে।
লগতে বহু ঘৰ ভাঙি যোৱাৰ খবৰ পোৱা গৈছে। কেইবাটাও স্থানত মোবাইল নেটৱৰ্ক বিঘিনি ঘটিছে। যাৰ বাবে উদ্ধাৰ কাৰ্যত পলম হৈছে। ভাদোহী আৰক্ষীয়ে জনোৱা মতে, দুটা পৃথক স্থানত ভয়াৱহ ধূলিৰ ধুমুহাৰ খবৰ পোৱা গৈছে। ইয়াৰ বাবে ১৬ জন লোকৰ মৃত্যু হৈছে।
আহত হয় কমেও ছয়জন। ইয়াৰে দুজনৰ অৱস্থা সংকটজনক। আৰক্ষীয়ে জনোৱা মতে, ফতেহপুৰত আৰু ১৬ জন লোক আহত হৈছে। নিহতসকলৰ ভিতৰত আছে ৫ গৰাকী মহিলা। প্ৰশাসনৰ সূত্ৰ অনুসৰি, আন জিলাতো ধূলিৰ ধুমুহাৰ খবৰ পোৱা গৈছে।
ধুমুহা বতাহৰ ফলত গছ উভালি পৰাৰ বাবে বহু লোক আহত হৈছে। এনে পৰিস্থিতিত জিলাসমূহৰ আৰক্ষী প্ৰশাসনক সজাগ হৈ থাকিবলৈ মুখ্যমন্ত্ৰীয়ে নিৰ্দেশ দিছে। শস্যৰ ক্ষতিৰ প্ৰতিবেদন দাখিল কৰিবলৈও নিৰ্দেশ দিছে।
