অৱশেষত কংগ্ৰেছে ঘোষণা কৰিলে কেৰালাৰ নতুন মুখ্যমন্ত্ৰীৰ নাম। কংগ্ৰেছৰ শীৰ্ষ নেতৃত্বই দক্ষিণৰ ৰাজ্যখনৰ মুখ্যমন্ত্ৰী হিচাপে ভি ডি সতীশনক নিৰ্বাচন কৰে।
বৃহস্পতিবাৰে দিল্লীত এক সংবাদমেলযোগে কংগ্ৰেছৰ সাধাৰণ সম্পাদক তথা কেৰালাৰ ভাৰপ্ৰাপ্ত বিষয়া দীপা দাসমুঞ্চীয়ে সতীশনৰ নাম ঘোষণা কৰে। তেওঁৰ লগত আছিল কংগ্ৰেছ নেতা অজয় মাকেন, মুকুল ৱাছনিক আৰু জয়ৰাম ৰমেশ।
কংগ্ৰেছ নেতৃত্বাধীন মিত্ৰজোঁট ইউডিএফে কেৰালাত ১০২ খন আসন লাভ কৰিবলৈ সক্ষম হৈছে। কিন্তু ভোটগণনাৰ ১০ দিন পাছতো ৰাজ্যখনত কোন মুখ্যমন্ত্রী হ’ব সেয়া কংগ্রেছ নেতৃত্বই সিদ্ধান্ত ল’ব পৰা নাছিল৷
বিগত বিধানসভাৰ বিৰোধী দলপতি সতীশনৰ উপৰি কংগ্ৰেছৰ সাংগঠনিক সাধাৰণ সম্পাদক কে চি বেণুগোপাল আৰু জ্যেষ্ঠ নেতা ৰমেশ চেন্নীথালা মুখ্যমন্ত্ৰী হোৱাৰ দৌৰত আছিল। ইয়াৰ পূৰ্বে কংগ্ৰেছৰ সূত্ৰই জনায় যে কংগ্ৰেছ বিধায়িনী দলে বেণুগোপালৰ নাম মুখ্যমন্ত্ৰী হিচাপে প্ৰস্তাৱ কৰিছে।
কিন্তু বিধায়কসকলৰ এটা অংশই পুনৰ দাবী উত্থাপন কৰে যে সতীশনক মুখ্যমন্ত্রী বনাব লাগে। এই ফৈদটোৰ যুক্তি আছিল যে ২০২১ চনৰ বিধানসভা নিৰ্বাচনত ইউডিএফ আৰু কংগ্ৰেছৰ দুৰ্ভাগ্যজনক পৰাজয়ৰ পিছত দলটোক পুনৰ জয়ৰ পথলৈ অনা মূল ব্যক্তি সতীশনেই।
অৱশেষত কংগ্ৰেছে এই সতীশনকে বাছনি কৰে। উল্লেখ্য যে সতীশন কেইবাবাৰো বিধায়ক হিচাপে নিৰ্বাচিত হৈছে। কেৰালাৰ এৰ্নাকুলাম জিলাৰ পৰাভুৰ সমষ্টিৰ বিধায়ক তেওঁ। দলৰ তৃণমূল কৰ্মীৰ মাজত সতীশন অতি জনপ্ৰিয়।
উল্লেখ্য যে বুধবাৰে দিল্লীৰ কংগ্ৰেছ সভাপতি মল্লিকাৰ্জুন খাৰ্গেৰ ঘৰত ৰাহুল গান্ধীকে ধৰি দলৰ শীৰ্ষ নেতাসকলে প্ৰায় ৪০ মিনিটৰ এক বৈঠকত মিলিত হয়।
ইয়াৰ পিছতে কংগ্ৰেছৰ সাধাৰণ সম্পাদক জয়ৰাম ৰমেশে কয় যে কেৰালাৰ পৰৱৰ্তী মুখ্যমন্ত্ৰীৰ সিদ্ধান্ত বৃহস্পতিবাৰে ঘোষণা কৰা হ’ব। সেই অনুসৰি বৃহস্পতিবাৰে সতীশনৰ নাম কংগ্ৰেছ বিধায়িনী দলৰ নেতা হিচাপে ঘোষণা কৰা হয়। অৱশ্যে তেওঁ কেতিয়া শপত ল’ব সেয়া এতিয়াও ঘোষণা কৰা হোৱা নাই।
