ৰাজস্থানত উদ্ধাৰ হৈছে এজন নীট প্ৰাৰ্থীৰ মৃতদেহ। তেওঁৰ ঘৰৰ পৰা চিপ লোৱা অৱস্থাত মৃতদেহটো আৰক্ষীয়ে উদ্ধাৰ কৰে। প্ৰদীপ মহীষ নামৰ যুৱকজনে এইবাৰ NEET-UG পৰীক্ষাত অৱতীৰ্ণ হৈছিল। উল্লেখ্য যে ৩ মে’ত অনুষ্ঠিত হৈছিল সৰ্বভাৰতীয় চিকিৎসা প্ৰৱেশ পৰীক্ষা (NEET-UG)।
কিন্তু ৭ মে’ত প্ৰশ্নকাকত ফাদিলৰ বিষয়টো পোহৰলৈ আহে। ইয়াৰ পিছতে পৰীক্ষা পৰিচালনা সংস্থা নেচনেল টেষ্টিং এজেন্সীয়ে ১২ মে’ত পৰীক্ষা বাতিল কৰাৰ কথা ঘোষণা কৰে। ইফালে ছাত্ৰজনৰ পৰিয়ালৰ দাবী, পৰীক্ষাক লৈ প্ৰদীপ অতি আশাবাদী আছিল। পৰীক্ষা দিয়াৰ পিছত তেওঁ ৬৫০ নম্বৰ পাব বুলি পৰিয়ালক কৈছিল।
কিন্তু পৰীক্ষাৰ চাৰিদিন পিছত যেতিয়া প্ৰশ্নকাকত ফাদিলৰ বিষয়টো পোহৰলৈ আহে, তেতিয়া প্ৰদীপ অতিশয় চিন্তিত হৈ পৰে। কিন্তু যেতিয়া পৰীক্ষা বাতিল হয় তেতিয়া তেওঁ মানসিক ভাবে ভাঙি পৰে। কিন্তু ইয়াৰ বাবেই প্ৰদীপে এই চৰম সিদ্ধান্ত ল’ব বুলি কোনেও অনুমান কৰিব নোৱাৰিলে বুলি পৰিয়ালৰ লোকে দাবী কৰে।
আৰক্ষীৰ সূত্ৰ অনুসৰি, প্ৰদীপ ৰাজস্থানৰ ঝুনঝুনুৰ বাসিন্দা। কিন্তু নীটৰ বাবে প্ৰস্তুতি চলাবলৈ তেওঁ ছিকাৰত আছিল। পূৰ্বতে তেওঁ তাত কোচিং কৰিছিল। ভগ্নী আৰু ভাতৃয়েও ছিকাৰত কোচিং কৰে। আগতে তিনিওজন ভাই-ভনী একেলগে ভাড়াঘৰত আছিল।
শুকুৰবাৰে প্ৰদীপৰ ভাতৃ কোচিঙৰ বাবে গৈছিল। ভনীয়েক বাথৰুমত আছিল। কিন্তু তেওঁ ওলাই আহি দেখে যে প্ৰদীপে চিলিং ফেনৰ পৰা ওৰণি লৈ ওলমি আছে। লগে লগে ঘৰৰ মালিকক ফোন কৰে। আৰক্ষীকো খবৰ দিয়া হয়। প্ৰদীপক চিকিৎসালয়লৈ লৈ যোৱা হয়। কিন্তু তেওঁক ৰক্ষা কৰিব পৰা নগ’ল।
প্ৰদীপৰ পিতৃ ৰাজেশ কুমাৰ মেঘৱালে কয়, “ল’ৰাটোৱে এইবাৰ বহুত ভাল পৰীক্ষা দিলে। প্ৰদীপে পৰিয়ালক কৈছিল যে চৰকাৰী চিকিৎসা মহাবিদ্যালয়ত তেওঁৰ ভাল সুযোগ আছে। তেওঁৰ ওপৰত আত্মবিশ্বাস আছিল। কিন্তু তেওঁ ইমান চৰম সিদ্ধান্ত লোৱাটো মই কল্পনা কৰিব নোৱাৰো।” ইয়াৰ পিছত তেওঁ নীটক লৈ নিজৰ খং উজাৰি দিয়ে।
