পুনৰ বৃদ্ধি পালে পেট্ৰ’ল আৰু ডিজেলৰ (Petrol- diesel price hike) মূল্য। শনিবাৰে পুৱা দেশৰ ৰাজধানী নতুন দিল্লীত প্ৰতি লিটাৰ পেট্ৰ’লৰ মূল্য ৮৭ পইচা বৃদ্ধি পায়। প্ৰতি লিটাৰ ডিজেলৰ মূল্য ৯১ পইচা বৃদ্ধি হয়।
ইয়াৰ লগে লগে বিগত ১০ দিনত তৃতীয়বাৰৰ বাবে ইন্ধন ব্যয়বহুল হৈ পৰিছে। পশ্চিম এছিয়াত সংঘাতৰ মাজতে পেট্ৰ’ল-ডিজেলৰ দাম বৃদ্ধিৰ বাবেই সাধাৰণ মানুহ জুৰুলা হৈ পৰিছে। মধ্যবিত্ত শ্ৰেণীৰ পকেটতো চাপ পৰিছে।
কলকাতাত প্ৰতি লিটাৰ পেট্ৰ’লৰ মূল্য ৯৪ পইচা বৃদ্ধি পাইছে। ফলত শনিবাৰৰ পৰা ১১০ টাকা ৬৪ পইচাত এক লিটাৰ পেট্ৰ’ল কিনিব লাগিব। তদুপৰি কলকাতাত ডিজেলৰ মূল্য ৯৫ পইচা বৃদ্ধি পাইছে। ফলত নতুন মূল্য প্ৰতি লিটাৰত ৯৭ টকা ২ পইচা হৈ পৰিছে।
ফলত এফালে ব্যক্তিগত গাড়ী বা বাইক চলোৱাৰ খৰচ বৃদ্ধি পাব, আনফালে ইন্ধনৰ মূল্য বৃদ্ধিৰ প্ৰভাৱ বাছ-টেক্সিৰ দৰে ৰাজহুৱা পৰিবহণতো অনুভৱ হ’বলৈ গৈ আছে। ১৫ মে’ত সমগ্ৰ দেশতে প্ৰতি লিটাৰ পেট্ৰ’লৰ মূল্য তিনি টকাকৈ বৃদ্ধি পাইছিল। ইয়াৰ পিছত ১৯ মে’ত পুনৰ পেট্ৰ’লৰ মূল্য আৰু ৯০ পইচা বৃদ্ধি হয়।
এইবাৰ মূল্য ৮৭ পইচা বৃদ্ধি হোৱাৰ ফলত বিগত ১০ দিনত পেট্ৰ’লৰ মূল্য প্ৰায় পাঁচ টকাকৈ ব্যয়বহুল হৈ পৰিছে। নতুন মূল্যবৃদ্ধিৰ বাবে দিল্লীত এতিয়া এক লিটাৰ পেট্ৰ’লৰ মূল্য ৯৯.৫১ টকা। প্ৰতি লিটাৰ ডিজেল বিক্ৰী হৈছে ৯২.৪৯ টকাত। পশ্চিম এছিয়াৰ সংকটৰ মাজতে প্ৰধানমন্ত্ৰী নৰেন্দ্ৰ মোদীয়ে দেশবাসীক শক্তি ৰাহি কৰাৰ বাৰ্তা প্ৰদান কৰে।
লগতে আগন্তুক এবছৰলৈ সোণ ক্ৰয় নকৰিবলৈও পৰামৰ্শ দিয়ে। দৰাচলতে সমগ্ৰ বিশ্বতে ইন্ধনৰ মূল্যৰ উঠা-নমাটো পশ্চিম এছিয়াৰ পৰিস্থিতিৰ ওপৰত নিৰ্ভৰ কৰে। এই মুহূৰ্তত আন্তঃৰাষ্ট্ৰীয় বজাৰত খাৰুৱা তেলৰ যোগানক লৈ অনিশ্চয়তা সৃষ্টি হৈছে।
বহু দেশৰ দৰে ভাৰততো এই ইন্ধনৰ বেছিভাগেই বাহিৰৰ পৰা আমদানি কৰিবলগা হয়। ফলত ভাৰতীয় বজাৰতো ইয়াৰ প্ৰভাৱ পৰিছে। দেশৰ বৈদেশিক মুদ্ৰাৰ মজুত সুৰক্ষাৰ ক্ষেত্ৰত সাধাৰণ ৰাইজক সহযোগ কৰিবলৈ আহ্বান জনাইছে মোদীয়ে।
দিল্লী আৰু কাষৰীয়া অঞ্চলত বৃদ্ধি পাইছে চিএনজিৰ মূল্যও। প্ৰতি কেজিত এক টকাকৈ চিএনজি ব্যয়বহুল হৈ পৰিছে। এই গেছ অটোৰ বাবে ইন্ধন হিচাপে ব্যৱহাৰ কৰা হয়। ফলত পুনৰ অটোভাড়া বৃদ্ধি হোৱাৰ আশংকা কৰা হৈছে।
