কেন্দ্ৰীয় চৰকাৰে দিল্লীৰ লুটিয়েন্সৰ (Lutyens of Delhi) জিমখানা ক্লাব (Gymkhana Club) কৰ্তৃপক্ষক মাটি খালী কৰিবলৈ নিৰ্দেশ (Instructions to clear the land) দিছে। ৫ জুনৰ ভিতৰত এই ভূমি খালী কৰাৰ নিৰ্দেশ। কেন্দ্ৰীয় চৰকাৰে জনাইছে যে প্ৰতিৰক্ষা আন্তঃগাঁথনি শক্তিশালী আৰু সুৰক্ষিত কৰিবলৈ ২৭.৩ একৰ (প্ৰায় ৮৭৩ কঠা) মাটিৰ প্ৰয়োজন।
দিল্লীৰ এই অভিজাত ক্লাবটো লোক কল্যাণ মাৰ্গত প্ৰধানমন্ত্ৰীৰ বাসগৃহৰ সমীপত বিস্তৃত অঞ্চলত আছে। চৌদিশে বিভিন্ন চৰকাৰী আৰু প্ৰতিৰক্ষা সম্পৰ্কীয় কাৰ্যালয় আৰু অট্টালিকা। গৃহ নিৰ্মাণ আৰু নগৰ উন্নয়ন মন্ত্ৰালয়ৰ অধীনস্থ ভূমি আৰু উন্নয়ন বিভাগে জিমখানা ক্লাবলৈ প্ৰেৰণ কৰিছে এক নিৰ্দেশনা। উক্ত নিৰ্দেশনাত কোৱা হৈছে যে ক্লাবটো ৰাষ্ট্ৰীয় ৰাজধানীৰ এটা স্পৰ্শকাতৰ আৰু কৌশলগত অঞ্চলত অৱস্থিত। জনসাধাৰণৰ সুৰক্ষা আৰু প্ৰতিৰক্ষা সম্পৰ্কীয় বিষয়ৰ বাবে এই মাটিৰ প্ৰয়োজন।
২২ মে’ত প্ৰেৰণ কৰা এই নিৰ্দেশনাত উল্লেখ কৰা হৈছে যে ২নং ছফদৰজং ৰোডৰ মাটিখিনি প্ৰথমে ইম্পেৰিয়েল দিল্লী জিমখানা ক্লাব লিমিটেডক লিজত দিয়া হৈছিল। এতিয়া ই হৈ পৰিছে দিল্লী জিমখানা ক্লাব। সেই মাটিখিনি সামাজিক সমাৱেশ, খেলা-ধূলাৰ বাবে দিয়া হৈছিল। এতিয়া সেই মাটিৰ প্ৰয়োজন হৈছে জনস্বাৰ্থ আৰু প্ৰতিৰক্ষা সম্পৰ্কীয় প্ৰকল্পৰ বাবে। পট্টা চুক্তিৰ ৪ নং দফা অনুসৰি, ভাৰতৰ ৰাষ্ট্ৰপতিয়ে এতিয়া ভূমি আৰু উন্নয়ন বিভাগৰ জৰিয়তে সেই চুক্তি বন্ধ কৰি দিছে। ২৭.৩ একৰ মাটিত থকা সকলো অট্টালিকা, আন্তঃগাঁথনি, বাগিচাৰ আইনী মালিকীস্বত্ব এইবাৰ বিভাগৰ জৰিয়তে ৰাষ্ট্ৰপতিৰ হাতলৈ হস্তান্তৰ কৰা হ’ব। ৫ জুনত ভূমি আৰু উন্নয়ন বিভাগে সেই মালিকীস্বত্ব গ্ৰহণ কৰিব। সেইদিনা শান্তিপূৰ্ণভাৱে কেন্দ্ৰীয় চৰকাৰক মালিকীস্বত্ব হস্তান্তৰ কৰিবলৈ ক্লাব কৰ্তৃপক্ষক কোৱা হৈছে। অন্যথা আইনী ব্যৱস্থা গ্ৰহণ কৰা হ’ব বুলিও নিৰ্দেশত উল্লেখ কৰা হৈছে।
এই জিমখানা ক্লাবটো ব্ৰিটিছ যুগত নিৰ্মাণ কৰা হৈছিল। ১৯১১ চনত ইংলেণ্ডৰ ৰজা পঞ্চম জৰ্জে তেওঁৰ ৰাজধানী কলকাতাৰ পৰা দিল্লীলৈ স্থানান্তৰিত কৰাৰ কথা ঘোষণা কৰে। সেয়েহে নতুন ৰাজধানীত ব্ৰিটিছ বিষয়াসকলৰ মনোৰঞ্জনৰ বাবে এটা ক্লাবৰ প্ৰয়োজন হৈছিল। ১৯১৩ চনত মুকলি কৰা জিমখানা ক্লাবক সেই সময়ত ইম্পেৰিয়েল দিল্লী জিমখানা ক্লাব বুলি কোৱা হৈছিল। স্বাধীনতাৰ পিছত ইয়াক জিমখানা ক্লাব বুলি কোৱা হয়। ১৯৩০ চনত ক্লাব ভৱন নিৰ্মাণৰ কাম সম্পূৰ্ণ হয়। ইয়াৰ ডিজাইন কৰিছিল ব্ৰিটিছ স্থপতিবিদ ৰবাৰ্ট টি ৰাছেলে। তেওঁ কন’ট প্লেচৰ ডিজাইনো কৰিছিল। তেওঁ কমাণ্ডাৰ ইন চিফ ৰেচিডেন্সৰ ডিজাইনো কৰিছিল। ই আছিল ভাৰতৰ প্ৰথম প্ৰধানমন্ত্ৰী জৱাহৰলাল নেহৰুৰ চৰকাৰী বাসগৃহ। জিমখানা ক্লাবৰ ডিজাইন আজিও সলনি হোৱা নাই। ১৯৩০ চনত ভাইচৰয়ৰ পত্নী লেডী ৱেলিংটনে নিজেই ২১ হাজাৰ টকা দান কৰি তাত এটা চুইমিং পুল নিৰ্মাণ কৰিছিল। ১৯৪৭ চনত ভাৰত বিভাজনৰ সময়ত শিখ, হিন্দু আৰু মুছলমান বাহিনীৰ বিষয়াসকলে এই ক্লাবৰ সন্মুখত থিয় হৈ সুৰাৰ গিলাচত চুমুক দি ইজনে সিজনক বিদায় দিছিল। ৫ জুনৰ পিছত লুটিয়েন্সৰ সেই ঠিকনাত আৰু নাথাকিব পৰম্পৰাগত দিল্লী জিমখানা ক্লাব।
