নীট বিতৰ্কৰ কেন্দ্ৰবিন্দুত ৰাজস্থানৰ বিৱাল পৰিয়াল। উল্লেখ্য যে ২০২৬ চনৰ NEET-UG পৰীক্ষাৰ প্ৰশ্নকাকত ফাদিলৰ ঘটনাত চিবিআয়ে একেটা পৰিয়ালৰ তিনিজন সদস্যক গ্ৰেপ্তাৰ কৰিছে। তদন্তকাৰীৰ সূত্ৰ অনুসৰি, ২০২৫ চনৰ নীটত একেটা পৰিয়ালৰ পাঁচজন সদস্যই একেলগে পৰীক্ষাত উত্তীৰ্ণ হৈছিল।
সেই সময়ত নীট কেলেংকাৰীৰ অভিযুক্ত দীনেশ বিৱালে ছ’চিয়েল মিডিয়াত লিখিছিল, “আজি পৰিয়ালটোৰ বাবে আটাইতকৈ গৌৰৱৰ মুহূৰ্ত। পাঁচজনে মেডিকেল পৰীক্ষা ক্লিয়াৰ কৰি চৰকাৰী মেডিকেল কলেজত নামভৰ্তি কৰিছে।” এইবাৰ সেই ছ’চিয়েল মিডিয়াৰ বাৰ্তাটো তদন্তকাৰীৰ দৃষ্টিগোচৰ হৈছে।
ধাৰাবাহিক ঘটনাত আৰক্ষীয়ে এইবাৰৰ নীট কেলেংকাৰীত দীনেশ, তেওঁৰ ভাতৃ মংগিলাল আৰু ভতিজাক বিকাশক গ্ৰেপ্তাৰ কৰিছে। বিকাশে নিজে ছাৱাই মাধোপাৰু চিকিৎসা মহাবিদ্যালয়ত চিকিৎসা বিজ্ঞানৰ শিক্ষা গ্ৰহণ কৰি আছে। গ্ৰেপ্তাৰৰ পিছত তদন্তকাৰীয়ে গম পায় যে ২০২৫ চনত পৰিয়ালটোৰ পাঁচজন সদস্যই একেলগে নীটত উত্তীৰ্ণ হৈছিল।
ইয়াতেই তদন্তকাৰীৰ সন্দেহ বাঢ়িছে। তদন্তকাৰীয়ে এই কথাও গম পায় যে দীনেশৰ পুত্ৰ ঋষিয়ে দ্বাদশ শ্ৰেণীত দ্বিতীয় বিভাগত উত্তীৰ্ণ হৈছে। সেইটোও গ্ৰেচ নম্বৰ লৈ। পৰিয়ালটোৰ বাকী চাৰিজন সদস্যৰো দ্বাদশ পৰীক্ষাত ভাল ফলাফল নাছিল। কিন্তু উক্ত পাঁচোজনে নীটত কেনেকৈ সুযোগ পালে সেই লৈ প্ৰশ্ন উত্থাপন হ’বলৈ আৰম্ভ কৰিছে।
দীনেশৰ কন্যা গুঞ্জনৰ লগতে পৰিয়ালটোৰ আন দুজন সদস্য পলক আৰু ছোনিয়াও নীট উত্তীৰ্ণ হৈ বৰ্তমান চৰকাৰী চিকিৎসা মহাবিদ্যালয়ত চিকিৎসা বিজ্ঞানৰ শিক্ষা গ্ৰহণ কৰি আছে। মংগিলালৰ কন্যা প্ৰকৃতিয়েও চৰকাৰী চিকিৎসা মহাবিদ্যালয়ত অধ্যয়ন কৰি আছে।
চৰকাৰী চিকিৎসা মহাবিদ্যালয় এখনত একেটা পৰিয়ালৰ ইমানকেইজন মানুহে কেনেকৈ সুযোগ পালে সেয়া এতিয়া তদন্তকাৰীৰ চকুত পৰিছে। ইয়াৰ লগতে এই ঘটনাই প্ৰশ্ন উত্থাপন কৰিছে, ২০২৫ চনতো বিৱাল পৰিয়ালে পৰীক্ষাৰ পূৰ্বে প্ৰশ্নকাকত সংগ্ৰহ কৰিছিল নেকি?
