যদি কোনো বাংলাদেশী অনুপ্ৰৱেশকাৰী ধৰা পৰে তেন্তে তেওঁক আদালতত হাজিৰ কৰাৰ প্ৰয়োজন নাই। তেওঁক সীমান্তলৈ পঠিয়াব লাগে। বৃহস্পতিবাৰে আৰক্ষী আৰু আৰপিএফক এই নিৰ্দেশ দিয়ে বংগৰ মুখ্যমন্ত্ৰী শুভেন্দু অধিকাৰীয়ে।
এই সন্দৰ্ভত তেওঁ বুধবাৰে নবান্নৰ পৰা এই নিৰ্দেশ দিয়ে। এইবাৰ হাওৰাত অনুষ্ঠিত প্ৰশাসনিক বৈঠকৰ পিছত এই কথা তেওঁ পুনৰ স্পষ্ট কৰি দিয়
পশ্চিমবংগ আৰু দেশৰ অন্যতম ব্যস্ত ৰে’ল ষ্টেচন হাওৰা। প্ৰতিদিনে হাওৰা ষ্টেচনৰ মাজেৰে বহু যাত্ৰীয়ে যাত্ৰা কৰে। এনে পৰিস্থিতিত মুখ্যমন্ত্ৰীয়েও বৃহস্পতিবাৰে নিজৰ ভাষাত স্পষ্ট কৰি দিয়ে যে অনুপ্ৰৱেশকাৰীক ধৰিবলৈ হাওৰা ষ্টেচন চৌহদত কঠোৰ চোৰাংচোৱাগিৰি ৰখা উচিত।
তেওঁ কয়, “আৰক্ষী আয়ুক্ত আৰু আৰপিএফক কোৱা হৈছে যে যদি হাওৰা ষ্টেচনত নাগৰিকত্ব সংশোধনী আইনৰ অধীনত নপৰা বাংলাদেশী অবৈধ অনুপ্ৰৱেশকাৰী ধৰা পৰে তেন্তে তেওঁক আদালতলৈ প্ৰেৰণ কৰা নহ’ব।
তেওঁক ভালকৈ খুৱাই-বুৱাই পোনে পোনে বনগাঁও পেট্ৰাপোল সীমান্তলৈ লৈ যোৱা হ’ব, অন্যথা তেওঁক বচিৰহাটৰ বিঅ’পিলৈ (সীমা চকী) লৈ যোৱাৰ ব্যৱস্থা কৰা হ’ব। প্ৰতি সপ্তাহত কিমানজন এনে অনুপ্ৰৱেশকাৰী ধৰা পৰিছে তাৰো ৰেকৰ্ড ৰাখিব বিচাৰিছে মুখ্যমন্ত্ৰীয়ে।
ডিজিপিৰ জৰিয়তে প্ৰতি সপ্তাহত মুখ্যমন্ত্ৰীৰ কাৰ্যালয়লৈ প্ৰেৰণ কৰা হ’ব গ্ৰেপ্তাৰৰ সংখ্যা। হাওৰাত অনুষ্ঠিত প্ৰশাসনিক বৈঠকৰ অন্তত এই কথা কয় শুভেন্দুৱে। উল্লেখ্য যে কাৰ অধীনত বাংলাদেশ, পাকিস্তান আৰু আফগানিস্তানৰ পৰা ভাৰতলৈ প্ৰব্ৰজন কৰা ছটা জনগোষ্ঠীক শৰণাৰ্থীৰ মৰ্যাদা দিয়া হৈছে।
যোৱা বছৰ গৃহ মন্ত্ৰণালয়ৰ এক অধিসূচনা অনুসৰি, ২০২৪ চনৰ ৩১ ডিচেম্বৰলৈকে বাংলাদেশ, পাকিস্তান আৰু আফগানিস্তানৰ পৰা ভাৰতলৈ প্ৰব্ৰজন কৰা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টানসকলক শৰণাৰ্থীৰ মৰ্যাদা প্ৰদান কৰা হ’ব। ভাৰত চৰকাৰে তেওঁলোকক বিতাড়িত নকৰে।
এই অধিসূচনা ২০২৫ চনৰ ৪ এপ্ৰিলৰ পৰা কাৰ্যকৰী হোৱা অভিবাসন আৰু বিদেশী আইনখনৰ ৩৩ নং ধাৰাত জাৰি কৰা হৈছে। বুধবাৰে বিয়লি নবান্নৰ পৰা এক সংবাদমেলত শুভেন্দুৱে কয় যে কাত অন্তৰ্ভুক্ত নোহোৱাসকলক ধৰি বিএছএফক গতাই দিব লাগে।
এই সন্দৰ্ভত কেন্দ্ৰই যোৱা বছৰ ৰাজ্য চৰকাৰলৈ এক নিৰ্দেশ প্ৰেৰণ কৰিছিল। কিন্তু পূৰ্বৰ চৰকাৰে কাৰ্যকৰী কৰা নাছিল বুলি অভিযোগ উত্থাপন কৰে মুখ্যমন্ত্ৰী শুভেন্দুৱে। যোৱা বছৰ কেন্দ্রই প্রেৰণ কৰা নির্দেশনা বুধবাৰৰ পৰা পশ্চিমবংগত কার্যকৰী হ’ব বুলিও তেওঁ কয়৷
উল্লেখ্য যে চলিত বৰ্ষৰ নিৰ্বাচনৰ পূৰ্বে বিজেপিয়ে প্ৰচাৰকালৰ পৰাই কৈ আহিছে যে অনুপ্ৰৱেশকাৰীক ৰাজ্যৰ পৰা বহিষ্কাৰ কৰিব। বিশাল জনমত লৈ ক্ষমতালৈ অহাৰ লগে লগে শুভেন্দুৰ নেতৃত্বত নতুন চৰকাৰে প্রতিশ্রুতি অনুযায়ী পদক্ষেপ গ্রহণ কৰিবলৈ আৰম্ভ কৰিছে৷
